Markos 15

Yeesus Bilaatosulle baahen

(Maatiyos 27:1-2,11-14; Luukas 23:1-5; Yohannis 18:28-38)

1Baarho maxte gedda lel, akkanih sheekhat manabottit, naba mara, sercat dhiiceenit kee umbuka arabaalih zate aben. Usun lel Yeesus yurhuynih beyenyaako Bilaatosulle yosxoyin. 2Bilaatos lel: “Atu Yahuud nugus kitoho?” yerhxeh kaa essere. Usuk lel: “Atu gantah arhxituk tane” yerhxeh alle yedebbe. 3Amaa sheekhat manabottit lel mangumuh kaa yiksisin. 4Bilaatos lel malammih: “Taxaye radde malito? Ayidhdhale kisse kolle baaheenim ubul” yerhxeh kaa essere. 5Yeesus laakin alle maadabbinna, amaymih Bilaatos cibrah rabe.

Bilaatos Yeesus masqalak takarimo yasxaye

(Maatiyos 27:15-26; Luukas 23:13-25; Yohannis 18:39—19:16)

6Usuk akkinnan Faasigi cidille amaa xiyawah usun farhinnan inki maxbuushsha akah ayyaacuk yine. 7Wuli diddeh cigirgir abak nabse aba maraalih xabshedde, Barabbaas akko yarhxin xiyawti yine. 8Amaa mango xiyaw Bilaatosulle yemeetiinih tamaa umman gedda abam akah abo kaa esseroona erherhishen. 9Usuk lel: “Yahuud nugus sinah dhirhiyo yok fadhdhaana?” arhxuk alle yedebbe. 10Amayim lel sheekhat manabottit ashshiinoh kayyalle kaa yosxoynih yiniinim yeerhegemhi sabbatah kinni. 11Sheekhat manabottit laakin Yeesus idhdhadde Barabbaas akah yawceekah, kaa esserimoona amaa mango xiyaw uguugusen. 12Bilaatos lel malammih: “Ta Yahuud nugus akko tarhxin xiyawto ayim isho kinni?” akko yerhxe. 13Usun lel malammih wac-yerhxiinih: “Masqalakke kaa takar” yerhxin. 14Bilaatos lel: “Aymih? Ayimti umaani abeh yane?” akko yerhxe. Usun laakin inkoh ziyaada andhadhdhaxeenih: “Masqalakke kaa takar” yerhxin. 15Amaymih Bilaatos amaa mango xiyaw xedenisho ciloh Barabbaas akah dhirhiyeyaako, Yeesus yumuttukeh, masqalakke takarimo kaa yosxoye.

Yeesusulle alle yaasulin

(Maatiyos 27:27-31; Yohannis 19:2-3)

16Sarrah amaa caskar Yeesus amaa masxadaadari naba care kin rooshanadde kaa orbisheenih, caskar filco kayyalle yeskettin. 17Diimayin sareena alle hayenyaako, wuli inkidde sawalime keenanti bor amokke akko hayen. 18“Maaxiyo gee, ko Yahuud nuguso!” arhxuk salaamta akah aben. 19Shambuqqottah amo akko yootokiinih, thuf alle yerhxinyaako, xishmah akah gululluubuwen. 20Alle tsaggarowak yiniinimko, amaa diimayin sareena akko yislibiinih, kaa sara alle hayen. Masqalakke kaa takaroona lel kaa yosxoyin.

Masqalakkehi takarimnan

(Maatiyos 27:32-44; Luukas 23:26-43; Yohannis 19:17-27)

