KISAH 13

Barnabas ru Saulus Bipileh ru Bingeng

1Ku engkap jemaah-jemaah ku kote Antiokhia, mong memerip urag nabi ru guru. Enai ajeh Barnabas, Saulus, Simeon de bisebot Belag, Lukius ju kote Kirene, ru Menahem de bibela besama ru Raja Herodes Antipas penguasa lengrik Galilea. 2Tengah naisembahyang nu Tuhan ru naibepuase, Kelog Santen Kiurok nu enai, “Haskan Barnabas ru Saulus ha Eng supaye baibeh tugas de ya Ngsedia ha ubai.”

3Telas naibepuase ru naibedoa, naidek teg enai ku kemil kui Barnabas ru Saulus lalu naingeng ubai.

Paulus Kimula Imisi Penginjilan de Petame

4Barnabas ru Saulus bingeng ya Kelog Santen nu kote Seleukia. Ju kenjeh ubai baibelayar nu Pulau Cyprus. 5Bile bailei nu kote Salamis, baiperlei engrok Jenang ku deg sembahyang mai Yahudi. Yohanes Markus kitulog ubai ku kateh kerjak ajeh.

6Enai naicip nu dikdij tempat ku pulau ajeh lei naitiba ku kote Pafos. Ku pajeh naiburuk numom sengoi Yahudi imuh Bar-Yesus. Kek ajeh ahli siher ru nabi palsu. 7Kek ajeh kawat penguasa pulau ajeh de imuh Sergius Paulus. Penguasa ajeh numom de cerdeg. Kek kicereg Barnabas ru Saulus kerana kaha-cerngai ha engrok Jenang. 8Tapi ahli siher ajeh de imuh Elimas (ajehloh muh Bar-Yesus kateh engrok Yunani) kitentang ha Barnabas ru Saulus. Kek kikerekwat kaha-get penguasa ajeh pecaya nu Yesus.

9Tapi Saulus de bisebot juga Paulus bikuasa ya Kelog Santen ru kilet nu mat ahli siher ajeh 10lalu kiurok, “Hek kenon Ibles! Hek halawan dikdij hal de bor. Hek sengoi de neklennon ru nekbahneh hal de jehat. Behentiloh perusak neajar TUHAN de benar! 11Hunen nengloh, TUHAN doh Kihukom hek lei hajadi buta ru pek dapat hanengneng lunau mat arik untok memerip iluniu.”

Ku sarik jijeh juga, kabos de guer kitutop mat Elimas lei kek kibelaper kaha-kek sengoi de buleh peg kek. 12Bile penguasa ajeh kineng ma de ya belaku, kek pen kipecaya nu Yesus kerana ihad cengang iempag bile kicerngai neajar tentang Tuhan.

Paulus Kibeajar ku Kote Antiokhia de ku Lengrik Pisidia

13Paulus ru ikekawat naibelayar ju kote Pafos nu kote Perga ku lengrik Pamfilia. Ku pajeh Yohanes Markus kidek enai lalu kilos nu kote Yerusalem. 14Barnabas ru Paulus baipeteros ceknip ubai ju kote Perga nu kote Antiokhia ku lengrik Pisidia. Ku arik Sabat, baiet nu deg sembahyang lalu baigei ku pajeh. 15Telas Hukom Taurat Musa ru kitab nabi-nabi bibaca, pemimpen-pemimpen deg sembahyang ajeh naikirep bengwal adeh nu ubai: “Sesedara, amen jerkek mong bengsat ha pegalak sengoi ku padeh, perleiloh!”

16Paulus kijinjeg lalu kiog neuta ya iteg ru kiurok, “Sesedara bangse Israel ru sesedara bangse kilek de taat nu Jenang, cerngailoh! 17Jenang mai Israel ya Kipileh jenang rak hik ru Kipejadi enai bangse de entoi ku mase naigei ku lengrik Mesir sebegei mai aseg. Ya kuasa de entoi, Jenang Kien enai hol ju lengrik Mesir. 18Selame 40 tahut iluniu, Kek Kibesabar ha kelaku jehat enai ku padag guron. 19Jenang Kipebinasa tujoh bangse de naigei ku tik Kanaan lalu tik ajeh biog nu mai Israel ru tik ajeh kijadi hak enai. 20Dikdij hal ajeh kitejadi selame kira-kira 450 tahut.

