LUKAS 20

Tenanya tentang Kuasa Yesus

(Mat 21:23-27; Mrk 11:27-33)

1Ku nanek arik, mase Yesus Kibeajar mai jengoi ru Kiperlei Gah Bor ku laman Deg Jenang, holloh raknak-raknak imam agame Yahudi, guru-guru Hukom Taurat, ru raknak-raknak mai Yahudi. 2Naitanya nu Yesus, “Pasalloh nu jik, ya kuasa ma Hek Habeh dikdij ajeh? Bokka de engog kuasa nu Hek Habeh ajeh?”

3Yesus Kiberlag, “Eng juga Ngha-tanya nu engkek. Pasalloh nu Eng, 4ya kuasa bokka Yohanes Pembaptis kibaptis sengoi? Ya kuasa Jenangka manusia?”

5Enai mula naibebincang ratak liknai, “Ma de hiha-urok? Amen hiberlag, ‘Yohanes Pembaptis kibaptis sengoi ya kuasa Jenang,’ Kek doh Kiurok, ‘Yama pek engkepecaya nu Yohanes Pembaptis?’ 6Tapi amen hiurok, ‘Kek kibaptis sengoi ya kuasa manusia,’ dikdij mai doh naipej batu nu hik kerana naipecaya Yohanes Pembaptis ajeh numom nabi.” 7Kerana ajeh, naiberlag, “Jik pek jipanei ya kuasa bok.”

8Lalu Yesus Kiberlag, “Amen begei ajeh, Eng pen pek Ngha-pasal ya kuasa bok Eng Ngbeh hal-hal ajeh.”

Perumpamaan tentang Mai Bepajak Selai Anggor

(Mat 21:33-46; Mrk 12:1-12)

9Telas ajeh Yesus Kicerite perumpamaan adeh: “Mong numom kibuka selai anggor ru kipajak iselai ajeh nu memerip urag petani. Telas ajeh kiet nu lengrik kilek ru kigei liu ku pajeh. 10Bile musem anggor ya lei, tuan selai ajeh kingeng numom ihambe nu mai bepajak ajeh supaye kiterima pelek anggor. Pelek anggor ajeh engleg ju hasel selai de kijadi hak kek. Tapi mai bepajak ajeh naipet hambe ajeh lalu naior kek jog ru mahentok de kien. 11Telas ajeh tuan selai ajeh kingeng ihambe de kilek nij tapi hambe ajeh pen bipet ru bipeselsel ya enai. Kek juga bior jog ru mahentok de kien. 12Tuan selai ajeh lekat kingeng ihambe de ketige tapi naipet kek lei luka ru naipej kek nu luar selai. 13Lalu tuan selai ajeh kiurok, ‘Ma de patot ngbeh? Bor ngngeng kenon haknok eng. Tentu doh naihormat ha kek.’ 14Tapi bile mai de bepajak iselai ajeh naineng ha kenon tuan selai ajeh, naibelwal ratak liknai, ‘Adeh ilei wares tuan selai. Bei hiperdat kek supaye hikep iselai.’ 15Lalu naipej kek nu luar selai anggor ajeh ru naiperdat kek.”

Telas Yesus Kicerite begei ajeh, Kek Kitanya, “Jadi, maloh doh de bibeh ya tuan selai nu mai de bepajak iselai ajeh? 16Tentu kek doh kihol nu iselai ru kiperdat mai de bepajak ajeh, ru iselai anggor ajeh doh kipajak nu mai kilek.”

Bile mai naicerngai tentang hal ajeh, naiurok, “Agokloh hal ajeh kitejadi!”

17Tapi Yesus teros Kineng nu enai ru Kiurok, “Jadi, ma imaksod engrok Alkitab adeh?

‘Batu de bipej ya tukang deg ya kijadi batu cenol.’#Mzm 118:22

18Bok imai de kiyog ku kemil batu ajeh doh kibekecai. Ru bok imai de bicertet ya batu ajeh doh kihempog.” 19Bile naicerngai Yesus Kicerite perumpamaan ajeh, guru-guru Hukom Taurat ru raknak-raknak imam agame Yahudi naipanei Yesus Kiurok tentang enai. Kerana ajeh, enai naikerekwat naikek care naiha-cap Yesus ku sarik jijeh juga. Tapi naisengoh ha mai ku pajeh.

Benayar Cukei nu Kerajaan

(Mat 22:15-22; Mrk 12:13-17)

20Jadi, enai betol-betol naicerimat ha Yesus. Naingeng memerip urag sengoi nu Yesus supaye naibepure-pure bor ru naipejerat Kek ya Ibengwal. Naibeh begei ajeh supaye dapat naien Kek nu penguasa lengrik ajeh untok bihukom. 21Sengoi-sengoi de bingeng ajeh naitanya nu Kek, “Guru, jipanei bengwal ru neajar Jen ajeh betol ru Jen pek Jenpeduli ha pangkat mai. Tapi Jenajar heknod Jenang ru benar. 22Amen hijoi Hukom Taurat, bulehka tok hibayar cukei nu raja kerajaan Rom?”

