KISAH 19

Paulus ku Kote Efesus

1Mase Apolos kigei ku kote Korintus, Paulus kicip nu kawasan pendalaman lalu kilei nu kote Efesus. Ku pajeh kek kiburuk memerip urag pengikot Yesus. 2Kek kitanya nu enai, “Ya engketerimaka Kelog Santen mase engkepecaya nu Yesus?”

Naiberlag, “Pekseg. Jik pek pernah jicerngai mong Kelog Santen.”

3Paulus kitanya, “Amen begei ajeh, ru benaptis ma engkek bibaptis?”

Naiberlag, “Ru benaptis de biajar ya Yohanes Pembaptis.”

4Lalu Paulus kiurok, “Yohanes Pembaptis kibaptis sengoi de ya naibetobat ju dosa. Kek kior mai supaye naipecaya nu Sengoi de Kihol doh telas ilei. Kek ajehloh Yesus.”#Mat 3:11; Mrk 1:4, 7-8; Luk 3:4; 16; Yoh 1:26-27

5Telas naicerngai bengwal Paulus ajeh, enai bibaptis kateh muh Tuhan Yesus. 6Mase Paulus kidek iteg ku kemil kui enai, Kelog Santen Kiceleh nu enai lalu naibelwal kateh bebegei bahase ru naiperlei bengsat Jenang.#19:6 Naiperlei bengsat Jenang: Atao, benubuat. 7Jengoi enai kira-kira 12 urag keral.

8Selame nik gencek Paulus kiet nu deg sembahyang. Ru berani Paulus teros kibebincang ru sengoi-sengoi ku pajeh ru kikerekwat kipujok enai supaye naipecaya nu Jenang de Kimemerintah sebegei Raja. 9Tapi memerip urag ju enai lekat naigaleh pek naiha-joi ha neajar ajeh. Ku ngar mai jengoi naihina ru naibual nej tentang iman ru care sinui mai Kristian. Kerana ajeh, Paulus kidek enai. Kek kien pengikot-pengikot Yesus nu sekulah de bipimpen ya Tiranus. Ku pajeh, jap arik Paulus kibebincang tentang Yesus. 10Kek kibeh hal ajeh nar tenahut iluniu lei dikdij mai Yahudi ru mai pek Yahudi de gigei ku lengrik Asia naicerngai engrok Tuhan.

Kekenon Skewa

11Jenang Kiguna Paulus Kibeh tanda-tanda ajaib de ihad luar biasa. 12Amen saputangan atao apron de pernah bicap ya Paulus bien nu mai nyik, enai naibor ru nyanik-nyanik juga naihol ju enai. 13Mong juga mai Yahudi de naicip nu jap-jap tempat ru naiperet nyanik-nyanik de besangrog mai. Enai cuba naiha-peret nyanik-nyanik naiguna muh Tuhan Yesus. Naiurok nu nyanik-nyanik ajeh, “Eng ngperet engkek ku kateh muh Yesus de bipasal ya Paulus!” 14Tujoh urag kenon keral Skewa juga naibeh begei ajeh. Skewa ajeh numom raknak imam agame Yahudi.

15Tapi mong nuarik nyanik kiurok nu enai, “Eng ngkenal Yesus, Paulus pen ngkenal, tapi engkek bok?”

16Lalu sengoi de bisangrog ya nyanik ajeh kilumpat ru kijerop ihad besengngoh ru kipealah enai. Kek kikapaj ru kiteg leknog enai lei berog enai luka lalu naijar palak ju ideg. 17Dikdij mai Yahudi ru mai Yunani de naigei ku kote Efesus naisengoh bile naicerngai tentang hal ajeh. Kerana ajeh, muh Tuhan Yesus ya bigu-pateh. 18Jeoi sengoi de naipecaya nu Yesus naihol nu ngar mai jengoi ru naiaku ha jenghat de ya naibeh. 19Enai de biasa naipakei ilmu siher naicatuk bob-bob enai ru naitod dikdij ajeh ku ngar mai jengoi. Iregak rimdij bob ajeh kira-kira 50 ribu kepeg duet perak. 20Hal de tejadi ajeh kibeh engrok Tuhan ya gucep ru ipengaroh pen ya gukuat.

