1 KORINTUS 12
12
Kurnie-kurnie ju Kelog Jenang
1Sesedara seiman, hunen ngha-pasal tentang kurnie-kurnie de biog ya Kelog Jenang. Eng nghod engkepanei bik tentang hal ajeh. 2Ku mase engkek pekseg engkekenal Tuhan, engkek biperikroj supaye engkesembah ha behala de pek benyawe ajeh. 3Engkek hod engkepanei tentang hal adeh: Mai de mong Kelog Jenang ku isinui pek buleh kiurok “Celakaloh Yesus!” Ru juga, amen nenumom kiurok “Yesus ajeh Tuhan,” imaksodjeh Kelog Jenang mong ku isinui.
4Mong memacam jenis kurnie ju Kelog Jenang tapi dikdij ajeh ju Kelog de sama. 5Begei ajeh juga, mong memacam jenis pelayanan nu Tuhan tapi hik adeh himelayani Tuhan de sama. 6Mong memacam care hiha-beh kerjak ha Tuhan tapi Jenang de sama de Kiog penanei nu dikdij mai supaye naibeh kerjak memaseg. 7Dikdij lihik biog kurnie ya Kelog Jenang supaye hitulog sesedara seiman hik de kilek. 8Nu sesetengah mai, Kelog ajeh Kiog kurnie bepasal bengsat de ihad cerdeg. Nu mai de kilek, Kelog ajeh Kiog kurnie bepasal ilmu de jerek imaksod. 9Nu mai de kilek nij, Kelog de sama ajeh Kiog iman de ihad luar biasa. Nu mai de kilek nij, Kelog Jenang ajeh Kiog kuasa untok naiperbor mai de nyik. 10Nu mai de kilek nij, Kelog Jenang Kiog kuasa untok naibeh hal-hal de ajaib. Nu mai de kilek nij, Kelog Jenang Kiog penanei ha perlei bengsat Jenang. Nu mai kilek nij, Kelog Jenang Kiog penanei supaye naipanei bengsat ajeh ju Jenang atao ju nyanik-nyanik. Nu mai kilek nij, Kelog Jenang Kiog kurnie untok naibelwal memacam jenis bahase kelog. Nu mai kilek nij, Kelog Jenang Kiog kurnie untok naipasal erti bahase-bahase ajeh. 11Dikdij ajeh bibeh ya Kelog de sama taleh. Kelog ajeh Kiog nu jap-jap mai kurnie de belaen-laen Kijoi heknod Ilei sendiri.
Mong Jeoi Anggote Berog tapi Nanek Berog
12Manusia mong had nek nanek berog taleh tapi mong jeoi ianggote. Begei ajehloh juga, hik de hijengoi adeh hibenanek hijadi berog Kristus. 13Dikdij lihik, baik mai Yahudika pek Yahudi, baik hambeka mai biasa, dikdij lihik ya bibaptis ya Kelog de sama supaye hijadi nanek berog. Jenang ya Kiog IKelog de sama nu hik.
14Berog hik pek mong had nek nanek anggote taleh tapi mong jeoi ianggote. 15Hamapen jog kiurok ilei ajeh enyuk pek anggote berog kerana ilei ajeh pek teg, tapi kek lekat juga anggote berog. 16Hamapen entag kiurok ilei ajeh enyuk pek anggote berog kerana ilei ajeh pek mat, tapi kek lekat juga anggote berog. 17Harok berog kaha-ceringai amen berog ajeh had mat taleh? Harok berog kaha-keringoi amen berog ajeh had entag taleh? 18Tapi ya hipanei Jenang ya Kidek jap-jap anggote berog ku itempat de laen-laen ku berog ajeh Kijoi heknod Ilei sendiri. 19Pek mungken mong berog amen dikdij ajeh had nek nanek anggote taleh. 20Jadi, mimang mong jeoi anggote berog tapi berog ajeh had nek nanek taleh.
21Mat pek buleh kiurok nu teg, “Eng pek ngperlu hek!” Ru kui juga pek buleh kibual nu jog, “Eng pek ngperlu hek!” 22Sebenarnye, anggote-anggote berog de hianggap lemah ajehloh de paleng penteng ha berog hik. 23Anggote berog de hianggap pek penteng, hiog lebeh jenaga nij. Anggote berog de pek patot bineng ya mai, hitutop supaye pek bineng tapi 24anggote berog de buleh bineng ya mai pek perlu hitutop. Jenang ya Kidek anggote-anggote berog hik ku itempat supaye anggote de hianggap pek penteng naikep lebeh jeoi jenaga. 25Jenang Kibeh begei ajeh supaye berog ajeh pek beaseg, ru jap-jap anggote ajeh naibejaga ratak liknai. 26Amen nanek ju anggote berog ajeh kinyik, dikdij anggote berog de kilek juga sama naitanggong nyaknik ajeh. Amen nanek ju anggote ajeh bipateh bor, dikdij anggote berog de kilek juga sama naikerakmik.
27Dikdij liengkek ajeh berog Kristus ru jap-jap liengkek ajeh nanek ju anggote berog ajeh. 28Jenang ya Kipetetap tugas ha jap-jap mai ku kateh jemaah-jemaah. Petame, rasul-rasul. Kedue, nabi-nabi de beperlei bengsat Jenang. Ketige, guru-guru. Telas ajeh, mai de naibeh hal-hal ajaib. Telas ajeh, mai de mong kuasa ha perbor mai nyik, mai de naitulog ha mai kilek, mai de bepimpen jemaah, ru mai de belwal kateh bahase-bahase kelog. 29Pek dikdij mai naijadi rasul atao nabi atao guru. Pek dikdij mai mong kuasa naibeh hal-hal de ajaib 30atao perbor mai nyik atao belwal ku kateh bahase-bahase kelog atao pasal erti bahase-bahase kelog ajeh. 31Kerana ajeh, kerekwatloh engkeha-berkep kurnie-kurnie de lebeh beguna.
Tapi hunen eng ngha-pasal care de paleng bor untok engkeguna kurnie-kurnie engkek ajeh.
Currently Selected:
1 KORINTUS 12: AEH
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
