Luukas 6

Yeesus Sambat Maddara kinni

(Maatiyos 12:1-8; Markos 2:23-28)

1Tekke lel, Yeesus wuli Sambatah ilaw dhageeko tillaabak yine. Kaa katattaynit lel ilaw zalaala yiqhinthibiinih gabah xishiyak beetak yinin. 2Faarisiinko gari lel: “Aymihi Sambatah takko ammissilinnixem abtaanaam?” akko yerhxin. 3Yeesus lel: “Dawud safriite gedda kaalih yine mara kee isheh ayim abem maqhrayinnitiini? 4Yallih caredde orobeh, sheekhaako bextih farhinnanti beeto masmuux akkinnexe yisiddiqhin folo beyeh beeteyaako kaalih tinemih yoxoye” yerhxeh radde akah yoxoye. 5“Xiyawti Barhi lel Sambat Maddara kinni” akko yerhxe.

Kafte gaba le xiyawto

(Maatiyos 12:9-14; Markos 3:1-6)

6Tekke lel, aki Sambatah usuk sunagoogedde orobeh aydurusuk yine. Amadde lel mizgi gaba akko kafte xiyawti yine. 7Sercat dhiiceenit kee Faarisiin lel akah kaa yaksisin takale geyoona ciloh, Sambatah urusam kee kaa macalsiitak yinin. 8Usuk laakin ten xasaab yeerhege. Amaa kafte gaba le labhattok lel: “Ugutaaki ta fanalle daw-erhex!” akko yerhxe. Usuk lel uguteh amalle daw-yerhxe. 9Yeesus lel: “Iski sin essero, Sambatah mecaani abaanam masmuux kinni, woole umaani? Aniina gargeeraanama woole yaylanimi?” akko yerhxe.

10Maklaliteh inkoh tenadde kulux-arhxuk lel: “Ishi gaba iyfiddig!” akko yerhxe. Kaa gaba lel akah tineekah gaxte. 11Usun lel xurtaameh yemmeegiinih Yeesus ahe kaa ishaanamadde sinne sinneh zatteyak yinin.

Fartottitti lamman kee taman

(Maatiyos 10:1-4; Markos 3:13-19)

12Amaa waqhtedde lel tekke, Yeesus yassallaw koomalle yewceh amalle muluu bar Yallah assilluuk dhiine. 13Baarho maxte gedda, ishi katattaynitih deecimeh, tenko lamman kee taman doore. Fartottit yarhxe migac lel akah yoxoye.

14Usun lel: Simcoon (usuk Bithroos akah yeyyeeceya) kee kaa sacal Indiryaas; Yacqoob kee Yohannis; Filibboos kee Bartolomaayos; 15Maatiyos kee Toomaas; Alfaayos barha kin Yacqoob, wathan-kixin kin Simcoon; 16Yacqoob barha kin Yahuuda kee Yahuuda Iskariyoot, amaa kaa yosxoyeya, kuuk yinin.

Yeesus mango xiyaw yayduruse

(Maatiyos 4:23-25)

17Usuk lel tenlih oobeh wuli dudubulle daw-yerhxe. Amalle lel mango kaa katattaynit kee mango xiyaw umbuka Yahuudiya, Yerusaalem, Tsoor kee Tsiidoonti badti gimomko yinin. 18Usun lel kayya yaabboona kee sinni laxuuko uroona yemeetin. Amaa najaasa-le ufayitih amcizzibuk tinem lel uren. 19Kaako yawce xayli inkoh ten urusak yinemhi sabbatah, amaa xiyaw inkoh kaa dhagoona farhak yinin.

Dhaaco kee asuuso

(Maatiyos 5:1-12)

20Ishi katattaynitidde kulux-yerhxeh lel: “Yallih nigsinna sinah kinamhi sabbatah, baaxentitik baraka-lem kitin.

21Xayittoona kitiinimhi sabbatah, kado safrittamak baraka-lem kitin. Taasaloona kitiinimhi sabbatah, kado wectamak baraka-lem kitin.

22Xiyawti Barhih hidhdhadde xiyaw sin yancibin gedda, sin barhishan gedda, sinah waatimaanah, migac sinak yashshaamin gedda, baraka-lem kitin.

23Taykinna lel, sin casbi carshelle naba tiya kinamhi sabbatah, amaa lellecidde xedena, xedenih lel tirtira. Amayim lel ten abbub nobowak abeenim tayim balih kinamhi sabbatah kinni.

