1 KORINTUS 15

Kisnos Yesus ju Idanan

1Sesedara seiman, hunen eng ngha-peingat nu engkek tentang Gah Bor de ngperlei nu engkek entem. Engkek ya engketerima ru engkecap lei hunen Gah Bor de ngperlei ajeh. 2Engkek doh bipeselamat amen lekat engkecap kuat nu Gah Bor de ngperlei nu engkek entem. Tapi amen tok, sie-sie taleh engkejadi mai Kristian.

3Ma de ngterima entem, eng ya ngperlei nu engkek sebegei hal de paleng penteng. Hal ajeh tentang Kristus de Kidat ha dosa hik, kena begei ma de bicot ku kateh Alkitab. 4Telas Kidat, Kek bicop ru ku arik de inik, Kek bipersui nij begei de bicot ku kateh Alkitab. 5Telas Kisui ju Idanan, Kek Kiperneng Idiri nu Petrus. Telas ajeh nu 12 urag Irasul. 6Telas ajeh Kek Kiperneng Idiri nij nu lebeh ju 500 urag Ipengikot sekaligus. Jeoi ju enai lekat naisui hamapen memerip urag ya naidat. 7Telas ajeh Kek Kiperneng Idiri nu Yakobus. Telas ajeh nu dikdij Irasul.

8Ipenyudah, Kek Kiperneng Idiri nu eng juga, de ngjadi rasul begei ha numom sanget de biperyos pek cukop gecek. 9Eng adeh de paleng hina ju dikdij rasul de kilek. Eng pek layak bicereg rasul kerana entem ngsiksa ha jemaah-jemaah Jenang. 10Tapi kerana bernor sengik Jenang nu eng, begei adehloh ijenadi nu eng hunen. Bernor sengik Jenang ajeh nu eng pek kijadi sie-sie kerana Ibernor sengik ajeh kibeh eng ngkerakjak lebeh kuat nij bebandeng dikdij rasul-rasul de kilek. Dikdij ajeh pek ya kengwat lieng sendiri tapi ya bernor sengik Jenang de mong besama ru eng. 11Jadi, pek penteng Gah Bor ajeh biperlei ya eng atao ya rasul-rasul de kilek. Dikdij lijik jipasal gah de sama, ru dikdij liengkek ya engkepecaya nu gah ajeh.

Kisnos Hik ju Danan

12Jik ya jipasal nu engkek Kristus ya biberkos ju Idanan. Tapi mong mai ku engkap engkek de naipasal begei adeh: Mai dat doh pek biberkos ju danan liknai. 13Amen betol mai dat pek biberkos ju danan liknai, maksodjeh Kristus pen pek biberkos ju Idanan. 14Amen Kristus pek biberkos ju Idanan, sie-sie talehloh neajar de jipasal nu engkek, ru sie-sie talehloh juga iman engkek nu Kristus. 15Lagi lebeh nij, jik adeh pen jilenglod tentang hal Jenang kerana jiurok Jenang ya Kiberkos Kristus ju Idanan. Amen betol mai de ya dat pek biberkos nij doh, Jenang pen pek Kiberkos Kristus ju Idanan. 16Amen mai de ya dat pek biberkos, tentu Kristus pen pek biberkos juga. 17Ru amen Kristus pek biberkos ju Idanan, sie-sie talehloh engkepecaya nu Kristus ru engkek lekat engkesui kateh dosa. 18Imaksodjeh, mai de ya dat de naipecaya nu Kristus entem ya naibinasa. 19Amen hibeharap nu Kristus had ku mase sinui hik ku bumi adeh taleh, paleng malangloh hik bebandeng dikdij manusia de mong ku bumi adeh.

20Tapi sebenarnye, Kristus ya biberkos ju Idanan. Hal ajeh kijamin mai dat doh biberkos ju danan. 21Danan kihol nu dunia adeh melalui numom sengoi. Begei ajehloh juga, kisnos ju danan biog melalui Numom Sengoi kilek. 22Melalui Adam dikdij manusia ya naikep danan. Begei ajeh juga, melalui Kristus dikdij manusia doh bipersui nij. 23Tapi jap-jap mai doh bipersui joi giliran: Mula-mula Kristus, telas ajeh mai de ya naijadi hak Ilei doh bipersui ju danan liknai mase Kristus Kihol nij doh. 24Telas ajeh kiamat doh kitiba. Ku mase ajeh, Kristus doh Kipealah dikdij kuasa jenghat de nailawan ha Jenang. Telas ajeh Kristus doh Kiog Ikuasa sebegei Raja nu Jenang Menek hik. 25Kristus hod lekat Kimemerintah sebegei Raja leiloh Jenang Kidek dikdij musoh Kristus nu kerop kuasa Kristus. 26Danan ajehloh musoh de ipenyudah sekali doh bipebinasa. 27Ku kateh Alkitab mong bicot, “Jenang ya Kibeh Kek jadi pemerintah nu dikdij ma de mong.” Amen hijoi ayat ajeh nek, ‘dikdij ma de mong’ pek temasok Jenang kerana Kekloh de Kidek dikdij ajeh nu kerop kuasa Kristus.#Mzm 8:7 28Telas dikdij hal bidek nu kerop kuasa Kristus, Kristus Kenon Jenang ajeh doh Kidek Idiri nu kerop kuasa Jenang de Kidek dikdij hal nu kerop kuasa Kristus. Penyudah, Jenang doh Kimemerintah dikdij hal.

