KISAH 15

Benincang ku Kote Yerusalem

1Memerip urag ju lengrik Yudea naihol nu kote Antiokhia ku lengrik Syria ru mula naiajar mai de pecaya nu Yesus ku pajeh. Naiurok, “Engkek pek dapat bipeselamat amen engkek pek bisunat begei de ya biajar ya Nabi Musa.” 2Tapi Paulus ru Barnabas pek baisetuju ru baitentang ha neajar enai ajeh. Ipenyudah Paulus, Barnabas, ru memerip sengoi kilek bipileh supaye naiet nu kote Yerusalem untok naibebincang hal ajeh besama ru rasul-rasul ru pemimpen-pemimpen jemaah ku pajeh.

3Lalu jemaah-jemaah ku kote Antiokhia naingeng enai nu luar kote. Mase nailalu kawasan Fenisia ru lengrik Samaria, naipasal nu jemaah-jemaah ku pajeh begeiharok mai pek Yahudi ya naijadi pecaya nu Yesus. Gah adeh kibeh dikdij enai ihad naikerakmik. 4Bile nailei nu kote Yerusalem, enai bisamut ya jemaah-jemaah, rasul-rasul, ru pemimpen-pemimpen jemaah. Lalu Paulus ru Barnabas baipasal dikdij hal de ya bibeh ya Jenang melalui ubai. 5Tapi memerip urag mai Farisi de pecaya nu Yesus naijinjeg ru naiurok, “Mai pek Yahudi de pecaya nu Yesus hod bisunat ru hod naijoi Hukom Taurat Musa.”

6Rasul-rasul ru pemimpen-pemimpen jemaah naibekumpol naiha-bebincang hal ajeh. 7Telas ya liu naibebincang, Petrus pen kijinjeg ru kiurok, “Sesedara, tentu ya engkepanei tentang hal adeh: Jenang ya Kipileh eng entem ju engkap engkek ha perenglei Gah Bor nu mai pek Yahudi supaye enai pen buleh naicerngai ru naipecaya. 8Jenang de bepanei ha sengik manusia ya Kiog Kelog Santen nu mai pek Yahudi untok Kiperneng hal adeh: Kek ya Kiterima enai sama begei de Kiterima hik mai Yahudi entem. 9Jenang pek Kipileh kaseh antare mai Yahudi ru mai pek Yahudi. Kek Kiampon dosa enai kerana naipecaya. 10Amen begei ajeh, yama engkeha-tentang ha Jenang ru engkeog beban de nyeh nu mai pek Yahudi de pecaya ajeh? Jenang rak hik ru lihik sendiri pen pek sanggop hiha-joi dikdij Hukom Taurat! 11Agokloh beh begei ajeh! Hipecaya hik bipeselamat kerana Tuhan Yesus bor Isengik nu hik. Enai pen bipeselamat sama begei ha hik juga.”

12Dikdij sengoi de naibekumpol ku pajeh naikerakdik sengek. Enai naicerngai ju Barnabas ru Paulus tentang tanda-tanda ajaib ru hal-hal de luar biasa de bibeh ya Jenang melalui ubai ku engkap mai pek Yahudi. 13Telas ya dij baipasal, Yakobus pen kiurok, “Sesedara, cerngailoh! 14Simon Petrus ya kipasal nu hik begeiharok Jenang mula Kipileh sengoi-sengoi ju engkap mai pek Yahudi supaye naijadi hak Ilei. 15Hal ajeh kena begei de binubuat ya nabi-nabi. Naicot,

16‘Telas ajeh Eng doh Nglos nij

ru Ngbeh nij kerajaan Raja Daud de ya tateh.

Eng doh Ngterbor itenateh ajeh

ru Ngpuleh nij kerajaan ajeh

17supaye dikdij bangse kilek naikek ha Eng.

Eng doh Ngbeh hal ajeh supaye mai pek Yahudi de ya Ngcereg naijadi sengoi-sengoi Eng naikek ha Eng.’

18Begei ajehloh engrok Tuhan de ya kipasal tentang hal adeh manah entem.”

