LUKAS 19

Yesus ru Zakheus

1Yesus Kimuj nu pekan Yerikho ru Kilalu pekan ajeh. 2Ku pajeh mong numom ketue pengutep cukei de kaya imuh Zakheus. 3Kek ihad kaha-guneng Yesus ajeh bok, tapi pek dapat kibakek kerana mong ihad jeoi mai ru ilei ajeh patik. 4Kerana ajeh, kijar canuk lalu kihuj nutarek keneng are supaye dapat kibakek Yesus kerana Yesus doh Kilalu nu majeh. 5Bile Yesus Kilei ku pajeh, Kiceog nu kemil ru Kiurok nu Zakheus, “Zakheus, celeh deras! Ku arik adeh Eng mesti Ngha-bet ku deg hek.”

6Zakheus deras kiceleh ru kikerakmik kisamut ha Yesus. 7Dikdij mai de nengneng hal ajeh mula naibeluunj, “Sengoi adeh Kiet Kaha-bet ku deg mai bedosa!”

8Tapi Zakheus kijinjeg ru kiurok nu Tuhan, “Tuhan, cerngailoh! Eng doh ngog engleg ju harta eng nu mai hajap. Bok-bok taleh de pernah ngtipu, doh ngperjog balek empat kali gande!”

9Tuhan Kiurok, “Ku arik adeh, Jenang ya Kipeselamat peringak adeh kerana sengoi adeh juga kenon-cenok Abraham. 10Eng Kenon Manusia Nghol Ngha-kek mai de rikroj ru Ngha-peselamat enai.”#Mat 18:11

Perumpamaan tentang 10 Urag Hambe de Biog Duet

(Mat 25:14-30)

11Sementare sengoi-sengoi lekat naicerngai Yesus Kibelwal, Yesus Kicerite nanek perumpamaan adeh kerana Kek ya Kaha-merek nu kote Yerusalem ru mai jengoi naisangka imase ha Kek Kimemerintah sebegei Raja doh segera kihol. 12Kerana ajeh, Yesus Kiurok, “Numom bangsawan kiet nu lengrik de nyak biha-tabal kijadi raja, ru telas ajeh kijog nij. 13Sebelom kiet, kicereg 10 urag ihambe lalu kiog nu jap penumom duet de inilei sama begei gaji nik gencek kerakjak. Kek kiurok, ‘Jelwalloh guna duet adeh lei ngjog doh.’ 14Tapi sengoi-sengoi ku lengrik ajeh naigetek ha kek. Jadi, telas kek kicip, enai naingeng sengoi-sengoi utusan untok naipasal, ‘Jik jinyek kek kijadi raja jik!’

15Tapi sengoi ajeh bipejadi raja ru kek pen kijog nu ilengrik ru teros kicereg dikdij ihambe de ya naiterima duet ju kek supaye kipanei ineuntong de naikep. 16Ihambe de petame kihol ru kiurok, ‘Tuan, ju duet de jenog, ineuntong ngkep 10 kali gande.’ 17Tuan ajeh kiurok, ‘Hek hambe de bor! Kerana hek setie nu kerjak de macot, eng ngpejadi hek pemerintah ku 10 kote.’ 18Ihambe de kedue kihol ru kiurok, ‘Tuan, ju duet de jenog, ineuntong ngkep lima kali gande.’ 19Tuan ajeh kiberlag nu ihambe ajeh, ‘Eng ngpejadi hek pemerintah ku lima kote.’ 20Telas ajeh hambe de kilek kihol ru kiurok, ‘Tuan, adeh duet jen. Eng ngdek duet adeh ku kateh abat. 21Eng ngsengoh ha jen kerana enjen kejam. Jenkot ma de pek hak jen ru jenkej ma de pek jencet.’ 22Tuan ajeh kiurok, ‘Hek hambe de jehat! Eng doh nghukom hek ngjoi bengwal lihek sendiri! Ya hapanei eng adeh sengoi kejam de ngkot ma de pek hak eng ru ngkej ma de pek ngcet. 23Amen begei ajeh, yama pek hadek duet eng ajeh ku kateh beng supaye bile ngjog, eng buleh ngterima balek duet eng ajeh ru ibunga sekali?’ 24Telas ajeh tuan ajeh kiurok nu sengoi-sengoi kilek de jinjeg ku pajeh, ‘Kot duet ju kek ajeh ru og nu hambe de kikep ineuntong 10 kali gande.’ 25Naiurok, ‘Tuan, kek ya mong ineuntong 10 kali gande!’ 26Tuan ajeh kiberlag, ‘Cerngailoh, sengoi de naiguna bor ma de biog nu enai, nu kek doh biog lebeh jeoi nij. Tapi sengoi de pek naiguna bor ma de biog nu enai, ma de mong ku enai pen doh bikot.#Mat 13:12; Mrk 4:25; Luk 8:18 27Hunen, en nu madeh musoh eng de nainyek ngjadi raja enai. Perdatloh rimdij liknai ku ngar eng!’ ”

