LUKAS 23

Yesus Bisoal ya Pilatus

(Mat 27:1-2, 11-14; Mrk 15:1-5; Yoh 18:28-38)

1Lalu dikdij anggote Mahkamah Agame Yahudi ajeh naikos ru naien Yesus nu ngar penguasa lengrik Yudea imuh Pilatus. 2Ku pajeh mula naitudoh Yesus ru naiurok, “Sengoi adeh Kiperikroj bangse jik. Kihasot mai jengoi supaye pek naibayar cukei nu raja kerajaan Rom, ru Kiaku Ilei ajeh numom Raja ru Peselamat de bijanji ya Jenang.”

3Pilatus kitanya nu Yesus, “Hek adeh raja mai Yahudika?”

Yesus Kiberlag, “Kena begei bengwal hek ajeh.” 4Lalu Pilatus kiurok nu raknak-raknak imam agame Yahudi ru nu mai jengoi, “Eng pek ngbakek ma-ma pen senalah ku Sengoi adeh.”

5Tapi maken naidesak ru naiurok, “Kek Kihasot dikdij mai ku seluroh lengrik Yudea ya Ineajar supaye naimemberontak. Kimula ju lengrik Galilea leiloh nu madeh!”

Yesus Bisoal ya Raja Herodes Antipas

6Telas kicerngai hal ajeh, Pilatus kitanya, “Adehka Ilei mai ju lengrik Galilea?” 7Bile Pilatus kipanei Yesus ajeh Kihol ju lengrik Galilea, kek kior Yesus bien nu Raja Herodes Antipas kerana lengrik ajeh teletak ku kawasan de biperintah ya Raja Herodes Antipas. Ku mase ajeh, Raja Herodes Antipas juga mong ku kote Yerusalem. 8Kek ihad kikerakmik bile kiburuk Yesus kerana ya liu kicerngai ha gah Yesus ajeh ru kibeharap dapat kineng Yesus Kibeh tanda ajaib. 9Kek jeoi kitanya tapi Yesus pek Kijawab. 10Raknak-raknak imam agame Yahudi ru guru-guru Hukom Taurat de mong ku pajeh naikerekwat naitudoh Yesus ya tenudoh de nyeh. 11Raja Herodes Antipas ru iaska-aska nainyeh ru naihina ha Yesus. Naiperlog jubah de bor nu Yesus lalu naiperjog Kek nu Pilatus. 12Canukjeh Pilatus ru Raja Herodes Antipas baibemusoh tapi ku arik ajeh ya baibekawat.

Yesus Bihukom Dat

(Mat 27:15-26; Mrk 15:6-15; Yoh 18:39–19:16)

13Lalu Pilatus kikumpol raknak-raknak imam agame Yahudi, pemimpen-pemimpen, ru mai jengoi, 14ru kiurok nu enai, “Engkeen Sengoi adeh nu eng ru engkeurok Kiperikroj bangse engkek. Sengoi adeh ya ngsoal ku ngar liengkek tapi pek ngbakek ma-ma pen senalah begei de engketudoh ajeh. 15Raja Herodes Antipas juga pek kibakek ma-ma pen senalah ku Sengoi adeh. Kerana ajehloh, kiperjog Sengoi adeh nu jik. Kek pek Kibeh ma-ma pen senalah lei patot bihukom dat. 16Jadi, doh ngor aska-aska nairempet Kek ru telas ajeh naiterlas Kek.” [ 17Ku jap Arik Raya Paskah, biasajeh Pilatus kiterlas numom sengoi de bijel.]#23:17 Ayat adeh pek mong ku kateh memerip salinan Alkitab manah. 18Tapi, mai jengoi ku pajeh sama-sama naisurag, “Perdat Kek! Terlas Barabas ha jik!” 19(Barabas ajeh bijel kerana kimemberontak ku kote Yerusalem ru kiperdat mai.)

20Pilatus kibelwal nij nu mai jengoi ajeh kerana kaha-terlas Yesus. 21Tapi mai jengoi naisurag, “Saleb Kek! Saleb Kek!”

22Lalu ku inik kali Pilatus kiurok nu enai, “Ma senalah Kek? Pek ngbakek ma-ma pen Isenalah lei Kek patot biha-hukom dat. Jadi, eng doh ngor aska-aska nairempet Kek ru telas ajeh naiterlas Kek.”

23Tapi mai jengoi teros naikerekwat ru naidesak Pilatus supaye kisaleb Yesus. Ipenyudah, enai pen naimenang. 24Lalu Pilatus kipejatoh nehukom dat nu Yesus kijoi heknod enai. 25Begei de naisemanj, kek pen kiterlas Barabas de bijel kerana kimemberontak ru kiperdat mai. Telas ajeh Pilatus kiserah Yesus nu aska-aska supaye naibeh nu Yesus ma de bihod ya mai jengoi.

Yesus Bisaleb

(Mat 27:32-44; Mrk 15:21-32; Yoh 19:17-27)

26Mase aska-aska naien Yesus, ku semakdek nong naiterhan numom sengoi imuh Simon ju kote Kirene. Kek kihol ju kampug ru pai kimuj nu kateh kote Yerusalem. Naipaksa kek kigulap jehuk kalag Yesus ru kicip ku celod Yesus.

