KISAH 14

Paulus ru Barnabas Baibeajar ku Kote Ikonium

1Hal de sama belaku ku kote Ikonium. Paulus ru Barnabas baimuj nu deg sembahyang mai Yahudi ru baibeajar lei jeoi mai Yahudi ru mai Yunani naipecaya nu Yesus. 2Tapi mai Yahudi de nainyek pecaya nu Yesus naihasot ha mai pek Yahudi supaye naigetek ru naitentang ha mai de pecaya. 3Kerana ajeh, rasul-rasul baigei liu ku pajeh. Ubai berani baibelwal tentang hal adeh: Tuhan Kipeselamat manusia hamapen enai pek layak bipeselamat. Tuhan Kiog ubai kuasa baibeh tanda-tanda ajaib ru hal-hal de luar biasa. Ajehloh icare Tuhan Kipebukti bengwal ubai ajeh betol. 4Sengoi ku kote ajeh naiceraklah jadi nar kumpulan. Mong de naibepihak nu mai Yahudi ru mong juga de naibepihak nu rasul-rasul ajeh.

5Lalu mai Yahudi, mai pek Yahudi, ru pemimpen-pemimpen enai naibepakat naiha-aniaye ru naiha-pej batu naiha-perdat rasul-rasul ajeh. 6Bile rasul-rasul ajeh baipanei tentang hal ajeh, ubai pen baijar nu kote Listra, nu kote Derbe ku lengrik Likaonia, ru nu kawasan-kawasan sekelileg kote-kote ajeh. 7Ku pajeh juga baiperlei Gah Bor.

Paulus ru Barnabas Baiperlei Gah Bor ku Kote Listra

8Ku kote Listra mong numom keral de lumpoh ijog sejak kiyos ru kek pek pernah kicekcip. 9Sengoi ajeh kicerngai ku mase Paulus kibelwal. Paulus kineng ru kipanei sengoi ajeh dapat biperbor kerana kipecaya. 10Kerana ajeh, Paulus kiurok ru suara de kuat, “Jinjegloh hek!” Sengoi ajeh kilumpat kijinjeg ru mula kicekcip. 11Bile mai jengoi naineng ha bahneh Paulus ajeh, enai pen mula naiurok kuat ku kateh engrok Likaonia begei adeh: “Nengloh, dewe-dewe naijadi begei ha manusia ru naiceleh nu dunia!” 12Barnabas naisebot Zeus,#14:12 Zeus: Zeus ajehloh dewe penteng mai Yunani. Mai Yunani naipecaya Zeus ajeh kilindog ha enai. ru Paulus naisebot Hermes#14:12 Hermes: Hermes ajehloh kenon Zeus ru tukang belwal ha dewe-dewe kilek. Mai Yunani naipecaya kekloh dewe de kibeh mai naipanei belwal. kerana kek ajehloh de belwal. 13Ku luar kote, mong deg behala dewe Zeus. Imam deg behala ajeh kihol nu pintu gerbang kote kien memerip ikor lembu ibek ru kalong bunga. Kek ru mai jengoi naiha-pesembah korban nu rasul-rasul ajeh.

14Bile Barnabas ru Paulus baicerngai ma de baha-beh ya sengoi-sengoi ku pajeh, ubai pen baiceg leknog ubai lalu baijar nu semakdek mai jengoi sambel baihai, 15“Agok beh begei adeh! Jar pen manusia begei ha engkek! Jarhol nu madeh jarha-perlei Gah Bor nu engkek supaye engkewes behala de pek beguna ajeh ru engkesembah ha Jenang de sui de Kibeh langit, bumi, laot, ru dikdij ma de mong ku ikateh. 16Ku mase entem, Jenang Kibiar dikdij bangse naijoi heknod liknai memaseg. 17Tapi Jenang Kiog bukti-bukti nu engkek Kaha-perneng Ilei ajeh mimang mong. Kek Kiog manik ju langit ru hasel ju bumi ku imusem. Kek juga Kiog engkek caknak ru Kipesenang sengik engkek.” 18Hamapen Paulus ru Barnabas baiurok begei ajeh, ubai lekat susah baiha-get mai jengoi de naiha-pesembah korban nu ubai.

19Memerip urag mai Yahudi ju kote Ikonium ru ju kote Antiokhia ku lengrik Pisidia nailei nu kote Listra ru naipengaroh ha mai jengoi ku pajeh supaye naibepihak nu enai. Enai pej Paulus ya batu naiha-perdat kek lalu naisaher kek nu luar kote. Naisangka Paulus ya kidat. 20Tapi bile pengikot Yesus naikelileg Paulus, kek pen kikos lalu kilos nij nu kote. Ku ihuper nij, kek ru Barnabas baiet nu kote Derbe.

Paulus ru Barnabas Baikerlos nu Kote Antiokhia ku Lengrik Syria

21Ku kote Derbe, Paulus ru Barnabas baiperlei Gah Bor. Jeoi sengoi ku pajeh naijadi pengikot Yesus. Telas ajeh baikerlos nij nu kote Listra lalu baiet nu kote Ikonium ru nu kote Antiokhia ku lengrik Pisidia. 22Ku kote-kote ajeh, ubai baipekuat sengik pengikot-pengikot Yesus ru baipegalak enai supaye tetap naipecaya nu Yesus. Rasul-rasul ajeh baiurok, “Hik hod hiterima jeoi seniksa untok himuj nu serga de biperintah ya Jenang sebegei Raja.” 23Paulus ru Barnabas bailantek pemimpen-pemimpen jemaah ku setiap gerija. Telas baibedoa ru baibepuase, ubai baiserah pemimpen-pemimpen ajeh nu Tuhan de naipecaya.

24Telas ajeh Paulus ru Barnabas bailalu lengrik Pisidia ru bailei nu lengrik Pamfilia. 25Ubai baiperlei Gah Bor ku kote Perga lalu baiet nu kote Atalia. 26Ju kenjeh ubai belayar nij nu kote Antiokhia ku lengrik Syria. Ku pajehloh entem jemaah-jemaah pernah naibedoa ru naiserah ubai nu jenaga Jenang ha tugas de ya baipeselesei hunen.

27Bile bailei nu kote Antiokhia ku lengrik Syria, baikumpol jemaah-jemaah ku pajeh ru baipasal dikdij hal de bibeh ya Jenang melalui ubai. Ubai baipasal begeiharok Jenang ya Kibuka nong ha mai pek Yahudi untok naipecaya nu Yesus. 28Paulus ru Barnabas baigei liu ru pengikot-pengikot Yesus ku pajeh.

Currently Selected:

KISAH 14: AEH

Highlight

Copy