1 KORINTUS 14

Kurnie Belwal Kateh Bahase Kelog ru Kurnie Perlei Bengsat Jenang

1Jadi, kerekwatloh untok engkehakhok kerana ajehloh icare de paleng bor untok engkeguna kurnie-kurnie engkek. Kerekwatloh juga untok engkeberkep kurnie-kurnie ju Kelog Jenang, lagi-lagi kurnie ha perlei bengsat Jenang. 2Mai de dapat naibelwal kateh bahase kelog, enai ajeh pek naibelwal nu manusia tapi naibelwal nu Jenang. Pek mong numom pen de buleh bepaham ma de naibual ajeh kerana Kelog Jenang de Kibeh naibelwal tentang hal-hal de had bipanei ya Jenang taleh. 3Tapi mai de naiperlei bengsat Jenang naibelwal nu manusia ru naipekuat, naipegalak, ru naipesenang sengik mai kilek. 4Mai de dapat naibelwal ku kateh bahase kelog had kipekuat ha diri ilei sendiri taleh tapi mai de kiperlei bengsat Jenang naipekuat dikdij jemaah.

5Eng nghod dikdij liengkek dapat engkebelwal ku kateh bahase-bahase kelog. Tapi eng lebeh nghod dikdij liengkek dapat engkeperlei bengsat Jenang. Mai de perlei bengsat Jenang lebeh beguna daripade mai de naibelwal ku kateh bahase kelog, kecuali mong mai de dapat kipasal erti bahase ajeh supaye jemaah-jemaah buleh bipekuat. 6Sesedara seiman, ma iguna nu engkek amen eng nghol nu engkek ru ngbelwal ku kateh bahase-bahase kelog? Tentu pek mong iguna langsong! Lebeh beguna amen ngpasal nu engkek ma-ma taleh ihal de biperneng ya Jenang atao ngpasal ilmu de jerek imaksod atao ngperlei bengsat Jenang atao ngajar engkek.

7Hal ajeh sama begei alat-alat muzik de pek benyawe de bimain pek tentu. Icuntohjeh, amen pensol ru gitar pek betol biguna ru bimain, mai pek naipanei lagu ma de bimain. 8Icuntoh de kilek nij, amen trompet biparok pek tentu, mai pek naipanei bile imase untok naiha-besedia ha perag. 9Begei ha lagu muzik ru engrok trompet de pek tentu ajeh, pek mong numom pen mai de dapat kipaham ha bengwal engkek ajeh amen engkebelwal ku kateh bahase kelog. Jadi, bengwal engkek ajeh kijadi sie-sie taleh. 10Mong jeoi bahase ku dunia adeh ru dikdij ajeh mong ireti. 11Amen eng pek ngreti ha engrok nenumom, tentu sengoi ajeh mai aseg nu eng, ru eng adeh mai aseg nu kek. 12Jadi, ngurok nu engkek. Kerana engkek mimang besemangat engkeha-berkep kurnie-kurnie ju Kelog Jenang, kerekwatloh engkeha-berkep kurnie-kurnie de lebeh bor untok engkepekuat jemaah-jemaah.

13Kerana ajeh, amen numom dapat kibelwal ku kateh bahase kelog, kek hodloh kibedoa nu Jenang supaye biog juga kurnie ha pasal erti bahase kelog ajeh. 14Amen eng ngbedoa ku kateh bahase kelog, kelog eng kibedoa tapi hal ajeh pek beguna ha peniker eng. 15Jadi, amen begei ajeh, ma de hod ngbeh? Adehloh hal de hod ngbeh: Bile eng ngbedoa, eng ngbedoa ru bahase kelog tapi eng ngbedoa juga ru peniker lieng. Begei ajeh juga, bile eng ngbedindang, eng ngbedindang ru bahase kelog tapi mong juga ngbedindang ru peniker lieng. 16Amen engkeucap syukor nu Jenang engkeguna bahase kelog, mai ku pajeh pek naipaham ma de engkeurok ru enai pek dapat naiha-urok ‘amin’ nu neucap syukor engkek ajeh. 17Hamapen neucap syukor engkek ajeh bor, tapi hal ajeh pek kipekuat ha mai kilek.

18Eng ngbesyukor nu Jenang kerana dapat ngbelwal ku kateh bahase kelog lebeh bor bebandeng dikdij liengkek. 19Tapi bile jemaah-jemaah naibekumpol naiha-sembahyang, eng lebeh gemar ngbelwal nek gek taleh de dapat bipaham ya mai kilek daripade jeoi ngbelwal ngguna bahase kelog de pek dapat bipaham. Eng lebeh nggemar begei ajeh supaye buleh ngajar enai ru ihad jelas.

20Sesedara seiman, agokloh engkebepiker begei ha sesanget. Ku kateh hal jenghat, engkek hodloh begei ha sesanget tapi ku peniker engkek, engkek hodloh begei ha mai engrak. 21Ku kateh Alkitab mong bicot,

“TUHAN Kiurok, ‘Eng doh Ngguna mai pek Yahudi de belwal bahase aseg Ngha-belwal nu mai Yahudi.

