Markos 16

Rabaakohi ugut

(Maatiyos 28:1-8; Luukas 24:1-12; Yohannis 20:1-20)

1 Sambat tillaabe gedda, Magdalat Maryam, Yacqoob ina kin Maryam kee Saloome yedeynih alle yaskatoona ciloh, qamam dhaamen. 2Baxuurooko afti lellecih subxe, ayro boodak, amaa qabre fanah yedeyin. 3Sinne-sinneh lel: “Amaa duma amaa qabrih afko miyatti akko noh yaydalbako kinni?” arhxuk yinin. 4Aganalle kulux-yerhxin gedda lel, amaa dhayitti caazalle yindilbikeh yublin, amaati lel naba duma kuuk tine. 5Amaa qabredde oroben gedda, wuli gombi mizgi gabooko defeyeyaako, cado sara hashshiiteya yublin, usun lel birriigen. 6Usuk lel: “Mimashshiitina. Masqalakke takarimeh yine Naazret Yeesus wagiyak tanin. Usuk rabaako ugute, talle miyane. Carhah alle kaa hayen makaano ubula. 7Laakin aduwantaaki kaa katattaynit kee Bithroosuk, Galiila fanah ten afadde aduuk yanem akah warisha. Usuk akah sinak yerhxeekah amalle kaa tabloona kitin” akko yerhxe. 8Gilixih qathqath-arhxuk kee cibra adde tengelemhi sabbatah, yewcinyaako amaa qabreeko kuden, mashshiiteenimhi sabbatah lel walaa inkettak inkim marhxinnooni.#16:8 Gabah yunkuttube kutuubko gari shathri 9-20 fanah malooni.

Yeesus Magdalat Maryamah yambulluwe

(Maatiyos 28:9-10; Yohannis 20:11-18)

9[Baxuurot afti lellecidde subxe rabiiko ugute gedda, erherhih amaa malxina jinnetta akko yeyyeece, Magdalat Maryamah yumbulluwe. 10Ishi lel tedeyeyaako tamaa kaalih yine katattaynitih, axzinuk kee weecak yineyah akah warishshe. 11Usuk wafaalih yanem kee teyah yumbulluwem yoobbin gedda, maamaninnooni.

Yeesus lamma katattaynah yambulluwe

12Tayimik sarrah, tenko wuli lamma dikille inkidde aduuk, aki xibar abiteh akah yumbulluwe. 13Usun lel gaxenyaako raace marah warishen, usun laakin ten maamaninnooni.

Naba farto

(Maatiyos 28:16-20; Luukas 24:36-49; Yohannis 20:19-23)

14Amaymik sarrah, amaa inikan kee taman sinneh thawlalle cikkishiteenih beetak akah yumbulluweyaako, usuk rabiiko ugutemko sarrah kaa yuble mara maamaninnoonimhi sabbatah, ten imaan wayto kee afcaadot tiraareh ten yoskoolofe. 15Usuk: “Umbuka caalamalle aduwantaaki, umbuka makhluuqhuh Mece Ware warisha. 16Aamininnan tiya kee anthimmiqhinnantiya lel gargeerimoona kinon, aamininnixeti laakin yanqatstsaco kinni. 17Tamaa yaamine mari ta ishaarar yayballawna kinon: yi migacalle junuun yayyaacoona kinon, cusub afah lel waanishoona kinon; 18caror gabah yaaqhacoona kinon, akkinnan yagdife xinze yoocobiinimko lel ten yaazawo maki, laxuttemille gaba alle hayeenih urusoona kinon” akko yerhxe.

19Maddara kin Yeesus, tenlih waanishek sarrah, carshelle yumuqquceyaako, Yallih mizgi gabooko defeye. 20Usun yewcinyaako ummanille warroyshen, Maddari lel tenlih ashtuqhuluk yine, amaa farto lel tuumarah abah aysibituk yine.]

Currently Selected:

Markos 16: SCC

Highlight

Copy