LUKAS 22
22
Nerancang ha Perdat Yesus
(Mat 26:1-5; Mrk 14:1-2; Yoh 11:45-53)
1Arik Raya Ruti Pek Beragi#22:1 Arik Raya Ruti Pek Beragi: Raya adeh bimula telas caknak Paskah kidij. Raya adeh kibelangsong selame tujoh arik. Ku mase raya adeh, mai Yahudi had naicak caknak de pek beragi. Neng Keluaran 12:15-20. ya kaha-merek. Raya adeh juga bigelar Arik Raya Paskah. 2Raknak-raknak imam agame Yahudi ru guru-guru Hukom Taurat naikek care naiha-perdat Yesus secare serakngek kerana naisengoh bipanei ya mai jengoi.
Yudas Kisetuju Kaha-kianat Yesus
(Mat 26:14-16; Mrk 14:10-11)
3Telas ajeh Ibles kimuj nu Yudas de bisebot Iskariot. Kek ajeh numom ju 12 urag pengikot Yesus. 4Yudas kiet nu raknak-raknak imam agame Yahudi ru pegawei-pegawei pengawal Deg Jenang kaha-bincang begeiharok kaha-kianat Yesus. 5Enai ihad naikerakmik ru naisetuju naiha-og duet nu kek. 6Yudas pen kisetuju ru mula kikek mase de bor kaha-kianat Yesus secare serakngek pek bipanei ya mai.
Pesiapan ha Caknak Paskah
(Mat 26:17-25; Mrk 14:12-21; Yoh 13:21-30)
7Lalu holloh arik petame Arik Raya Ruti Pek Beragi. Ku arik ajeh dombe Paskah hod bigoj. 8Yesus Kior Petrus ru Yohanes, “Et ru sedialoh caknak Paskah ha hik.”
9Ubai tanya, “Ku belok de Jenhod jarsedia caknak ajeh?”
10Yesus Kiberlag, “Bile jerkemuj nu kateh kote, ku pajeh doh jerkebakek mong numom keral kigulap takar teu. Joiloh kek nu deg de kituju. 11Bile ya kimuj nu madeg, urokloh nu tuan deg ajeh, ‘Guru Kitanya begei adeh: “Ku belok bilek tetamu ha Eng ru pengikot-pengikot Eng jiha-cak caknak Paskah?” ’ 12Tuan deg ajeh doh kiternyol nanek bilek de entoi ku tingkat kemil deg ajeh. Arap ku bilek ajeh ya cengkuk. Sedialoh caknak Paskah ku pajeh.”
13Jadi, ubai pen baiet ru dikdij hal tejadi begei de biurok ya Yesus nu ubai. Lalu ubai pen baisedia caknak Paskah ku pajeh.
Caknak Paskah
(Mat 26:26-30; Mrk 14:22-26; 1 Kor 11:23-25)
14Bile imase ya lei, Yesus Kigei cerner ku mije Kaha-cakcak ru Irasul-rasul. 15Kiurok nu enai, “Eng ihad Nghod Ngha-cak caknak Paskah adeh besama ru engkek sebelom Ngtesiksa. 16Cerngailoh, Eng doh pek Ngcak nij caknak adeh lei Paskah de sebenar bipegenap ku serga de biperintah ya Jenang sebegei Raja.”
17Telas ajeh Yesus Kikot cawan de mong teu wain ku ikateh. Telas Kiucap syukor nu Jenang, Kiurok, “Kotloh cawan adeh ru bahagi ingeknut ratak liengkek. 18Cerngailoh, Eng doh pek Ngngut teu wain nij lei serga de biperintah ya Jenang sebegei Raja doh Kihol.”
19Telas ajeh Yesus Kikot ruti. Ru telas Kiucap syukor nu Jenang, Kek Kibahagi ruti ajeh nu enai ru Kiurok, “Adehloh berog Eng de biog ha engkek. Behloh begei adeh ha neingat ha Eng.” 20Ya telas naicak, Kek Kikot cawan de biisi teu wain ru Kiurok, “Cawan adeh jenanji pai antare Jenang ru Isengoi-sengoi. Jenanji adeh kijadi sah ya behip Eng de bipesaruk ha engkek.#Yer 31:31-34
21Tapi nengloh! Sengoi de bekianat Eng mong ku padeh besama-sama ru LiEng ku mije adeh! 22Eng Kenon Manusia doh Ngdat begei de ya bipetetap ya Jenang tapi ihad celaka sengoi de bekianat ha Eng!”
23Enai pen mula naibetanya-tanya ku ratak liknai bok doh de bahbeh hal ajeh.
