LUKAS 21

Pesembahan Numom Balu de Hajap

(Mrk 12:41-44)

1Yesus Kineng nu Isekelileg ru Kibakek mai kaya naipermuj duet nu kateh peti pesembahan ku laman Deg Jenang. 2Kek juga Kibakek numom balu de hajap kipermuj nar kepeg duet tembage. 3Lalu Kiurok, “Cerngailoh abor, balu de hajap ajeh kiog pesembahan de lebeh entoi inilei daripade dikdij mai kilek. 4Dikdij mai kilek ajeh naiog pesembahan ju kenaya enai tapi balu ajeh hamapen ihad kihajap, kiog dikdij inafkah.”

Yesus Kiajar tentang Tanda-tanda Helnol Arik Kiamat

(Mat 24:1-44; Mrk 13:1-37)

5Memerip urag pengikot Yesus tengah naibelwal tentang Deg Jenang. Naiurok ihad ibernor deg ajeh bihias ya batu-batu de lawa, ru juga ya barang-barang de bipesembah nu Jenang. Tapi Yesus Kiurok nu enai, 6“Doh hol imase dikdij de engkeneng adeh biteh. Pek mong nanek batu pen de doh terwes besusot ku itempat!”

7Ipengikot-pengikot naitanya nu Yesus, “Guru, pasalloh nu jik, bileka hal-hal ajeh doh kitejadi? Juga, ma itanda-tanda bile hal-hal ajeh kaha-tejadi?”

8Yesus Kiberlag, “Bejaga-jagaloh supaye engkek pek bilenglod, kerana jeoi mai doh naihol naiguna muh Eng ru naiurok liknailoh peselamat de bijanji ya Jenang. Doh naiurok juga kiamat ya kaha-merek! Tapi agokloh joi ha enai ajeh.” 9“Engkek doh engkecerngai sengyog perag de tengah belaku ru doh engkecerngai juga gah kenacau tapi agokloh sengoh. Dikdij hal ajeh mesti kitejadi canuk tapi pek bereti kiamat doh kihol ku sarik jijeh juga.”

10Yesus Kiurok nij, “Nanek bangse doh kiperag bangse de kilek. Nanek kerajaan doh kiserag kerajaan de kilek. 11Majeh-manen doh mong gempe bumi de entoi, cengwag, ru nyaknik hawar. Hal-hal de besengoh ru tanda-tanda de luar biasa doh biperneng ku langit. 12Tapi sebelom dikdij hal ajeh kitejadi, engkek doh bicap, bianiaye, ru bien nu deg sembahyang ru bijel. Engkek doh bien nu ngar raja-raja ru nu ngar penguasa-penguasa kerana engkepecaya nu Eng, 13tapi hal ajeh doh kijadi peluang untok engkebesaksi tentang Eng nu enai. 14Jadi, pekuatloh sengik engkek ru agok risau begeiharok engkeha-bele diri 15kerana doh Ngog engrok ru cerendeg nu engkek, lei rimdij musoh pen pek buleh nailawan atao naibejawab ha engrok engkek. 16Keneng-menek, tenek-menang, sedara-mara, ru kekawat engkek pen doh naikianat ha engkek. Doh naiperdat memerip urag ju engkap liengkek. 17Dikdij mai doh naigetek ha engkek kerana engkepecaya nu Eng 18tapi nuhenglei sog engkek pen doh pek kiraroj. 19Amen engkek betahan, engkek doh engkekep sinui de lei ditehjeh.”

20“Bile engkeneng kote Yerusalem bikerpog ya aska-aska, paneiloh pek liu nij doh kote ajeh bipebinasa. 21Ku mase ajeh doh, mai de mong ku lengrik Yudea hodloh naijar nu lod, mai de mong ku kateh kote hodloh naidek ju kote ajeh, ru mai de mong ku selai agokloh naimuj balek nu kateh kote ajeh. 22Kerana, ajehloh imase Jenang Kihukom mai supaye dikdij ma de ya bicot ku kateh Alkitab kitejadi. 23Ku mase ajeh, ihad yayak kekerdor de makok ru de peremmem! Lengrik ajeh doh kikena senusah de ihad terok ru bangse ajeh doh bihukom. 24Mong mai doh de biperdat ya pedang, ru mong juga doh de bien sebegei tawanan nu lengrik kilek. Kote Yerusalem doh bijebat-jebat ya mai pek Yahudi lei dij imase de bitetap ya Jenang.”

25“Tanda-tanda doh bineng ku mat arik, gecek, ru perloi. Ku bumi, bangse-bangse doh ihad naisengoh ru naicemas mase naicerngai ha engrok laot ru naineng ha umbak de entoi.#Yes 13:10; Yeh 32:7-8; Yl 2:31; Why 6:12-13 26Dikdij kuasa de mong ku langit doh naiyahyoh. Enai doh naidendat kerana ihad naisengoh naineng pekare de kaha-tejadi nu bumi ajeh. 27Telas ajeh doh naineng Eng Kenon Manusia de bekuasa ru ihad mulie Nghol bikelileg ya sagop.#Dan 7:13; Why 1:7 28Bile dikdij hal ajeh mula kitejadi, beraniloh ru yakenloh kerana pek liu nij doh engkek bipeselamat.”

29Lalu Yesus Kicerite perumpamaan adeh nu enai: “Nengloh keneng are ru dikdij keneng jehuk de kilek. 30Bile engkeneng keneng ajeh ya mula hol iselak pai, engkepanei musem beked ya kaha-merek. 31Begei ajehloh juga, bile engkeneng dikdij hal ajeh kitejadi, hodloh engkepanei tentang hal adeh: Imase Ngha-los nij nu bumi sebegei Raja ya kaha-merek.

32Cerngailoh abor! Dikdij pekare ajeh doh kitejadi sebelom dikdij mai ku jaman adeh dij naidat. 33Langit ru bumi doh nyep tapi engrok Eng doh pek nyep lei ditehjeh.

34Bejaga-jagaloh! Agok biar sengik engkek tebeg ya pesta-pora, belnel, ru nerisau ha sinui. Amen pek engkebejaga-jaga, arik ajeh doh aleh-aleh kihol begei jerat. 35Arik ajeh doh kihol nu dikdij sengoi ku bumi. 36Tapi hodloh selalo engkebejaga-jaga ru engkebedoa supaye mampu engketempeh dikdij pekare de belaku doh, ru telas ajeh mampu engkejinjeg ku ngar Eng Kenon Manusia.”

37Ku jap-jap arik yah, Yesus Kibeajar ku laman Deg Jenang, ru ku jap-jap kelem, Kek Kigei ku Lod Zaiton.#Luk 19:47 38Jap-jap pepegelap, dikdij mai naihol naiha-cerngai Yesus Kibeajar ku laman Deg Jenang.

Currently Selected:

LUKAS 21: AEH

Highlight

Copy