KISAH 16

Timotius Kijoi Paulus ru Silas

1Paulus ru Silas baipeteros ceknip ubai nu kote Derbe lalu nu kote Listra. Ku pajeh mong numom sengoi de kipecaya nu Yesus imuh Timotius. Iamek mai Yahudi de ya kipecaya nu Yesus tapi iapak mai Yunani. 2Dikdij mai de pecaya nu Yesus ku kote Listra ru kote Ikonium naipateh ha Timotius. 3Paulus kaha-en Timotius ru ilei. Tapi dikdij mai Yahudi ku daerah ajeh naipanei apak Timotius ajeh mai Yunani. Kerana ajeh, Paulus kisunat Timotius. 4Ku jap-jap kote de naicip, Paulus, Silas, ru Timotius naiperlei peraturan de ya bipetetap ya rasul-rasul ru pemimpen-pemimpen jemaah ku kote Yerusalem. Jemaah-jemaah binasihat supaye naijoi peraturan ajeh. 5Kerana ajeh, iman jemaah-jemaah ya gukuat ru jap arik jengoi jemaah gubetambah.

Paulus Kineng Nanek Nengneng ku Kote Troas

6Kelog Santen pek Kiog naiperlei engrok Jenang ku lengrik Asia#16:6 Asia: Ku jaman ajeh, Asia adeh kirujok nu kawasan Turki hunen., jadi enai pen naicip nu lengrik Frigia ru Galatia. 7Bile ya nailei ku sempadan lengrik Misia, naiha-kerekwat muj nu lengrik Bitinia tapi Kelog Yesus Kiget. 8Kerana ajeh, nailalu lengrik Misia ru teros naiet nu kote Troas. 9Ku kelem ajeh, Paulus kikep nanek nengneng begei adeh: Mong numom sengoi Makedonia kijinjeg ku ingar sambel kimerayu, “Holloh nu Makedonia ru tulogloh jik!” 10Telas Paulus kikep nengneng ajeh, jik#16:10 Jik: Jik ku padeh kirujok nu Paulus, Silas, Timotius, ru Lukas (de cekcot bob adeh). deras jisekyap jiha-et nu lengrik Makedonia kerana jiyaken tentang hal adeh: Jenang Kihod jiperlei Gah Bor nu sengoi-sengoi ku pajeh.

Lidia Kipecaya nu Jenang

11Jik jidek kote Troas lalu teros jibelayar nu Pulau Samotrake ru ku ihuper nu kote Neapolis. 12Ju kenjeh teros jiet nu kote Filipi. Filipi ajeh nanek kote de penteng ku lengrik Makedonia. Filipi juga biperintah ya kerajaan Rom. Ku pajeh jigei memerip arik. 13Ku arik Sabat jiet nu beg teu ku luar pintu kote kerana jiserngik ku pajeh mong tempat mai Yahudi naibedoa. Jigei ru jibelwal ru kekerdor de naibekumpol ku pajeh. 14Numom ju kekerdor ajeh imuh Lidia. Kek ajeh penjual abat ungu de mahal. Kek iasal ju kote Tiatira ru kisembah ha Jenang. Mase kek kicerngai ha engrok Paulus, Tuhan Kibuka ipeniker lei kiterima ha neajar Paulus. 15Telas Lidia ru iperingak bibaptis, kek kipakat jik nu imadeg. Kiurok, “Engkek ya engkepanei eng ngpecaya nu Tuhan, jadi beiloh gei ku deg eng.” Kek kikerekwat supaye jiet nu imadeg.

Paulus ru Silas Bijel ku Kote Filipi

16Ku nanek arik, mase jik jiet nu tempat mai Yahudi naibedoa, jibakek numom hambe kerdor de bisangrog ya nyanik de kipebuleh kerdor ajeh kiramal tentang hal nu ngar. Kerdor ajeh kiog neuntong de entoi nu ituan-tuan ju ineramal ajeh. 17Kerdor ajeh kijoi jik sambel kiurok ru suara de kuat, “Enai adeh hambe-hambe de melayani Jenang de Paleng Tinggi Ikedudukan! Naihol naiha-pasal begeiharok Jenang Kipeselamat engkek!” 18Ya memerip arik kerdor ajeh teros kibual begei ajeh lei Paulus kiberiknos lalu kiceleg ru kiurok nu nyanik ajeh, “Ru kuasa Yesus Kristus ngor hek hol ju kerdor adeh!” Ku sarik jijeh juga, nyanik ajeh pen kidek ju kerdor ajeh. 19Bile ituan-tuan naisedar ya pek buleh naikep duet begei entem, enai naicap Paulus ru Silas lalu naisaher ubai nu tempat kengnem nu ngar pihak bekuasa. 20Enai naien Paulus ru Silas nu hakem-hakem ru naiurok, “Ubai adeh mai Yahudi. Baibeh kenacau ku kote hik. 21Baiajar ha adat de sek menurot hukom hik. Hik mai Rom pek buleh hiterima atao hijoi ha adat ajeh!” 22Mai jengoi pen naitentang ha Paulus ru Silas.