27Jeoi mai naijoi Yesus, temasok kekerdor de naisedeh ru naipanjap. 28Yesus Kiceleg ru Kiurok nu kekerdor ajeh, “Kekerdor Yerusalem, wesloh agok jap ha Eng. Japloh ha diri liengkek sendiri ru ha kekenon liengkek. 29Kerana, doh hol imase bile mai naiurok, ‘Kekerdor de pek makok, de pek perikyos, ru de pek naiperemmem sanget, enai ajeh kekerdor de biberkat!’ 30Ku mase ajeh, sengoi doh naiurok nu lod-lod entoi, ‘Certetloh jik!’ ru doh naiurok nu lod-lod macot, ‘Berceploh jik!’#Hos 10:8; Why 6:16 31Kerana, amen nu Eng de pek besalah pen bibeh begei adeh, tentu lebeh terok nij doh de tejadi nu engkek mai Yerusalem.”

32Mong nar mom mai jehat de bihukom dat besama ru Yesus. 33Bile ya lei nu tempat imuh Tarong Kui, ku pajeh Yesus bisaleb besama ru ubai ajeh. Numom ku Ikentop ru numom nij ku Ikengwil. 34Yesus Kiurok, “Menek, amponloh enai kerana pek naipanei ma de naibeh adeh.”

Aska-aska naibecabot undi untok naibahagi leknog Yesus ratak liknai.#Mzm 22:19 35Mai jengoi ku pajeh naijinjeg ru naineng hal ajeh. Pemimpen-pemimpen mai Yahudi nainyeh Kek. Naiurok, “Kek ya Kipeselamat mai kilek. Amen Kek ajeh betol-betol Peselamat de bijanji ya Jenang, ru amen Kek ajeh Sengoi de bipileh ya Jenang, biarloh Kipeselamat Diri Ilei Sendiri!”#Mzm 22:8

36Aska-aska juga nainyeh ha Yesus. Naiperek nu Kek ru naiog teu wain de ya keer nu Kek,#Mzm 69:22 37ru naiurok, “Amen Hek raja mai Yahudi, peselamatloh diri LiHek sendiri!”

38Ku kemil kui Yesus mong papat de bipahat ku jehuk kalag. Ku papat ajeh bicot, “Adehloh Raja mai Yahudi.”

39Numom ju mai jehat de bisaleb ku pajeh kihina ha Yesus. Kiurok, “Haurok Hek Peselamat de bijanji ya Jenang, jadi peselamatloh diri LiHek sendiri ru jar juga!”

40Tapi lagi numom nij mai jehat kimor ha kek. Kiurok, “Pek hasengohka ha Jenang? Hek pen haterima nehukom dat begei Kek! 41Nehukom har adeh mimang kena ru senalah de ya harbeh. Tapi Kek adeh pek Kibesalah.” 42Teros kiurok nij, “Yesus, ingatloh eng bile Jen mula Jenmemerintah sebegei Raja.”

43Yesus Kiberlag, “Cerngailoh abor, ku arik adeh hek doh mong besama ru Eng ku serga.”

Danan Yesus

(Mat 27:45-56; Mrk 15:33-41; Yoh 19:28-30)

44Lebeh kurang ku tengah arik, iarik kisengur ku seluroh lengrik lei nu pukol tige dui 45kerana mat arik ya pek kibecahaya. Tirei de kikerlag Bilek de Ihad Suci ku kateh Deg Jenang kitateg lei kijadi nar henglei.#Kel 26:33 46Telas ajeh Yesus Kicereg kuat, “Menek, Ngserah kelog Eng nu kateh teg Jen!” Lalu Kek pen Kitawes.#Mzm 31:6

47Bile raknak aska Rom kibakek ma de tejadi ajeh, kek kipateh ha Jenang ru kiurok, “Kek adeh mimang Sengoi de benar ku mat Jenang!”

48Dikdij mai de bekumpol ku pajeh ru nengneng ma de tejadi ajeh naijog nu madeg sambel naipet ha enteh enai kerana naimenyesal. 49Dikdij mai de naikenal ha Yesus temasok kekerdor de naijoi Yesus ju lengrik Galilea naijinjeg ju kennyak ru naineng dikdij hal ajeh.#Luk 8:2-3

Yesus Bicop

(Mat 27:57-61; Mrk 15:42-47; Yoh 19:38-42)

50-51Mong numom sengoi imuh Yusuf. Kek kibeasal ju pekan Arimatea ku lengrik Yudea. Kek ajeh sengoi de bor ru benar. Kek tengah kipimpoj ha imase Jenang Kimemerintah sebegei Raja. Hamapen kek numom ju anggote Mahkamah Agame Yahudi, tapi kek pek kibesetuju ru keputusan ru bahneh mahkamah ajeh. 52Kek kiet nu Pilatus ru kisemanj mayat Yesus. 53Bile ya biog, kek pen kicerleh mayat Yesus ju saleb ru kibalot mayat ajeh ya abat benalot mai dat. Telas ajeh kidek mayat Yesus ku kateh penep de bikurek ku lod batu. Penep ajeh pai ru pek pernah mong mayat laen de bidek ku pajeh. 54Mase ajeh dui Jumaat, ajehloh arik Sengyap, ru arik Sabat#23:54 Arik Sabat: Arik Sabat kimula dari dui Jumaat lei nu dui Sabtu. ya kaha-mula.

55Kekerdor de naihol ju lengrik Galilea besama ru Yesus naijoi ha Yusuf ajeh. Enai naineng ha penep ajeh ru naineng juga begeiharok mayat Yesus bidek ku kateh penep ajeh. 56Telas ajeh naijog nu madeg ru naisedia rempah ru minyak wangi ha mayat Yesus. Tapi naiberihat ku arik Sabat untok naitaat nu Hukom Taurat.

Currently Selected:

LUKAS 23: AEH

Highlight

Copy