23Tapi Yesus Kipanei sengik nej enai ajeh, lalu Kek Kiurok nu enai, 24“Pernengloh nu Eng nukepeg duet perak. Wog ru ceknot bok mong ku pajeh?”

Naiberlag, “Raja kerajaan Rom.”

25Lalu Yesus Kiurok nu enai, “Amen begei ajeh, ogloh nu raja kerajaan Rom ma de patot engkeog nu raja kerajaan Rom, ru ogloh nu Jenang ma de patot engkeog nu Jenang!”

26Enai pek dapat naipejerat Kek ju Ibengwal ku ngar mai jengoi. Cengang empag enai naicerngai ha Iberenglag ajeh ru naikerakdik sengek.

Tenanya tentang Arik Kisnos Mai Dat

(Mat 22:23-33; Mrk 12:18-27)

27Mai Saduki#20:27 Mai Saduki: Adeh kirujok nu nanek kumpulan pemimpen-pemimpen agame Yahudi de naitentang ha Yesus. pek naipecaya mai de ya dat doh naikos nij. Memerip urag ju enai ajeh naihol nu Yesus ru naitanya, 28“Guru, entemjeh Nabi Musa kicot hukom adeh: ‘Amen numom keral kidat pek kibekenon, imenang hodloh kijeg balu itenek ajeh supaye itenek de ya dat ajeh kikep kenon-cenok.’#Ul 25:5

29Entemjeh mong tujoh urag tenek-menang. Ilei de sulog kijeg numom kerdor tapi kidat pek baibekenon. 30Lalu imenang kedue kijeg balu ajeh tapi kidat pek baibekenon. 31Hal de sama belaku nu imenang ketige lei nu de ketujoh. Enai betujoh ajeh naidat pek naibekenon. 32Ipenyudah kerdor ajeh pen kidat. 33Ku arik kisnos mai dat, kerdor ajeh doh kijadi kenah bok? Kerana, rimdij tujoh urag tenek-menang ajeh pernah naijadi gengsir kerdor de sama!”

34Yesus Kiberlag nu enai, “Ku dunia adeh, sengoi naibekenah-gengsir. 35Tapi ku dunia pigoi doh, sengoi de bianggap layak untok biberkos ju danan ru naikep sinui de lei ditehjeh doh pek naibekenah-gensir. 36Enai pek dapat naidat nij kerana enai begei ha malikat-malikat. Enai ajeh kekenon Jenang kerana enai ya biberkos ju danan. 37Ku kateh cerite semak bejerlak de der ya os, Nabi Musa ya kipasal tentang hal kisnos mai dat. Ku cerite ajeh Nabi Musa kicereg TUHAN ajeh ‘Jenang de bisembah ya Abraham, Ishak, ru Yakub.’#Kel 3:6 38Ju bengwal ajeh, hipanei tentang hal adeh: Nik urag de ya dat ajeh sebenarnye lekat sui ru lekat naisembah ha Jenang. Jenang ajeh apeka Jenang nu mai dat tapi nu mai sui, kerana ku Jenang dikdij mai lekat sui.”

39Memerip urag guru Hukom Taurat naiurok, “Guru, berenglag Jen ajeh betol.” 40Telas ajeh pek mong numom pen de berani naiha-betanya nu Yesus nij.

Yesus ru Raja Daud

(Mat 22:41-46; Mrk 12:35-37)

41Telas ajeh Yesus Kitanya nu enai, “Yama mai naiurok, ‘Peselamat de bijanji ya Jenang ajeh kenon-cenok Raja Daud’? 42Raja Daud sendiri de kiurok ku kateh kitab Mazmur begei adeh:

‘TUHAN ya Kiurok nu Tuhan eng:

Geiloh ku kedudukan de tehormat ku englag kentop Eng

43lei Ngpejadi musoh-musoh Hek nelapek jog Hek.’#Mzm 110:1

44Amen Raja Daud kicereg Peselamat ajeh ‘Tuhan,’ Peselamat ajeh mesti enyuk pek kenon-cenok Raja Daud.”

Yesus Kiog Amaran tentang Guru-guru Hukom Taurat

(Mat 23:1-36; Mrk 12:38-40)

45Mase dikdij mai tengah naicerngai ha Ibengwal, Yesus Kiurok nu Ipengikot-pengikot, 46“Bejaga-jagaloh nu guru-guru Hukom Taurat. Naigemar naicekcip nailog jubah cereg de bor. Enai juga naigemar amen sengoi-sengoi ku tempat kengnem naihormat ha enai. Bile naihol nu deg sembahyang atao ku tempat kenurik, naigemar gigei ku tempat ginei ha mai tehormat. 47Nailenglod balu-balu naiha-kot deg enai. Ku ngar mai jengoi, naibedoa cereg supaye enai bisangka alim. Enai doh naikep nehukom de paleng nyeh!”

Currently Selected:

LUKAS 20: AEH

Highlight

Copy