19Yakobus kipeteros ibengwal, “Ku peniker eng, hik pek patot hipesusah ha mai pek Yahudi de pecaya nu Jenang. 20Tapi, hik hod hicot surat nasihat nu enai supaye pek naicak caknak de ya bijamu nu behala, sej binatag de dat bicekeg, ru behip. Hodloh juga naipernyak diri liknai ju bahneh seks de niknej. 21Kerana, Hukom Taurat Musa biajar ku jap kote ru bibaca ku deg sembahyang ku jap-jap arik Sabat sejak entem.”

Surat nu Jemaah-jemaah Bangse Kilek

22Telas ajeh rasul-rasul, pemimpen-pemimpen jemaah, ru dikdij jemaah naibeh keputusan naiha-pileh memerip urag ku engkap liknai ajeh supaye naiet nu kote Antiokhia besama Paulus ru Barnabas. Lalu naipileh Silas ru Yudas de bisebot Barsabas. Ubai ajeh ihad bihormat ku engkap sesedara seiman. 23Nanek surat de iengrok begei adeh bikirep besama ru enai:

“Nu dikdij sesedara seiman mai pek Yahudi de gigei ku kote Antiokhia, lengrik Syria, ru lengrik Kilikia. Salam ju jik: Rasul-rasul, pemimpen-pemimpen jemaah, ru sesedara seiman ku padeh. 24Jik ya jicerngai gah adeh: Memerip urag ju jik naipesusah ru naipekeliru engkek ya neajar enai. Padehal jik pek jior naibeh begei ajeh. 25Kerana ajeh, dikdij lijik jibesetuju jipileh memerip urag ru jingeng enai nu engkek besama ru Barnabas ru Paulus de jihok. 26Ubai sanggop baitempeh bahaye ha Tuhan hik Yesus Kristus. 27Jik jingeng Yudas ru Silas. Ubai doh baipasal hal de sama begei de jicot kateh surat adeh. 28Kelog Santen ru jik jibeh keputusan untok pek jiha-pesusah engkek ya jeoi peraturan tapi jisemanj engkejoi ha memerip peraturan adeh taleh: 29Agokloh cak caknak de ya bijamu nu behala, behip, sej binatag de dat bicekeg, ru pernyakloh diri liengkek ju bahneh seks de niknej. Amen pek engkebeh dikdij hal ajeh, engkek ya engkebeh hal de betol. Had anen taleh. Abor!”

30Enai de bingeng ajeh naiet nu kote Antiokhia. Ku pajeh, naikumpol dikdij jemaah lalu naiperlei surat ajeh. 31Bile jemaah-jemaah naibaca surat ajeh, naikerakmik kerana surat ajeh kipegalak ha enai. 32Yudas ru Silas baibelwal liu baiha-pegalak ru baiha-pekuat ha enai. Ubai ajeh nabi. 33Telas baigei memerip iluniu ku pajeh, jemaah-jemaah ku kote Antiokhia naiberkat ubai supaye baijog ru neaman nu mai de ngengngeng ha ubai. [34Tapi Silas kibeh keputusan kaha-gei ku pajeh.]#15:34 Ayat adeh pek mong ku kateh memerip salinan Alkitab manah.

35Paulus ru Barnabas baigei memerip iluniu ku kote Antiokhia. Ubai ru mai jengoi de kilek naibeajar ru naiperlei engrok Tuhan besama.

Paulus ru Barnabas Baiceraklah

36Memerip iluniu ju kenjeh Paulus kiurok nu Barnabas, “Beiloh harsueg nij sesedara seiman ku dikdij kote de ya harperlei engrok Tuhan. Beiloh harneng begeiharok keadaan enai.” 37Barnabas kaha-en Yohanes de bisebot Markus 38tapi Paulus pek kibesetuju tentang hal ajeh kerana Markus pernah kidek ubai ku lengrik Pamfilia ru pek kibesama ru ubai mase baibeh tugas.#Kis 13:13 39Kerana ajeh, Paulus ru Barnabas baibekelahi ru ipenyudah baiceraklah. Barnabas kien Markus ru baibelayar nu Pulau Cyprus. 40Tapi Paulus kipileh Silas. Telas jemaah-jemaah ku kote Antiokhia naiserah Paulus ru Silas nu jenaga Tuhan, ubai pen baicip besama. 41Ubai baicip nu memerip tempat ku lengrik Syria ru lengrik Kilikia sambel baipekuat jemaah-jemaah ku pajeh.

Currently Selected:

KISAH 15: AEH

Highlight

Copy