LUKAS 18
18
Perumpamaan tentang Numom Hakem ru Numom Balu
1Telas ajeh Yesus Kicerite perumpamaan adeh nu Ipengikot-pengikot kerana Kaha-ajar enai hod selalo naibedoa ru pek naibeputos ase. 2Kiurok, “Ku nanek pekan mong hakem de pek kisengoh ha Jenang ru pek kipeduli ha bok-bok pen. 3Ku pekan ajeh juga mong numom balu de selalo kihol nu hakem ajeh ru kisemanj, ‘Tulogloh bernang eng ju musoh eng.’ 4Memerip iluniu hakem ajeh pek kiirau ha balu ajeh, tapi ipenyudah kiurok ku kateh isengik, ‘Hamapen eng pek ngsengoh ha Jenang ru pek ngpeduli ha bok-bok pen, 5tapi ha kerana balu adeh selalo kikacau ha eng, lebeh bor ngbernang kek supaye pek teros kikacau eng.’ ”
6Lalu Tuhan Kiurok, “Cerngailoh ma de biurok ya hakem de pek adel ajeh. 7Amen hakem de pek adel ajeh pen kibernang ha balu ajeh, tentu Jenang doh Kibernang Isengoi-sengoi de ya Kipileh. Kek doh Kibernang Isengoi-sengoi de kelem yah naicereg nu Ilei. Kek doh pek lingah Kiog Itenulog nu enai. 8Cerngailoh, Jenang ajeh doh deras Kibernang enai. Tapi, bile Eng Kenon Manusia Nghol nij, doh susah Ngha-bakek mai de beiman ku bumi adeh.”
Perumpamaan tentang Mai Farisi ru Pengutep Cukei
9Yesus Kicerite perumpamaan adeh nu sengoi-sengoi de naianggap diri liknai benar ku mat Jenang, tapi naihina ha mai kilek. 10Yesus Kiurok, “Mong nar mom baiet nu laman Deg Jenang baiha-bedoa. Numom mai Farisi ru numom nij pengutep cukei. 11Mai Farisi ajeh kijinjeg kihalei ru kibedoa, ‘Jenang, eng ngbesyukor nu Jen kerana eng pek begei mai de neksiknij, de neklennon, de bezinah, atao begei pengutep cukei ajeh. 12Ngpuase nar kali seminggu ru ngog pesepulohan ju dikdij ma de ngkep.’
13Tapi pengutep cukei ajeh kijinjeg nyak ru pek kiberani kaha-ceog nu kemil. Kipet ienteh ru kiurok, ‘Jenang, yayakloh eng mai de bedosa.’
14Ngurok nu engkek, bile ubai ajeh baijog nu madeg, Jenang Kiterima pengutep cukei ajeh sebegei sengoi de ya kijadi benar ku mat Ilei, tapi mai Farisi ajeh tok. Kerana, bok imai de kipetinggi idiri doh biperendah, ru bok imai de kiperendah idiri doh bipetinggi.”
Yesus Kiberkat Kekenon Sanget
(Mat 19:13-15; Mrk 10:13-16)
15Mong memerip urag sengoi naien kekenon sanget nu Yesus supaye Kidek Iteg ru Kiberkat ha enai. Bile Ipengikot-pengikot naineng hal ajeh, nairok sengoi-sengoi ajeh. 16Tapi Yesus Kicereg sesanget ajeh hol nu Ingar ru Kiurok, “Agokloh get enai. Biarloh sesanget ajeh naihol nu Eng kerana mai begei enai ajehloh de naijadi sengoi-sengoi de biperintah ya Jenang sebegei Raja. 17Cerngailoh abor! Mai de kiaku Jenang ajeh iRaja begei ha sikap numom sanget, had kek taleh de dapat kijadi sengoi de biperintah ya Jenang sebegei Raja.”
Hal Mai Kaya
(Mat 19:16-30; Mrk 10:17-31)
18Numom pemimpen mai Yahudi kitanya nu Yesus, “Guru de bor, ma de patot ngbeh supaye ngkep sinui de lei ditehjeh?”