29Amen mai de ya dat pek biberkos nij ju danan enai doh, ma iguna engkek bibaptis ha mai de ya dat? Amen mai de ya dat ajeh pek bipersui nij doh, jadi yama engkek bibaptis ha mai de ya dat? 30Amen mai de ya dat pek biberkos ju danan enai, yama jibesusah-payah jiha-tempeh bahaye tiap mase? 31Tiap-tiap arik eng ngtempeh danan! Hal ajeh mimang betol. Eng ngkerakmik ha engkek kerana engkesui benanek ru Kristus Yesus Tuhan hik. Hal ajeh pen betol juga. 32Amen eng pek mong neharap kisnos ju danan, pek mong iguna ngbelawan ru sengoi-sengoi ku kote Efesus adeh de naiserag eng begei binatag ces. Amen betol mai de ya dat pek bipersui nij doh, lebeh bor hisui hijoi bengwal adeh:

Beiloh hicakcak, hibelbel, ru hibeserunuk

kerana huper hik doh hidat.#Yes 22:13

33Agokloh engkek bilenglod ya mai de beajar neajar de salah kerana “Bekawat ru mai de jehat doh kiperusak perangei de bor.” 34Engkek hodloh engkeserngik tentang hal ajeh betol-betol ru pek engkebeh dosa nij. Engkek patot engkeselsel kerana mong mai ku engkap engkek de pekseg naikenal ha Jenang.

Berog Hik Mase Biberkos ju Danan

35Enggamak mong mai naibetanya, “Begeiharok mai de ya dat bipersui nij? Berog de begeiharok de naikep doh?” 36Ihad benudoh engkek adeh! Bile engkecet beneh ku tik, beneh ajeh hod kidat canuk, telas ajeh kicuai. 37Ma de engkecet ajeh had beneh taleh apeka rimdij keneng jehuk. Engkecet ajeh enggamak beneh gandomka beneh de kilek. 38Tapi Jenang Kiog nu beneh ajeh bentok de Kihod. Jap-jap beneh biog bentok memaseg.

39Jap-jap berog mong bentok memaseg. Berog manusia pek sama begei berog binatag, berog cep, atao berog kak.

40Mong juga bende-bende de ku langit ru ku bumi. Ibernor bentok bende-bende de mong ku langit pek sama begei ibernor bende-bende de mong ku bumi. 41Ibernor mat arik pek sama begei ibernor gecek. Ibernor gecek pek sama begei ibernor perloi. Jap-jap perloi juga pek sama ibernor.

42Begei ajehloh juga nu mai dat de doh bipersui nij. Mase kidat, iberog ajeh kisok. Tapi bile bipersui nij doh, iberog ajeh lei ditehjeh. 43Ku mase berog ajeh bicop, berog ajeh niknej ru lemah. Tapi mase berog ajeh biberkos nij ju danan, berog ajeh kijadi mulie ru kuat. 44Berog de bicop ajeh berog jasmani. Tapi berog de biberkos pigoi doh ajeh berog rohani. Amen mong berog jasmani, tentu mong juga berog rohani. 45Ku kateh Alkitab mong bicot, “Adam sebegei manusia petame biog sinui ya Jenang.” Kristus de bisebot juga ‘Adam de ipenyudah’ Kijadi Kelog de Kiog sinui lei ditehjeh.#Kej 2:7 46Berog jasmani kihol canuk. Telas ajeh berog rohani. 47Adam ajeh manusia petame de bipejadi ju tik tapi Adam de kedue Kihol ju serga. 48Dikdij sengoi ku dunia adeh mong berog de sama begei ha berog Adam de bipejadi ju tik. Tapi sengoi ku serga mong berog de sama begei ha berog Ilei de Kihol ju serga. 49Hunen berog hik sama begei berog Adam de iasal ju tik tapi doh berog hik kijadi sama begei berog Kristus de Iasal ju serga.

50Sesedara seiman, adehloh maksod eng: Berog hik de bipejadi ju sej ru behip doh kisok. Hik ru berog de begei ajeh pek dapat himuj nu serga de biperintah ya Jenang sebegei Raja. Berog de sok pek dapat kiterima ma-ma de pek sok.

51-52Cerngailoh! Adehloh nerancang de birahsie ya Jenang canukjeh: Ku mase Tuhan Yesus Kihol nij doh, mong mai ju engkap hik adeh doh de lekat sui. Tapi dikdij lihik de lekat sui ru de ya dat doh biubah. Bile trompet biparok ku ipenyudah kali, hik doh aleh-aleh hibeubah. Bile trompet biparok, mai de ya dat doh biberkos ru biog berog de lei ditehjeh, ru dikdij lihik de lekat sui doh hibeubah juga. 53Berog de sok doh biganti ya berog de lei ditehjeh ru berog de dat doh biganti ya berog de pek dat. 54Bile berog de sok ajeh biganti ya berog de lei ditehjeh ru berog de dat ajeh biganti ya berog de pek dat, hal adeh de bicot ku kateh Alkitab doh kitejadi: “Jenang ya Kipealah danan!”#Yes 25:8

55“Danan doh pek kimenang.”

“Danan doh pek dapat kiperhod jik.”

56Hik hidat kerana hibedosa, ru hipanei hibedosa kerana mong Hukom Taurat. 57Tapi hibesyukor nu Jenang de Kiog hik menang hilawan dosa ru danan melalui Yesus Kristus Tuhan hik.

58Kerana ajeh, sesedara seiman de nghok, hodloh lekat engkekuat pek yahyoh. Hodloh engkekerekwat bahbeh kerjak Tuhan kerana engkepanei kerjak de engkebeh ha Tuhan ajeh pek sie-sie.

Currently Selected:

1 KORINTUS 15: AEH

Highlight

Copy