Tapi enai pek naiha-cerngai ha bengwal Eng.’ ” #Yes 28:11-12

22Jadi, kurnie ha belwal ku kateh bahase kelog ajeh tanda ha mai de pek pecaya. Kurnie ajeh apeka tanda ha mai de pecaya. Tapi kurnie ha perlei bengsat Jenang ajeh tanda ha mai de pecaya apeka ha mai de pek pecaya.

23Hamapen begei ajeh, amen dikdij jemaah engkebekumpol ru jap-jap liengkek engkebelwal ku kateh bahase kelog, mai de pek naipanei ha kurnie-kurnie ajeh atao mai de pek pecaya de helhol nu majeh doh naineng engkek ru naisangka engkek ajeh mai gila. 24Tapi amen ku kateh kenumpol ajeh dikdij liengkek engkeperlei bengsat Jenang, mai de pek pecaya atao mai de pek naipanei tentang kurnie-kurnie ajeh doh naihol majeh ru naicerngai ma de engkebual ajeh ru doh naisedar tentang dosa-dosa liknai. Enai doh bitegor ya ma de naicerngai ajeh. 25Bengsat Jenang ajeh doh kibeh dikdij hal de cenem ku sengik enai biperlau lei naisujod naisembah ha Jenang ru naiaku “Jenang ajeh betol-betol mong ku engkap engkek.”

Adab Sopan Mase Jemaah-jemaah Naibekumpol

26Jadi, sesedara seiman, harokloh hunen? Mase engkek bekumpol engkeha-sembah ha Jenang, hodloh mong mai de bedindang, mong mai de beajar, mong mai de kipasal ma de biperneng ya Jenang, mong mai de kibelwal ku kateh bahase kelog, ru mong mai kilek nij de kipasal ma ireti engrok bahase kelog ajeh. Dikdij ajeh hodloh engkebeh supaye engkepekuat jemaah-jemaah. 27Amen mong mai de naibelwal ku kateh bahase kelog, had nar atao nik mom taleh buleh naibegilir naibelwal. Hodloh mong juga numom kilek de kipasal maksod bahase kelog ajeh. 28Tapi amen walah mai de buleh kipasal imaksod, hodloh mai de naibelwal ku kateh bahase kelog ajeh naikerakdik serakngek ku kateh kenumpol ajeh. Enai hod naibelwal nu Jenang naihalei-halei taleh ku mase kilek. 29Amen mong mai de naiha-perlei bengsat Jenang, hodloh nar atao nik mom taleh naiperlei bengsat de naikep ju Jenang ajeh, ru mai kilek hodloh naiserngik bengsat ajeh betol-betol ju Jenangka tok. 30Ku kateh kenumpol engkek ajeh, bile numom tengah kibelwal ru mong mai kilek kikep bengsat Jenang, mai de tengah kibelwal ajeh hodloh kibehenti ibengwal. 31Dikdij liengkek buleh engkeperlei bengsat Jenang numom penumom supaye dikdij mai naibelajar ru bipegalak. 32Ingatloh, mai de naiperlei bengsat Jenang dapat naikawal kelog liknai sendiri untok naibegilir perlei bengsat Jenang. 33Jenang Kigemar ha adab sopan apeka kenacau.

Begei de tejadi ku dikdij jemaah Jenang, 34mai kekerdor hodloh naikerakdik ku mase jemaah-jemaah naibekumpol. Enai pek buleh naibelwal ru hod naitaat nu gengsir enai kerana begei ajehloh de biajar ya Hukom Taurat. 35Amen mong ma-ma hal de naihagu-panei, enai hodloh naitanya hal ajeh nu gengsir liknai ku padeg kerana numom kerdor kipeselsel ha diri ilei sendiri amen kibetanya ru kibelwal mase jemaah-jemaah naibekumpol.

36Amen mong mai ku engkap engkek de pek naisetuju ha neajar eng adeh, ingatloh hal adeh: Gah Bor ju Jenang pek beasal ju engkek ru apeka engkek taleh de beterima Gah Bor ajeh. Engkek hodloh engkejoi juga hal-hal de ya bibeh ya jemaah-jemaah ku tempat kilek. 37Amen mong mai de kianggap ilei ajeh mong kurnie ha perlei bengsat Jenang atao kurnie-kurnie laen ju Kelog Jenang, sengoi ajeh hod kisedar tentang hal adeh: Ma de ngcot adeh ernor ju Tuhan. 38Tapi amen mong mai pek kipeduli ha ernor ajeh, agok peduli sengoi ajeh.

39Jadi, sesedara seiman, kerekwatloh engkeha-perlei bengsat Jenang ru agokloh get mai kilek de naiha-belwal ku kateh bahase-bahase kelog. 40Tapi dikdij hal ajeh hod bibeh ku kateh adab sopan ru semiak.

Currently Selected:

1 KORINTUS 14: AEH

Highlight

Copy