Kenacau ku Kote Efesus

21Telas hal ajeh belaku, Paulus kibeh keputusan kaha-et nu lengrik Makedonia, telas ajeh nu lengrik Akhaya, ru ipenyudah nu kote Yerusalem. Kiurok, “Telas nget nu majeh, eng hod nget nu kote Rom juga.” 22Kerana ajeh, Paulus kingeng nar mom ipembantu Timotius ru Erastus supaye baiet canuk nu lengrik Makedonia. Sementare ajeh, Paulus kigei gek nij iluniu ku lengrik Asia.

23Ku mase ajehloh, belaku kenacau de entoi ku kote Efesus kerana ha neajar tentang iman ru care sinui mai Kristian. 24Ku kote ajeh mong numom tukang perak imuh Demetrius de kigu-beh patong deg behala dewi Artemis. Kek ru tukang perak de kilek naikep hasel de entoi ju jengwal patong-patong ajeh. 25Kerana ajeh, kek kikumpol enai ru mai kilek de bahbeh kerenjak niaga de sama begei ha enai lalu kiurok, “Sesedara, ya engkepanei. Hik hikep kenaya ju kerenjak niaga hik. 26Hunen ya engkeneng ru engkecerngai ma de bibual ya Paulus ajeh. Kek kiurok begei adeh: Behala de bibeh ya teg manusia ajeh apeka dewe-dewe betol. Kek ya kipujok mai jengoi pek ku kote Efesus taleh tapi juga ku dikdij lengrik Asia. 27Ineajar ajeh bahaye kerana mai doh mula naibual nej tentang kerenjak niaga hik. Pek ajeh taleh, enai doh pek naihormat ha deg sembahyang dewi Artemis de agong ajeh. Dewi Artemis bisembah ya dikdij sengoi ku lengrik Asia ru seluroh dunia tapi ikeagongan doh nyep!”

28Bile naicerngai tentang hal ajeh, enai ihad naiberiknos ru mula naisurag, “Semoge Artemis dewi mai Efesus kijadi megah!” 29Kenacau ajeh ya gucep nu seluroh kote. Enai naicap Gayus ru Aristarkhus lalu naien ubai nu kateh stadium kote Efesus ajeh. Ubai ajeh mai Makedonia de baiperop ha Paulus nu Efesus. 30Paulus kaha-terbuk nu mai jengoi kaha-belwal nu enai tapi pengikot Yesus ku pajeh naiget ha kek. 31Memerip urag pegawei lengrik de naibekawat ru Paulus naibesat ru naimerayu nu kek supaye pek kimuj nu kateh stadium ajeh. 32Ku mase ajeh, mai jengoi de naibekumpol ku stadium ajeh naijadi kacau. Mong mai de naihai begei adeh ru mong juga de naihai begei ajeh. Jeoi mai ku pajeh pek naipanei yama naihol nu majeh. 33Mong numom mai Yahudi imuh Aleksander. Mong mai de naijulat kek nu ngar stadium supaye kek buleh kibelwal nu mai jengoi ajeh. Jadi, Aleksander kiog neuta ya iteg supaye mai jengoi naikerakdik serakngek. Kek kaha-pasal nu enai tentang hal adeh: Mai Yahudi pek betanggongjawab nu kenacau ajeh. 34Tapi bile naineng kek ajeh mai Yahudi, enai sama-sama naibesurag iluniu due jam begei adeh: “Semoge Artemis dewi mai Efesus kijadi megah!”

35Setieusehe kote ajeh kior mai jengoi ajeh naikerakdik sengek. Kek kiurok, “Mai Efesus! Dikdij mai ya naipanei tentang hal adeh: Efesusloh kote de bejaga deg sembahyang dewi Artemis de megah ru ipatong de jer ju langit. 36Dikdij mai ya naipanei hal ajeh betol. Kerana ajeh, kerakdikloh ru agok beh ma-ma de budoh. 37Engkeen ubai nu madeh hamapen pek baisiksij ku deg behala atao baihina ha dewi hik. 38Amen Demetrius ru tukang perak de kilek naiha-dakwe ha bok-bok, mong mahkamah ru hakem. Hodloh naien hal ajeh nu mahkamah. 39Amen mong masalah de kilek nij, hal ajeh hodloh bipeselesei kateh sidang mai Efesus de sah. 40Hik buleh bitudoh hibeh kenacau ya kerana pekare de belaku ku arik adeh. Amen hik bitudoh, hik doh pek dapat hijawab kerana pek mong besebab kenacau adeh kitejadi.” 41Telas kiurok begei ajeh, setieusehe kote ajeh kior naijog.

Currently Selected:

KISAH 19: AEH

Highlight

Copy