Telas ajeh Jenang Kiog nu enai hakem-hakem#13:20 Hakem-hakem: Hakem-hakem adehloh pemimpen-pemimpen de bipileh ya Jenang supaye naitulog mai Israel naipealah musoh liknai. Enai ajeh apeka hakem ku mahkamah. lei nu mase Nabi Samuel. 21Lalu mai Israel naisemanj numom raja nu Jenang lalu Kek Kiog Saul kenon Kis ju suku Benjamin. Kek kijadi raja enai selame 40 tahut. 22Telas Jenang Kibuang kek ju itahte, Jenang Kipejadi Raja Daud sebegei raja enai. Adehloh de Jenang Kiurok tentang Raja Daud: ‘Eng Ngpanei Daud kenon Isai numom de kipesenang sengik Eng. Kek doh kibeh dikdij heknod Eng.’#1 Sam 13:14; 16:12; Mzm 89:21 23Ju kenon-cenok Raja Daud ajehloh Jenang Kisedia Peselamat ha bangse Israel begei de ya Kijanji. Yesusloh Peselamat ajeh. 24Mase Yesus pekseg Kimula Itugas, Yohanes Pembaptis kiajar dikdij mai Israel supaye naibetobat ju dosa enai ru bibaptis. 25Bile tugas Yohanes Pembaptis ya kaha-merek selesei, kek kiurok nu mai jengoi, ‘Bokka eng adeh ku peniker engkek? Eng enyuk pek Sengoi de engkepoj. Tapi mong Numom de Kihol doh telas eng. Ngha-teg Icog kasot pen eng pek layak.’#Mat 3:11; Mrk 1:7; Luk 3:16; Yoh 1:20, 27

26Cerngailoh, sesedara kenon-cenok Abraham, ru sesedara mai pek Yahudi de naisengoh ru naihormat ha Jenang! Nu hik Jenang Kikirep Gah Bor tentang begeiharok Kek Kipeselamat manusia. 27Yesus ajehloh Peselamat de bingeng ya Jenang untok Kipeselamat manusia. Tapi sengoi de naigei ku kote Yerusalem ru pemimpen-pemimpen enai pek naisedar Yesus ajehloh Peselamat enai. Enai naibaca kitab nabi-nabi ku jap-jap arik Sabat tapi pek naireti nubuat-nubuat de bicot tentang Peselamat. Jadi, kena begei de ya binubuat ya nabi-nabi, enai naihukom dat ha Yesus. 28Hamapen pek naikep ma-ma alasan de sesuei, tapi naisemanj ku Pilatus penguasa lengrik ajeh supaye Yesus bihukom dat. 29Telas naibeh kena begei de ya bicot ku kateh Alkitab tentang Kek, Imayat bicerleh ju saleb ru bidek ku kateh penep. 30Tapi Jenang Kiberkos Kek ju Idanan. 31Telas ajeh, jeoi arik Yesus Kiperneng Ilei nu sengoi-sengoi de entem pernah naicip besama ru Kek ju lengrik Galilea nu kote Yerusalem. Hunen, enai ajeh naijadi Isaksi nu bangse Israel.

32Hunen jarperlei Gah Bor adeh nu engkek: Jenang Kiog Ijenanji nu jenang rak hik 33ru Kek Kipegenap Ijenanji ajeh ha hik kenon-cenok enai ajeh bile Kiberkos Yesus ju Idanan. Hal ajeh kitejadi kena begei de bicot ku kateh kitab Mazmur bab kedue,

‘Hekloh Kenon Eng.

