LUKAS 16

Perumpamaan tentang Penguros de Pek Jujor

1Yesus Kiurok nu Ipengikot-pengikot, “Numom mai kaya mong numom penguros de kijaga iharta. Mai kaya ajeh mong kicerngai iharta bipendak ya ipenguros ajeh. 2Jadi, mai kaya ajeh kicereg ipenguros ajeh ru kiurok, ‘Eng ngcerngai kelaku nej de habeh. Ogloh nu eng laporan lengkap tentang dikdij harta eng de hauros kerana hek pek buleh hajadi penguros harta eng nij.’

3Penguros ajeh kiserngik, ‘Ma de patot ngbeh? Tuan eng kaha-wes eng ju kerjak sebegei penguros iharta. Ngha-becangkol, pek nglalu. Gandakloh nij ngha-semanj sedekah, eng ngselsel. 4Eng mong akal ma ngha-beh. Amen ngbeh hal ajeh, telas kerjak eng biwes, doh mong mai de naiterima eng nu kateh deg enai.’ 5Telas kiserakngik begei ajeh, kek kicereg numom penumom dikdij mai de berikdes nu ituan. Kiurok nu sengoi de petame, ‘Merip haberikdes nu tuan eng?’ 6Sengoi ajeh kiberlag, ‘3,000 liter minyak zaiton.’ Penguros ajeh kiurok nu sengoi ajeh, ‘Adeh surat des hek, geiloh deras-deras ru tukar jadi 1,500 liter.’ 7Telas ajeh kek kitanya nu sengoi de kilek, ‘Merip des hek?’ Sengoi ajeh kiberlag, ‘30 tan gandom.’ Penguros ajeh kiurok nu kek, ‘Adeh surat des hek, tukar jadi 24 tan.’ 8Bile ituan kicerngai tentang hal ajeh, kek kipateh ha penguros de pek jujor ajeh kerana kek cerdeg. Sengoi dunia adeh lebeh cerdeg naiuros urusan liknai daripade sengoi de naisui ku kateh cahaya lau.”

9Yesus Kiurok nij, “Cerngailoh! Gunaloh kenaya dunia ha berkep kawat supaye bile kenaya dunia adeh nyep, engkek doh biterima nu kateh deg de kekal.” 10“Bok imai de setie ku hal de macot, kek juga kisetie ku hal de entoi. Bok imai de pek jujor ku hal de macot, kek juga doh pek jujor ku hal de entoi. 11Jadi, amen engkek pek setie ku hal kenaya dunia, Jenang doh pek Kipecaya engkek ku hal kenaya de sebenar ku serga. 12Amen engkek pek setie nu harta mai kilek, Jenang doh pek Kiog harta nu liengkek sendiri.

13Pek mong mai de dapat kijadi hambe nu nar tuan. Kek doh kigetek ilei de numom ru kihok ilei de kilek. Atao kek doh setie nu ilei de numom ru kihina ha ilei de kilek. Begei ajehloh juga nu engkek. Engkek pek dapat engkejadi hambe nu Jenang, juga nu duet.”#Mat 6:24

Amaran Kilek tentang Mai Farisi

(Mat 11:12-13; 5:31-32; Mrk 10:11-12)

14Bile mai Farisi naicerngai dikdij hal de biurok ya Yesus ajeh, nainyeh ha Kek kerana naigemar ha duet. 15Yesus Kiurok nu enai, “Ku ngar mai, engkek bekelaku begei mai benar tapi Jenang Kipanei sengik engkek. Ma de bipateh ya mai bigetek ya Jenang.

16Sebelom Yohanes Pembaptis kihol, Hukom Taurat Musa ru kitab nabi-nabi naipimpen mai supaye naibeh heknod Jenang. Telas Yohanes Pembaptis kihol, Gah Bor biperlei nu mai. Gah Bor ajeh kipasal begeiharok Jenang Kimemerintah sebegei Raja, ru jap-jap mai naibelawat naihod Jenang Kimemerintah enai. 17Tapi lebeh senang langit ru bumi adeh kijadi nyep daripade nanek titek pen bigit ju Hukom Taurat.#Mat 5:18

18Bok imai de kicerei ikenah lalu kijeg kerdor kilek, kek ya kibezinah. Begei ajehloh juga, keral de kijeg kerdor de ya kibecerei pen kibezinah juga.”#Mat 5:32

Mai Kaya ru Lazarus

19“Mong numom mai kaya de ileknog bor ru mahal. Isinui tiap arik mewah. 20Ru mong numom peminte sedekah imuh Lazarus. Iberog tebeg ya temak ru kek selalo kidak ku pintu deg mai kaya ajeh. 21Kek kicuag ru kibeharap nu capeh caknak de yog ju mije caknak mai kaya ajeh. Malah, mong cok de naihol naibej ha itemak.

22Telas ajeh peminte sedekah ajeh kidat ru bien ya malikat nu beg Abraham. Sengoi kaya ajeh pen kidat juga, lalu bicop. 23Kateh dunia mai dat, mai kaya ajeh kitanggong seniksa. Ju kennyak kek kineng nu kemil ru kibakek Abraham ru mong Lazarus ku ibeg. 24Jadi kicereg, ‘Abraham menek eng, yayakloh eng! Or Lazarus kicerlog imol jari nu kateh teu ru kiperserngij lentag eng kerana eng ihad tesiksa ku kateh os adeh.’

25Tapi Abraham kiberlag, ‘Bei, ingatloh! Hek ya hakep ma de bor mase hasui tapi Lazarus kikep sinui de nej. Hunen ku padeh kek kikep sennang tapi hek hakep seniksa. 26Lagipen, mong jurang antare hek ju jar lei mai ju englag adeh pek dapat naiet nu englag kenjeh, ru mai ju kenjeh pek dapat naihol nu madeh.’

27Sengoi kaya ajeh kiurok, ‘Amen begei ajeh, ngmerayu nu jen Abraham, orloh Lazarus kiet nu deg apak eng 28kerana eng mong lima urag beradek keral. Orloh Lazarus kiog amaran nu enai supaye pek naihol nu tempat seniksa adeh.’

29Tapi Abraham kiberlag nu kek, ‘Enai mong Hukom Taurat Musa ru kitab nabi-nabi. Sepatotjeh, naicerngai amaran ju kitab-kitab ajeh.’

30Tapi sengoi kaya ajeh kiurok nij, ‘Ajeh pek cukop, menek eng Abraham! Amen mong numom ju mai dat de kibalek sui nij ru kiet nu enai, ya tentu doh naibetobat.’

31Tapi Abraham kiberlag nu kek, ‘Amen pek naicerngai amaran ju Hukom Taurat Musa ru kitab nabi-nabi, doh pek naipecaya hamapen naineng sengoi kibalek sui ju idanan.’ ”

Currently Selected:

LUKAS 16: AEH

Highlight

Copy