Bok de Paleng Entoi
24Telas ajeh timulloh kelahi ratak pengikot-pengikot Yesus tentang bok de paleng entoi ratak liknai ajeh.#Mat 18:1; Mrk 9:34; Luk 9:46 25Yesus Kiurok nu enai, “Raja-raja mai pek Yahudi naitindas ha rakyat liknai sendiri. Ru penguasa-penguasa naipaksa rakyat supaye naitaat nu ernor enai. Tapi naigelar diri liknai sendiri sebegei ‘mai bejaga rakyat.’ 26Engkek pek patot engkebeh begei ajeh. Sengoi de paleng entoi ju engkap engkek mesti kijadi begei ha sengoi de paleng macot, ru penguasa mesti kijadi begei ha hambe.#Mat 20:25-27; Mrk 10:42-44#Mat 23:11; Mrk 9:35 27Bok imaika de lebeh entoi? Ilei de gigei cakcak atao ilei de belayan mai cakcak? Tentuloh ilei de gigei cakcak. Tapi Eng mong ku engkap engkek sebegei mai de belayan.#Yoh 13:12-15
28Ku kateh dikdij senusah de Ngtempeh, engkek mong besama-sama ru Eng. 29Sama begei Menek Eng Kiog hak Ngmemerintah sebegei Raja, begei ajehloh juga Ngog hak ajeh nu engkek. 30Ngbeh begei ajeh supaye engkecakcak ru engkengekngut besama ru Eng bile Ngmemerintah sebegei Raja, ru juga supaye engkegei ku kemil tahte untok engkememerintah 12 suku bangse Israel.”#Mat 19:28
Yesus Kipasal Petrus Doh Pek Kiaku Kikenal Ilei
(Mat 26:31-35; Mrk 14:27-31; Yoh 13:36-38)
31Yesus Kiurok nu Simon Petrus, “Simon, Simon, cerngailoh! Ibles ya kisemanj kebenaran kaha-cuba dikdij liengkek begei ha mai beselai de kigep igandom. 32Tapi Eng ya Ngbedoa ha hek Simon, supaye iman hek pek yahyoh. Bile halos nij nu Eng, pekuatloh sesedara seiman hek de kilek.”
33Petrus kiberlag, “Tuhan, eng ngbesedia bijel ru ngdat besama-sama ru Jen!”
34Tapi Yesus Kiurok, “Petrus, cerngailoh, sebelom pog kibetader ku arik adeh, doh nik kali haurok pek hakenal Eng.”
Dabal, Jaben, ru Pedang
35Telas ajeh Yesus Kitanya nu Ipengikot-pengikot, “Entemjeh, bile Ngngeng engkek pek bedabal, pek bejaben, ru pek bekasot, mongka ma-ma de kurang ku engkek?”
“Tok!” naiberlag.#Mat 10:10; Mrk 6:8; Luk 9:3
36Yesus Kiurok, “Tapi hunen, bok imai de mong idabal ru ijaben hod kien. Bok imai de pek bepedang hod kijual ijubah ru kibeli pedang. 37Cerngailoh, ayat Alkitab adeh mesti hod tejadi nu diri Eng: ‘Kek bianggap sama begei mai jehat.’#Yes 53:12 Pek liu nij, ma de bicot tentang Eng ajeh doh kitejadi.”
38Ipengikot-pengikot naiurok, “Tuhan, nengloh, ku padeh mong nar bilah pedang.”
Yesus Kiberlag, “Cukoploh!”
Yesus Kibedoa ku Lod Zaiton
(Mat 26:36-46; Mrk 14:32-42)
39Yesus Kihol ju kote ajeh. Begei biasa Kek Kiet nu Lod Zaiton ru Ipengikot-pengikot naijoi ha Kek. 40Bile Yesus Kilei nu majeh, Kiurok nu enai, “Bedoaloh supaye engkek pek bicuba.”
41Telas ajeh Kek Kiet inyaknak lebeh kurang nupeknej batu ju enai. Kibelutot ru Kibedoa, 42“Menek! Amen Jenhod, pernyakloh cawan seniksa adeh ju Eng, tapi agokloh joi heknod Eng, biarloh heknod Jen taleh de tejadi.”
43Mong malikat ju serga de kihol ru kipekuat Kek. 44Kerana Isengik ihad susah, Yesus lebeh tekon Kibedoa lei Isengep jot nu matik begei ha behip.#22:43-44 Ayat-ayat adeh pek mong ku kateh memerip salinan Alkitab manah.
45Telas Kibedoa, Kek Kilos nij nu Ipengikot-pengikot ru Kineng enai tengah naibukbet kerana ihad naisedeh lei naipenat. 46Yesus Kiurok nu enai, “Engkek sepatotnye pek engkebukbet! Kosloh ru bedoaloh supaye engkek pek bicuba.”