Ku arik adeh Eng Ngjadi Menek Hek.’#Mzm 2:7

34Jenang ya Kiberkos Yesus ju Idanan. Yesus doh pek Kidat nij. Tentang hal ajeh Jenang ya Kiurok,

‘Eng doh Ngberkat Hek ya berkat de suci

begei de ya Ngjanji nu Raja Daud.’#Yes 55:3

35Begei ajeh juga, mong bicot ku kateh ayat kilek,

‘Jen pek Jenbiar

Eng Hambe Jen de suci jadi sok.’#Mzm 16:10

36Ceknot ajeh pek tentang Raja Daud kerana telas kek kibeh heknod Jenang ku mase isinui, kek kidat ru bicop besama ru ijenang rak ru imayat kisok. 37Tapi Yesus de biberkos ya Jenang ju Idanan pek Kisok.

38Kerana ajeh, sesedara, hodloh engkepanei tentang hal adeh: Melalui Yesus, dosa-dosa hik biampon. 39Sengoi de pecaya nu Kek biterlas ju dikdij dosa. Neampon dosa pek dapat biberkep ya tenaat nu Hukom Taurat Musa. 40Bejaga-jagaloh supaye ma de biurok ya nabi-nabi adeh pek kibelaku nu dikdij liengkek:

41‘Cerngailoh engkek sengoi-sengoi de behina ha Jenang!

Doh engkehiran ru engkebinasa!

Kerana, ma de Ngbeh ku mase adeh

doh pek engkepecaya,

hamapen ya bipeterang nu engkek!’ ”#Hab 1:5

42Bile Paulus ru Barnabas baiha-dek ju deg sembahyang ajeh, mai de mong ku pajeh naisemanj baiajar nij hal-hal ajeh nu enai ku arik Sabat de keknit doh. 43Bile sembahyang ajeh ya dij, jeoi mai Yahudi ru mai pek Yahudi de naimuj agame Yahudi naijoi Paulus ru Barnabas. Baiog bengsat nu enai supaye teros naisui ru naibesandar ku bernor Jenang.

44Ku arik Sabat selepas ajeh, hamper dikdij mai ku kote ajeh naibekumpol naiha-cerngai ha engrok Tuhan. 45Tapi mai Yahudi naidengki bile naineng ha mai jengoi ajeh. Lalu naitentang ha bengwal Paulus ru naihina ha kek. 46Tapi Paulus ru Barnabas baiurok ru ihad berani, “Jar hod jarperlei engrok Jenang nu engkek canuk. Tapi engkenyek ru engkeanggap diri liengkek pek layak engkeha-terima sinui de lei ditehjeh. Hunen, jar jarwes engkek ru jaret nu mai pek Yahudi 47kerana Tuhan Kiperintah begei adeh nu jar:

‘Eng ya Ngpetetap hajadi cahaya ha mai pek Yahudi

ru Ngguna hek Ngha-peselamat dikdij bangse.’ ”#Yes 42:6; 49:6

48Bile mai pek Yahudi naicerngai tentang hal ajeh, enai ihad naikerakmik ru naipateh ha engrok Tuhan. Dikdij mai de bipetentu ya Jenang untok naiterima sinui de lei ditehjeh naipecaya nu Yesus.

49Engrok Tuhan ya gucep nu dikdij tempat ku daerah ajeh. 50Tapi mai Yahudi naihasot ha kekerdor bepangkat de naisengoh ru naihormat ha Jenang ru kekeral de bepengaroh ku kote ajeh. Enai mula naianiaye ha Paulus ru Barnabas ru naiperet ubai ju daerah ajeh. 51Rasul-rasul ajeh baitapes habok ku jog liubai ku ngar sengoi ku pajeh sebegei tanda amaran Jenang doh Kihukom enai lalu ubai pen baidek ju kote Antiokhia ku lengrik Pisidia ru baiet nu kote Ikonium.#Mat 10:14; Mrk 6:11; Luk 10:11 52Tapi pengikot-pengikot Yesus ku kote Antiokhia ihad naikerakmik ru bikuasa ya Kelog Santen.

Currently Selected:

KISAH 13: AEH

Highlight

Copy