LUKAS 17

Dosa ru Neampon Dosa

(Mat 18:6-7, 21-22; Mrk 9:42)

1Yesus Kiurok nu Ipengikot-pengikot, “Mimang mong hal-hal de kibeh mai naibedosa tapi celakaloh mai de kijadi ipunca! 2Lebeh bor batu kenisar de entoi bibeg ku itangen ru kek bipej nu laot daripade kibeh numom ju pengikot-pengikot Eng de bianggap pek penteng begei sanget adeh kibedosa. 3Jadi, bejaga-jagaloh!

Amen numom ju sesedara seiman engkek kibedosa nu engkek, tegorloh kek. Amen kibetobat, amponloh kek. 4Hamapen kibedosa nu engkek lei tujoh kali nuarik, amen jap kali kiulag urok nu engkek, ‘Eng ngbetobat,’ engkek hodloh engkeampon kek.”

Hal Iman

5Irasul-rasul naiurok, “Tuhan, pekuatloh iman jik.”

6Tuhan Kiberlag, “Amen engkek mong iman iteninoi mar numeknat mat sawi, engkek dapat engkeor keneng are adeh supaye kiraroj ru kipej ilei nu kateh laot, ru jehuk ajeh doh kijoi ernor engkek.”

Tanggongjawab Numom Pekerjak

7“Amen numom ju engkek mong ipekerjak de kigileg tik atao kijaga dombe, engkek pek engkeurok ‘Bei gei cakcak’ bile ya kijog ju ikerjak ajeh. 8Engkek doh engkeurok nu pekerjak ajeh, ‘Sedialoh caknak ha eng. Besedialoh ru layanloh eng mase tengah ngcakcak ru ngngekngut. Telas ajeh baruloh hek buleh hacakcak ru hangekngut.’ 9Ituan ajeh doh kibeterima kasehka nu ipekerjak ajeh kerana kibeh iernor? Tentuloh tok! 10Begei ajehloh juga nu engkek. Bile ya engkebeh dikdij tugas de bior, hodloh engkeurok, ‘Jik adeh pekerjak de pek layak bipateh kerana jik had jibeh tanggongjawab lijik taleh.’ ”

10 Urag Mai de Nyik Kuste

11Ku kateh Iceknip nu kote Yerusalem, Yesus Kijoi nong de ku sempadan antare lengrik Samaria ru lengrik Galilea. 12Mase Kimuj nu nanek kampug, 10 urag mai de nyik kuste naiterbuk nu Kek. Enai jinjeg ju kennyak 13ru naicereg kuat, “Yesus! Tuan! Yayakloh jik!”

14Mase Yesus Kineng ha enai, Kek Kiurok, “Et pernengloh diri liengkek nu imam-imam agame Yahudi.” Jadi enai pen naiet. Ku kateh ceknip enai ajeh nyaknik kuste enai ajeh kibor.#Im 14:1-32

15Bile numom ju enai ajeh kisedar ilei ya bor, kek kilos nij ru kipateh ha Jenang ru suara de kuat. 16Kek kikop ku ngar jog Yesus ru kibeterima kaseh nu Kek. Ilei ajeh mai Samaria. 17Yesus Kiurok, “Eng Ngkecewe kerana rimdij 10 urag ajeh ya naibor tapi lagi sembilan urag nij pek nailos. 18Had mai pek Yahudi adeh taleh de kilos balek nu madeh ru kipateh ha Jenang!” 19Lalu Yesus Kiurok nu sengoi ajeh, “Kosloh ru etloh! Hek ya habor kerana hapecaya nu Eng.”

Imase Jenang Kimemerintah Sebegei Raja

(Mat 24:23-28, 37-41)

20Memerip urag mai Farisi naitanya nu Yesus, “Bileka imase Jenang doh Kimemerintah sebegei Raja?” Yesus Kiberlag, “Imase Jenang Kimemerintah sebegei Raja pek dapat bineng ya mat. 21Engkek pek dapat engkeurok, ‘Neng, Kek Kimemerintah ku padeh!’ atao ‘Ku peteh!’ kerana Jenang Kimemerintah sebegei Raja ku engkap engkek.”

22Telas ajeh Yesus Kiurok nu Ipengikot-pengikot, “Doh hol imase engkebeharap engkeha-neng helnol Eng Kenon Manusia nij doh, tapi pek dapat engkeneng. 23Doh mai naiurok nu engkek, ‘Neng, Kenon Manusia ajeh mong ku peteh!’ atao ‘Ku padeh!’ Tapi agok et ru joi ha enai. 24Kerana, sama begei engkuk beriklaj de kisog seluroh langit ru bineng ya dikdij mai, begei ajehloh juga ha helnol Eng Kenon Manusia pigoi doh. 25Tapi Eng hod Ngkena canuk jeoi seniksa ru pek biterima ya sengoi jaman adeh.

26Begei de ya tejadi ku jaman Nabi Nuh, begei ajehloh juga doh de tejadi ku helnol Eng Kenon Manusia. 27Ku jaman Nabi Nuh ajeh, sengoi naicakcak, naingekngut, ru naibekenah-gengsir leiloh ku arik Nabi Nuh kimuj nu kateh bahtere, lalu teu beag kihol ru kiperdat dikdij enai. 28Hal de sama juga tejadi ku jaman Lot. Sengoi naicakcak, naingekngut, naibakli, naijelwal, naicekcet, ru naibeh deg. 29Tapi ku arik Lot kihol ju kote Sodom, os ru belerang bicerleh ju langit begei manik ru kiperdat dikdij enai.#Kej 19:1-29 30Begei ajehloh juga, manusia doh naisui begei biasa ru pek naibesedia ku arik helnol Eng Kenon Manusia.

31Ku arik ajeh, bok imai de tengah mong ku kemil pelog ru iharta mong ku kateh deg, agokloh celeh kaha-kot ha iharta ajeh. Begei ajehloh juga, sengoi de mong ku selai, agokloh los nij nu madeg untok kaha-kot ma-ma.#Mat 24:17-18; Mrk 13:15-16 32Ingatloh ma de tejadi nu kenah Lot!#Kej 19:26 33Bok imai de kihok ha inyawe, inyawe ajeh doh nyep. Tapi bok imai de kiog inyawe ha Eng, kek doh kikep sinui de lei ditehjeh.#Mat 10:39; 16:25; Mrk 8:35; Luk 9:24; Yoh 12:25 34Cerngailoh, ku kelem ajeh doh mong nar mom ku nanek tempat buknet. Numom doh bien ru numom doh biwes. 35Doh mong nar mom kerdor tengah baibegileg gandom. Numom doh bien ru numom doh biwes. [36Doh mong nar mom keral tengah baibeselai. Numom doh bien ru numom doh biwes.]”#17:36 Ayat adeh pek mong ku kateh memerip salinan Alkitab manah.

37Enai naitanya nu Yesus, “Guru, ku belokka hal ajeh doh kitejadi?”

Kiberlag nu enai, “Ku belok mong sok, ku pajeh juga mong cep de naicak sok. Begei ajehloh juga, ku belok Kenon Manusia Kihol, ku pajeh juga doh mong jeoi mai.”

Currently Selected:

LUKAS 17: AEH

Highlight

Copy