19Yesus Kiberlag, “Yama haurok Eng bor? Pek mong numom pen de bor, had Jenang Kihalei taleh. 20Tentu ya hapanei perintah Jenang: Agok bezinah, agok perdat mai, agok siksij, agok og kesaksian palsu, ru hormatloh keneng-menek hek.”#Kel 20:12-16; Ul 5:16-20
21Pemimpen ajeh kiberlag, “Dikdij hukom ajeh ya ngbeh sejak ngsanget.”
22Bile Yesus Kicerngai tentang hal ajeh, Kek Kiurok, “Mong nanek hal nij de patot habeh. Etloh jual dikdij harta hek ru ogloh duet ajeh nu mai hajap. Amen habeh begei ajeh, hek doh hakep harta ku serga. Telas ajeh beiloh joi Eng.” 23Bile kicerngai tentang hal ajeh, kek kirasa ihad sedeh isengik kerana kek ihad kaya.
24Yesus Kineng pemimpen ajeh kisedeh, jadi Kiurok, “Ihad susah mai kaya naiha-jadi sengoi-sengoi de biperintah ya Jenang sebegei Raja! 25Lebeh senang nuikor unte kimuj nu lubang jarop daripade mai kaya naijadi sengoi-sengoi de biperintah ya Jenang sebegei Raja.”
26Mai de naicerngai ha engrok Yesus ajeh naitanya, “Amen begei ajeh, bokka de dapat bipeselamat?”
27Yesus Kiberlag, “Hal de pek dapat bibeh ya manusia, ya Jenang dapat.”
28Lalu Petrus kiurok nu Yesus, “Jik ya jiwes dikdij ma de mong ku jik jiha-joi Jen!”
29Yesus Kiurok, “Cerngailoh abor, bok imai de kidek ideg, ikenah, itenek-menang, ikeneng-menek, ataopen ikekenon kerana kaha-jadi sengoi de biperintah ya Jenang sebegei Raja, 30kek doh kikep ibenalas belipat gande de bor ku mase hunen, ru doh kikep sinui de lei ditehjeh ku jaman pigoi doh.”
Ku Inik Kali Yesus Kipasal tentang Idanan
(Mat 20:17-19; Mrk 10:32-34)
31Yesus Kiajak 12 urag Ipengikot nu ibeg ru Kiurok, “Hunen hiha-et nu kote Yerusalem. Ku pajeh doh tejadi dikdij hal de bicot ya nabi-nabi manah entem tentang Eng Kenon Manusia. 32Eng doh biog nu mai pek Yahudi ru enai doh nainyeh, naihina, ru naitoh ha Eng. 33Doh nairempet ru naiperdat Eng tapi ku inik arik doh Ngkos nij ju danan LiEng.”
34Tapi Ipengikot-pengikot gek pen pek naireti ha Imaksod. Imaksod ajeh bikerdik ju enai, jadi pek naireti ma de Kiurok.
Yesus Kiperbor Numom Mai Buta ku Pekan Yerikho
(Mat 20:29-34; Mrk 10:46-52)
35Mase Yesus ya Kaha-merek nu pekan Yerikho, mong numom mai buta kigei ku beg nong kisemanj duet. 36Mai buta ajeh kicerngai suara jeoi sengoi de nailalu ku pajeh, jadi kitanya, “Yama de renyah arok?”
37Naiberlag nu kek, “Yesus Mai Nazaret tengah Kilalu.”
38Lalu kek pen kicereg kuat, “Yesus Kenon-cenok Raja Daud, yayakloh eng!”
39Mai jengoi ku ngar Yesus nailes ha sengoi ajeh ru naior kikerakdik serakngek. Tapi, kicereg gulebeh kuat nij, “Kenon-cenok Raja Daud, yayakloh eng!”
40Yesus pen Kibehenti ru Kior mai naien mai buta ajeh nu Ilei. Bile mai buta ajeh bien nu Kek, Yesus Kitanya, 41“Ma de hahod Ngbeh ha hek?”
Mai buta ajeh kiberlag, “Tuhan, eng nghod ngha-nengneng.”
42Yesus Kiurok nu mai buta ajeh, “Nengnengloh! Hek ya habor kerana hapecaya nu Eng.”
43Ku sarik jijeh juga kek ya dapat kinengneng, lalu kijoi Yesus ru kipateh ha Jenang. Bile dikdij mai naineng hal ajeh, enai pen naipateh ha Jenang.
Currently Selected:
LUKAS 18: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