Yesus Kimuj nu Kote Yerusalem

(Mat 21:1-11; Mrk 11:1-11; Yoh 12:12-19)

28Telas Yesus Kicerite perumpamaan ajeh, Kek Kicip canuk Kialak nu kote Yerusalem. 29Bile Yesus ya Kaha-merek nu kampug Betfage ru kampug Betania ku Lod Zaiton, Kek Kior nar mom Ipengikot baicip canuk. 30Kiurok nu ubai, “Etloh nu kampug de mong ku ngar hik adeh. Bile jerkemuj nu majeh doh, jerkek doh jerkebakek nuikor kenon keldei de biseg ru de pek pernah bitebot ya mai. Terlasloh ru enloh keldei ajeh nu madeh. 31Amen mong mai betanya nu jerkek yama jerketerlas keldei ajeh, urokloh, ‘Bihod ya Tuhan.’ ”

32Rimnar Ipengikot ajeh pen baiet ru dikdij hal tejadi begei de bipasal ya Yesus. 33Tengah baiterlas kenon keldei ajeh, ituan kiurok nu ubai, “Yama jerketerlas keldei ajeh?”

34Ubai berlag, “Bihod ya Tuhan.” 35Lalu, ubai pen baien kenon keldei ajeh nu Yesus. Bailapek kenog keldei ajeh ya jubah liubai ru baiterbot Yesus nu ikemil. 36Mase Yesus Kitebot keldei ajeh, mai jengoi nailai jubah liknai ku kemil nong.

37Bile Yesus ya Kaha-merek nu cenaret Lod Zaiton, jeoi Ipengikot mula naibesuka ru naipateh ha Jenang ru suara de kuat kerana ya naineng dikdij tanda ajaib. Naiurok,

38“Semoge Raja de Kihol sebegei wakel TUHAN biberkat!

Semoge mong damei ku serga ru semoge Jenang bipateh!”#Mzm 118:26

39Lalu memerip urag mai Farisi de mong ku engkap mai jengoi naiurok nu Yesus, “Guru, tegorloh pengikot-pengikot Jen supaye naikerakdik sengek!”

40Yesus Kiberlag, “Cerngailoh, amen naikerakdik sengek, batu-batu adehloh doh de naibesurag!”

Yesus Kijap ha Kote Yerusalem

41Bile Yesus ya gumaken rek nu kote Yerusalem, Kek Kineng ha kote ajeh ru teros Kijap. 42Kiurok, “Ihad yayak engkek mai kote Yerusalem! Eng Ngbeharap engkepanei icare engkeha-bedamei ru Jenang hunen. Tapi pek mungken engkepanei hal ajeh hunen! 43Imase doh lei bile musoh engkek naibeh penghadang ku sekelileg engkek ru naiperip engkek ju dikdij alak. 44Enai doh naipebinasa dikdij liengkek de gigei ku pajeh. Pek mong nanek batu pen de doh terwes besusot ku itempat.#Mat 24:2; Mrk 13:2; Luk 21:6 Dikdij hal ajeh doh kitejadi kerana engkek pek engkecam Peselamat de bingeng ya Jenang nu engkek!”

Yesus Kimuj nu Laman Deg Jenang

(Mat 21:12-17; Mrk 11:15-19; Yoh 2:13-22)

45Yesus Kimuj nu laman Deg Jenang ru mula Kiperet dikdij mai jelwal ku pajeh. 46Kiurok, “Ku kateh Alkitab, Jenang Kiurok, ‘Deg Eng doh bigelar deg doa.’ Tapi engkepejadi tempat adeh ‘tempat kenumpol mai siksij’!”#Yes 56:7; Yer 7:11

47Jap arik Yesus Kibeajar ku kateh laman Deg Jenang. Raknak-raknak imam agame Yahudi, guru-guru Hukom Taurat, ru pemimpen-pemimpen mai Yahudi naiha-perdat Kek. 48Tapi enai pek mong peluang kerana mai jengoi sentiase naicerngai ha engrok Kek. Naisengoh mai jengoi doh naimemberontak amen naicuba perdat Kek.

Currently Selected:

LUKAS 19: AEH

Highlight

Copy