Lalu hakem-hakem ajeh pen naior pegawei-pegawei naiceg penakei ubai ru naipet ubai ya tungkat. 23Telas ubai bipet jeoi kali, ubai bipermuj nu kateh jel. Ketue jel ajeh bior kijaga ketat ha ubai ajeh nek. 24Telas kiterima ernor ajeh, ketue jel ajeh kipermuj ubai nu bilek de paleng kateh ru kipasag pasong ku jog ubai.

25Kira-kira ku semakdek kelem, Paulus ru Silas baibedoa ru baidindang lagu pujian nu Jenang. Sengoi kateh jel ajeh naicerngai ha ubai. 26Aleh-aleh tik kibegegar ru ihad kuat lei deg jel ajeh kiyahyoh. Dikdij pintu jel kitebuka ru rantei bekneg ku jap-jap mai kitateg lalu dikdij sengoi naitelas. 27Ketue jel ajeh kikekjet ru kitejaga. Bile kibakek pintu-pintu jel ajeh dij tebuka, kek kisangka dikdij sengoi de bijel ajeh ya naijar. Kerana ajeh, kek kikot ipedang kaha-perdat ilei. 28Tapi Paulus kiurok ru ihad kuat, “Agok perdat lihek! Dikdij lijik lekat mong ku padeh!”

29Ketue jel ajeh kisemanj lampu lalu kijar nu kateh jel ru kikerog kisujod ku jog Paulus ru Silas. 30Telas ajeh kien hol ubai ajeh ru kiurok, “Tuan-tuan, ma de patot ngbeh supaye bipeselamat?”

31Paulus ru Silas baiberlag, “Pecayaloh nu Tuhan Yesus. Hek ru peringak hek doh bipeselamat!” 32Paulus ru Silas pen baiperlei engrok Tuhan nu ketue jel ajeh temasok nu dikdij sengoi de mong ku ipadeg. 33Ku kelem ajeh juga, ketue jel kikot ubai ru kisuj luka ubai. Lalu kek ru iperingak pen bibaptis. 34Telas ajeh kek kien Paulus ru Silas nu imadeg ru kiog ubai caknak. Kek ru iperingak ihad naikerakmik kerana naipecaya nu Jenang.

35Ku ipegelap huper, hakem-hakem ajeh naior pegawei-pegawei naiet nu jel ru naiperlei perintah supaye Paulus ru Silas biterlas. 36Ketue jel ajeh kipasal nu Paulus, “Ciploh abor kerana hakem-hakem ya naiog perintah supaye jerkek biterlas.” 37Tapi Paulus kiurok nu pegawei-pegawei ajeh, “Jar mai Rom!#16:37 Jar mai Rom: Wargenegare Rom pek buleh bihukom atao bijel amen pek bipeadel ku kateh mahkamah. Jar pek bipeadel ya hakem tapi bipet ku ngar mai jengoi ru bipermuj nu kateh jel. Hunen naior jaret serakngek! Jarnyek! Hakem-hakem ajeh sendiri hodloh naihol nu madeh ru naiireg jar hol.”

38Pegawei-pegawei ajeh nailapor hal ajeh nu hakem-hakem. Enai naisengoh bile naipanei Paulus ru Silas ajeh mai Rom. 39Kerana ajeh, naihol ru naisemanj maap. Lalu naien hol ubai ju jel ru naisemanj baidek ju kote ajeh. 40Paulus ru Silas baihol ju jel lalu baiet nu deg Lidia. Telas baiburuk sesedara seiman ku pajeh ru baipegalak ha enai, ubai pen baiet ju kenjeh.

Currently Selected:

KISAH 16: AEH

Highlight

Copy