KISAH 18

Paulus ku Kote Korintus

1Telas ajeh Paulus kidek ju kote Atena ru kiet nu kote Korintus. 2Ku pajeh kiburuk numom mai Yahudi imuh Akwila. Kek iasal ju lengrik Pontus. Akwila ru ikenah Priskila pai bailei ju lengrik Itali. Ubai baihol nu kote Korintus kerana raja kerajaan Rom imuh Klaudius kihalau dikdij mai Yahudi ju kote Rom. Paulus kisueg Akwila ru Priskila 3lalu kigei ku pajeh ru kikerjak besama ru ubai kerana ubai ajeh pen tukang bahbeh kemah begei ha Paulus. 4Jap arik Sabat, Paulus kibebincang ru sengoi de naibekumpol ku deg sembahyang kaha-beh mai Yahudi ru mai Yunani naipecaya nu Yesus.

5Telas Silas ru Timotius bailei ju lengrik Makedonia, Paulus kiguna dikdij imase kibeajar ru kibesaksi nu mai Yahudi tentang hal adeh: Yesus ajeh Peselamat de bijanji ya Jenang. 6Tapi nailawan ru naihina ha Paulus. Kerana ajeh, Paulus kitapes habok ju ileknog sebegei tanda amaran nu enai ru kiurok, “Amen engkek binasa, liengkek de betanggongjawab. Eng pek ngbetanggongjawab ku hal ajeh. Mula ju hunen eng ngha-et nu mai pek Yahudi.” 7Lalu Paulus kidek enai ru kiet nu deg englag ku englag deg sembahyang ajeh. Ajeh deg mai pek Yahudi de kisembah ha Jenang. Kek imuh Titus Yustus. 8Pemimpen deg sembahyang ajeh imuh Krispus. Kek ru dikdij iperingak naipecaya nu Tuhan. Jeoi mai kilek juga ku kote Korintus naicerngai neajar Paulus ru naipecaya nu Yesus lalu bibaptis.

9Ku nanek kelem, Tuhan Kiurok nu Paulus ku kateh nengneng, “Agokloh sengoh! Teros belwal ru agok behenti 10kerana mong jeoi mai ku kote adeh de doh naipecaya nu Eng. Pek mong numom pen de dapat pecedere hek kerana Eng Ngbesama ru hek.” 11Kerana ajeh, Paulus kigei ku kote Korintus iluniu nutahut setengah ru kibeajar engrok Jenang nu sengoi ku pajeh.

12Mase Galio kijadi penguasa ku lengrik Akhaya, mai Yahudi naibepakat lalu naicap Paulus ru naien kek nu ngar penguasa ajeh naiha-pecare Paulus. 13Naitudoh ru naiurok, “Sengoi adeh kaha-pengaroh mai jengoi supaye naisembah Jenang joi care de kilawan hukom agame Yahudi!”

14Bile Paulus kaha-berlag, Galio kiurok nu mai Yahudi ku pajeh, “Amen hal adeh tentang senalah atao tentang bahneh jehat, bulehloh ngbesabar ngcerngai ha penasal engkek ajeh. 15Tapi engkek bekelahi tentang neajar, tentang muh, ru tentang hukom liengkek. Kerana ajeh, hodloh engkepeselesei hal ajeh ya liengkek sendiri. Eng ngnyek pek ngha-pecare tentang hal begei adeh.” 16Lalu Galio kihalau enai nu luar. 17Telas ajeh sengoi-sengoi de bihalau ajeh naicap pemimpen deg sembahyang ajeh de imuh Sostenes lalu naipet kek ku ngar mahkamah. Tapi Galio langsong pek kibeirau tentang hal ajeh.

Paulus Kilos nu Kote Antiokhia

18Paulus kigei besama ru sesedara seiman ku kote Korintus memerip iluniu. Lalu kidek enai ru kibelayar besama ru ubai Priskila ru Akwila nu lengrik Syria. Sebelom kicip, Paulus kiloj isog ku kote pelabuhan Kengkrea untok kiperneng ijenanji nu Jenang ya dij kibeh. 19Bile nailei ku kote Efesus, Paulus kidek Priskila ru Akwila lalu kimuj kihalei nu deg sembahyang ru kibebincang ru mai Yahudi. 20Enai naisemanj Paulus kigei liu ku pajeh tapi Paulus kinyek. 21Tapi ku mase kaha-et, Paulus kiurok nu enai, “Amen ajeh heknod Jenang, pigoi doh nglos nij.” Telas ajeh kibelayar ju kote Efesus.

22Bile kilei ku kote Kaisarea, kek kipeteros iceknip nu kote Yerusalem kaha-perlei salam nu jemaah-jemaah ku pajeh lalu kiet nu kote Antiokhia ku lengrik Syria. 23Telas memerip iluniu kigei ku Antiokhia, kek kisueg lengrik Galatia ru lengrik Frigia kaha-pekuat iman dikdij pengikot Yesus ku pajeh.

Apolos Kibeajar ku Kote Efesus ru Kote Korintus

24Ku mase ajeh, numom Yahudi imuh Apolos de kiyos ku kote Aleksandria kilei nu kote Efesus. Kek panei kibelwal ru ihad kireti ha Alkitab. 25Kek ya biajar tentang Tuhan. Ku mase kibelwal, kek ihad besemangat ru ineajar tentang Yesus ajeh mimang tepat. Tapi mengenai hal benaptis, kek had kipanei ma de biajar ya Yohanes Pembaptis taleh. 26Ru berani kek mula kibelwal ku deg sembahyang. Bile Priskila ru Akwila baicerngai ha ibengwal, baien kek nu madeg. Ubai pen baipejelas ru lebeh tepat begeiharok Jenang Kipeselamat manusia melalui Yesus. 27Telas ajeh Apolos kaha-et nu lengrik Akhaya. Kerana ajeh, sesedara seiman ku kote Efesus naipegalak kek ru naicot nanek surat nu pengikot-pengikot Yesus ku lengrik Akhaya supaye naisamut Apolos. Telas Apolos kilei ku pajeh, kek betol-betol kitulog sengoi ku pajeh de naijadi mai pecaya ya bernor sengik Jenang. 28Ru ihad besemangat, Apolos kipealah mai Yahudi ku kateh ibengwal ku ngar mai jengoi. Kek kiguna ayat-ayat Alkitab kaha-pebukti tentang hal adeh: Yesus ajeh Peselamat de bijanji ya Jenang.

Currently Selected:

KISAH 18: AEH

Highlight

Copy