1 KORINTUS 11

1Joiloh cuntoh eng begei eng juga ngjoi cuntoh Kristus.

Kekerdor Bior Tutop Kui Liknai

2Eng ngpateh engkek kerana engkeingat ha eng ku kateh dikdij hal ru lekat engkejoi neajar de ya ngajar nu engkek. 3Eng nghod engkepanei tentang hal adeh: Kristus ajeh kui nu jap-jap keral, gengsir ajeh kui nu ikenah, ru Jenang ajeh kui nu Kristus. 4Amen kekeral naitutop kui liknai ku ngar mai jengoi mase naibedoa atao naiperlei bengsat Jenang, kelaku enai ajeh pek kihormat ha Kristus sebegei kui liknai ajeh. 5Tapi amen kekerdor pek naitutop kui liknai mase naibedoa atao naiperlei bengsat Jenang, enai pek naihormat ha gengsir sebegei kui liknai ajeh. Kerdor de pek kitutop ikui sama begei kerdor de biloj isog. 6Amen numom kerdor kinyek pek kaha-tutop ikui, kek hod kikoh isog ajeh. Tapi amen kek kiselsel isog doh bikoh atao biloj, kek hod kitutop ikui. 7Keral bicipte serupa begei ha Jenang ru kiperneng kemuliean Jenang, jadi keral pek buleh naitutop kui liknai. Tapi kerdor bicipte untok kiperneng kemuliean keral. 8Kerana, keral pek bicipte ju kerdor tapi kerdorloh de bicipte ju keral, 9ru keral pek bicipte ha kerdor tapi kerdor bicipte ha keral. 10Kerana ajeh, numom kerdor hod kitutop ikui untok kiperneng inehormat ru itenaat nu igensir sebegei ikui ajeh. Kerdor hod naibeh begei ajeh kerana malikat-malikat naineng ha enai. 11Hamapen begei ajeh, kateh sinui hik mai Kristian, keral ru kerdor sama-sama hibegantong ratak lihik 12kerana, hamapen kerdor bicipte ju keral, tapi keral kiyos ju kerdor, ru dikdij hal kihol ju Jenang.

13Hodloh engkepanei tentang hal adeh: Pek bor amen numom kerdor pek kitutop ikui bile kibedoa nu Jenang. 14Dikdij mai naineng pek bor amen numom keral kidek isog cereg. 15Tapi nu kerdor, sog cereg ajeh ikebanggean diri kerana sog cereg ajeh biog untok kijadi itenutop kui. 16Amen mong mai naiha-bantah bengwal eng ajeh tentang hal tenutop kui kerdor, eng ngberlag nu enai begei adeh: Jik rasul-rasul ru dikdij jemaah Jenang jijoi adat ajeh. Pek mong adat de kilek selaen ajeh.

Kelaku Niknej Mase Perjamuan Kudus

17Tentang hal de doh ngpasal hunen, pek ngpateh engkek kerana mase engkebekumpol sebegei jemaah-jemaah, engkek pek engkebeh hal de bor tapi hal de niknej. 18Hal petame, eng mong ngcerngai tentang hal adeh: Ku mase engkebekumpol sebegei jemaah-jemaah, mong mai de naibepuak-puak. Mong juga de ngpecaya ma de bipasal nu eng ajeh. 19Sebenarnye, eng pek nghiran bile mong mai de naibepuak-puak ku engkap engkek. Hal ajeh doh kiperneng ilei belokka de betol-betol Kristian. 20Bile engkebekumpol besama ha Perjamuan Kudus, engkek engkecak ruti ru engkengut teu wain pek engkeha-ingat ha Kristus. 21Kerana, ku mase engkecakcak ajeh, mong mai de naicak canuk pek naipoj ha mai keknit. Ipenyudah, mong mai de cuag ru mong mai de bel. 22Engkek mong deg liengkek sendiri untok engkecakcak ru engkengekngut. Kelaku engkek ajeh kihina ha jemaah-jemaah Jenang ru kipeselsel ha sesedara seiman hik de hajap. Ma de hod ngurok nu engkek? Hod ngpateh engkek? Ngnyek! Ku kateh hal adeh, eng ngnyek bepateh engkek.

23Kerana, eng ya ngperlei nu engkek neajar adeh de ngterima ju Tuhan: Ku arik Tuhan Yesus bikianat, ku kelem ajeh Kek Kikot ruti 24ru Kiucap syukor nu Jenang. Telas ajeh Kek Kibahagi ruti ajeh ru Kiurok, “Adehloh berog Eng de Ngog ha engkek. Behloh begei adeh ha neingat ha Eng.” 25Ya telas Kek Kicak ruti ajeh, ru care de sama juga Kek Kikot cawan de biisi teu wain lalu Kiurok, “Cawan adeh jenanji pai antare Jenang ru Isengoi-sengoi. Jenanji adeh kijadi sah ya behip Eng. Tiap kali engkengut, behloh begei adeh ha neingat ha Eng.”

26Kerana ajeh, tiap kali engkecak ruti ru engkengut ju cawan ajeh, imaksodjeh engkepasal tentang danan Tuhan nu mai kilek lei Kek Kihol nij doh.

27Jadi, bok imai de kicak ruti Tuhan atao kingut ju Icawan kiguna care de pek kihormat ha Ilei, sengoi ajeh kibedosa nu berog ru behip Tuhan. 28Jadi, jap-jap mai hodloh naiperiksa diri liknai canuk, telas ajeh baruloh buleh naicak ruti ajeh ru naingut ju cawan ajeh. 29Mong mai de kicak ru kingut tapi pek kipaham jenamu ajeh tentang berog Tuhan. Sengoi de begei ajeh kipetiba nehukom Jenang ku diri ilei sendiri. 30Kerana ajeh, jeoi mai ku engkap engkek de nainyik ru naiselei ru mong juga de naidat. 31Amen hipiker canuk hik mong hibeh salahka tok nu Jenang, hik pek akan bihukom ya Jenang. 32Tapi amen Tuhan Kihukom hik hunen, Kek Kibeh begei ajeh Kaha-ajar ha hik supaye hik doh pek bihukom besama ru mai de pek naipecaya nu Ilei.

33Kerana ajeh, sesedara seiman, amen engkebekumpol ha Perjamuan Kudus, hodloh engkepoj ha mai kilek juga. 34Amen engkecuag, hodloh engkecakcak canuk ku padeg liengkek sendiri supaye engkek pek bihukom ya Jenang mase engkebekumpol besama. Tentang hal de kilek nij, eng doh ngajar engkek bile nghol nu engkek nij doh.

Currently Selected:

1 KORINTUS 11: AEH

Highlight

Copy