21Aleksaander kee Ruufos abba kin Simcoon Kureeneeti xiyawti, zibooko amiituk yineya, amaa masqal yaaqhaco kaa xaylishen. 22Wuli Golgota akko yarhxin makaano (“Amot xanxantahi makaano” macnah leyalle) kaa baahen. 23Karbe adde tengele wayni yaacabo lel akah yoxoyin, usuk laakin maacabo. 24Masqalakke kaa takareenih, miya gufam yabloona cija alle cidenyaako, kaa sara sinne-sinneh xazziiliten.#Zaabur 22:18 ubul. 25Masqalakke kaa takareenim lel dhaxiine saaca sagal kuuk yine. 26Kaa kissehi kutuub lel taginah yanqirriye: “Yahuud nugus.” 27Wuli lamma umam-abeenitko, inketta mizgaako wuli tiya lel guraako masqalak kaalih takareenih yinin. [28“Usuk lel sercat malitidde loyyiime”#Isayas 53:12 yarhxe Kutuub lel yikmile.] 29Agaagaako tillaabak yine mari akah waatimak kee amom qinqin-ishak: “Haye haye, macbad dumusah adooxa lellecille malammih gina tiyak, 30ishi gargerteh, tamaa masqalko ob” arhxuk yinin. 31Amayim balih sheekhat manabottit kee sercat dhiiceenit sinne-sinneh tsaggarowak: “Aki xiyaw gargeere; ishe gargeero mirhiica. 32Masiix, Israa-eel nugus, nanu nubleh akah naamano kinok kado masqalko ooboo” arhxuk yinin. Kaalih masqalakke takarimeh yine mari gantah akah waatimak yinin.

Yeesus raba

(Maatiyos 27:45-56; Luukas 23:44-49; Yohannis 19:28-30)

33Taykinna lel lellecti abrha tekke gedda aykee kasit saaca adox fanah baarho dite tekkeh tine. 34Sagal-tarhxe saacah lel Yeesus: “Elohi, Elohi, lema shevaqtani” macnah: “Yi Rabbiyo, yi Rabbiyo, aymih yi xabte?”#Zaabur 22:1 arhxuk wac-yerhxeh zeere. 35Amalle daw-yerhxeh yine mari lel yoobbiinih: “Taykinna, Eliyaasah deecimak yane” yerhxin. 36Tenko wuliti yerdeyaako wuli thuththa cur-tarhxe wayniiko yemegeh: “Suganta, Eliyaas yemeeteyaako kaa oobishan kee nablo kinnik” yerhxeh shambuqqottakke hayeh yaacabo akah yoxoye. 37Yeesus lel wac-yerhxeyaako zeereyaako, kaa wafa tewce. 38Macbadti goleeni lel aganaako guba fanah lammalle candhiirhe. 39Amaa bool caskartiyah manabotti kaa nifidde daw-yerhxeh yineya, kaa wafa taginah tewcem yuble gedda: “Rummah tati Yallih Barha kuuk yine!” yerhxe.

40Amalle lel sayyo dherhikkeeko waacensiitak yinin, tenlih lel Magdalat Maryam, cindha Yacqoob kee Yoosees ina kin Maryam kee Saloome yinin. 41Usuk Galiilalle anuk, kaa katayeenih kaa yukhdumin, aki mango sayyo Yerusaalem fanah kaalih temeeteya lel yinin.

Yeesus Macaga

(Maatiyos 27:57-61; Luukas 23:50-56; Yohannis 19:38-42)

42Baarho dhumte gedda, Anqaraarabti lellec kuuk yineyaako, Sambatalle maaxak, 43wuli Arimatayaako kin Yoosuf, xishma-le arabaako kuuk yineya, isheh lel Yallih nigsinna wagiyaya, yifdibeyaako Bilaatosulle yedeeh, Yeesus rashsha kaa essere. 44Bilaatos lel usuk mece geddaako rabeh yinemih cibrah rabe. Amaa bool caskartiyah manabottah deecimeh lel usuk rabeh yanem kee miyanem kaa essere. 45Usuk rabeh yinem amaa bool caskartiyah manabottaako yeerhege gedda, amaa rashsha akah yoxoye. 46Yoosuf dabalaan maknaz dhaameh, masqalko kaa oobisheyaako amaa dabalaan maknazadde kaa yiknizeh, qooqhaxadde faraacime qabredde kaa yoocoge. Duma lel amaa qabrih carafadde akko alife. 47Magdalat Maryam kee Yoosees ina kin Maryam awla kaa yoocogem yublin.

Currently Selected:

Markos 15: SCC

Highlight

Copy