Yesus Bicap
(Mat 26:47-56; Mrk 14:43-50; Yoh 18:3-11)
47Mase Yesus lekat Kibelwal nu Ipengikot-pengikot, leiloh nanek kumpulan sengoi. Mai jengoi ajeh bien ya Yudas. Kek ajeh numom ju 12 urag pengikot Yesus. Kek kiperek nu Yesus kerana kaha-nyui Kek. 48Yesus Kiurok, “Yudas, hek hakianat Eng Kenon Manusia ya nyinui hek ajeh.”
49Bile Ipengikot-pengikot naineng hal de doh tejadi, naiurok, “Tuhan, biar jiserag enai ru pedang!” 50Lalu, numom ju Ipengikot-pengikot kiserag hambe Imam Agong agame Yahudi ru kitas entag kentop hambe ajeh.
51Tapi Yesus Kiurok, “Behenti! Sudah!” Lalu Kek Kipep entag hambe ajeh ru Kiperbor kek.
52Telas ajeh Yesus Kiurok nu raknak-raknak imam agame Yahudi, pegawei-pegawei pengawal Deg Jenang, ru raknak-raknak mai Yahudi de naihol naiha-cap Kek, “Eng adeh mai pemberontakka lei engkeen pedang ru jehuk peknet engkeha-cap ha Eng? 53Tiap arik Eng mong besama ru engkek ku laman Deg Jenang tapi pek engkecap Eng. Tapi adehloh imase ha engkek ru imase ha kuasa gelap kimemerintah.”
Petrus Pek Kiaku Kikenal Yesus
(Mat 26:57-58, 69-75; Mrk 14:53-54, 66-72; Yoh 18:12-18, 25-27)
54Lalu naicap Yesus ru naien Kek nu deg Imam Agong agame Yahudi. Petrus kijoi enai ju kennyak. 55Mong mai de nairup os ku semakdek laman deg ajeh ru naigei ku isekelileg. Petrus juga kigei besama ru enai ajeh. 56Numom hambe kerdor kineng Petrus kigei ku beg os. Telas betol-betol kilet ha Petrus, hambe kerdor ajeh kiurok, “Sengoi adeh mong besama ru Yesus!”
57Tapi Petrus pek kiaku. Kek kiurok, “Eng pek ngkenal Kek!”
58Telas ajeh numom de kilek nij kineng nu Petrus ru kiurok, “Hek adeh numom ju enai juga!” Tapi Petrus kiberlag, “Nyiknyuk, pek eng.”
59Kira-kira sejam ju kenjeh, mong numom de kilek nij kibekeras kiurok, “Tentu sengoi adeh pengikot Yesus kerana kek mai lengrik Galilea.”
60Tapi Petrus kiberlag, “Ma maksod hek? Eng pek ngreti ma haurok!”
Ku sarik jijeh juga, tengah Petrus kibelwal, pog pen kibetader. 61Tuhan Kiceleg ru Kineng nu Petrus. Lalu Petrus kiteingat ha engrok Tuhan nu kek, “Sebelom pog kitader arik adeh, doh nik kali haurok pek hakenal Eng.” 62Petrus kihol ju kenjeh ru kipanjap.
Yesus Binyeh ru Bipet
(Mat 26:67-68; Mrk 14:65)
63Sengoi-sengoi de bejaga Yesus mula nainyeh ru naipet Kek. 64Naitutop Imat ya abat lalu naitanya nu Kek. “Bok de pekpet Hek?” 65Jeoi nij engrok nehina de kilek de naiurok nu Kek.
Yesus ku Ngar Mahkamah Agame Yahudi
(Mat 26:59-66; Mrk 14:55-64; Yoh 18:19-24)
66Ku ipepegelap, raknak-raknak mai Yahudi temasok raknak-raknak imam agame Yahudi ru guru-guru Hukom Taurat naibeburuk ru naien Yesus nu Mahkamah Agame Yahudi.#22:66 Mahkamah Agame Yahudi: Adeh pihak bekuasa tetinggi de mong kuasa ku kateh hal sinui ru agame mai Yahudi. Enai ajeh tediri ju imam-imam agame Yahudi, mai Farisi, guru-guru Hukom Taurat, ru lain-lain nij juga. 67Naiurok, “Pasalloh nu jik. Betolka Hek adeh Peselamat de bijanji ya Jenang?”
Yesus Kiberlag, “Hamapen Ngpasal nu engkek, doh pek engkepecaya. 68Ru amen Ngtanya ma-ma nu engkek, doh pek engkeberlag. 69Tapi ju hunen, Eng Kenon Manusia doh Nggei ku kedudukan de tehormat ku englag kentop Jenang de Bekuasa.”
70Dikdij liknai tanya, “Betolka Hek Kenon Jenang?”
Yesus Kiberlag, “Hooh, kena begei bengwal engkek ajeh.”
71Lalu naiurok, “Hik pek hiperlu ha saksi kilek nij! Hik ya hicerngai Ibengwal ju empag Ilei sendiri!”
Currently Selected:
LUKAS 22: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