24Laakin gaddaalitik sinni raaxa geyteenih taniinimhi sabbatah, sin careyta!

25Kado teleggemik safrittoona kitiinimhi sabbatah, sin careyta! Kado taasulemik taxzanoona kee wectoona kitiinimhi sabbatah, sin careyta!

26Umman xiyaw faylishan gedda, sin careyta! Amayim lel ten abbub zirabti nobowah abeenim tayim balih kinamhi sabbatah kinni.

Sinni nacabtoolit ikxina

(Maatiyos 5:38-48; 7:12)

27Laakin ta yi aabbuk yane marak sinak arhxiyuk ane: ‘Sinni nacabtoolit ikxina, sin nicib marah lel mecem akah aba. 28Sin abaara marah ten eybeereka, sin yaaziye marah dhaaco akah aba. 29Dhaban kok safuce tiyah, malammit dhaban akah uxuu, natslala kok beye tiya lel, qamish yakkeedo kaa mikalitin. 30Kodde esseriminnan tiyah, akah uxuu, akkinnanti kum kok beyemko lel, koh yadabbo kaa messerin. 31Kottah aboona akah fadhdhaakah lel, aki xiyawah yakkeedo amaa ginah akah ab. 32Sin kixin mara takxinin gedda lel, cawatah ayim litiini? Zambi-wannun gantah ten kixin mara kixinon. 33Mecem sinah aba marah mecem abtan gedda lel, cawatah ayim litiini? Zambi-wannun yakkeedo amaa ginah aban. 34Sinah yadabboona akko ilaltan mara taylikkixin gedda lel, cawatah ayim litiini? Yoxoynim akah gaxto ciloh, zambi-wannun yakkeedo zambi-wannun yaylikkixin. 35Laakin, tenko inkim akko ilaalekkah, sinni nacabtoolit ikxina, mecem akah aba, ten lel iylikkixa. Sarrah sin casbi naba tiya yakko kinni, atin lel Nabamko Naba tiyahi cindham takkoona kitin. Amayim lel usuk cawat maliila kee uma marah mecemhi sabbatah kinni. 36Sin Abba naxrurta akah leyaakah, naxrurta-lem tika.’

Aki xiyaw yafridiinim

(Maatiyos 7:1-5)

37Mafradina, tamfirridinki. Micadalina, caddalsimtanki. Eseemexa, tamsaamaxoonak. 38Uxuwa sinah tamxawok. Meceetih qiyaas, guballe thiicimeh sitta yibbirheh xarhitandah yenqeeseya sin galedde sinah xarhito kinni. Amayim lel atin akah teqheesiiniikah sinah tanqaaso kinamhi sabbatah kinni” akko yerhxe.

39Usuk ta aymassal gantah akah warishe: “Inti-mali inti-male yaymaraxo dhiica? Inkoh boozodde miradaana?

40Katattayni ishi mudarrisko minaba. Meceetih yudruseti laakin ishi mudarrisih yammingide. 41Ku intikke yane gunde tablo akko waytaya, ku sacalhi intik yane askurta aaginah duhta? 42Ku intikke yane gunde akko tablo waytaya, ishi sacalakke: ‘Ku intiiko askurta koh ayyaaco’ aaginah akko tarhxe? Ko munaafiqhto, tookomeh ishi intiiko gunde eyyec, sarrah ishi sacalhi intiiko askurta tayyaaco meceetih tablo kitok.

Xarha kee tee daro

(Maatiyos 7:15-20; 12:33-35)

43Mece xarha uma daro bahtaya mitane. Uma xarha mece daro bahtaya lel mitane. 44Akkinnan xarha ishi daroh tamidhdhige. Amayim lel keenan-leeko indacaari daro mizaggimta, cinab lel keenan-le xorhko miyakatte. 45Mece xiyawti ishi afcaadohi mece cukraako mecem yayyaace. Umati lel ishi afcaadohi uma cukraako umam yayyaace. Amayim lel mige kin ishi afcaadooko kaa af waanishamhi sabbatah kinni.

Sinni care qooqhaxakke siraxa

(Maatiyos 7:24-27)

46Aymihi anu sinak arhxem maabtaana hanuk ‘Maddara, Maddara’ yok tarhxiinim? 47Yottalle amiitinnanti, yi waani yaabbeh abittodde ashishati, miyattoh higgidam sin ayballaw kiyo. 48Usuk care siraaxak sam-isheh guballe faraaceh, qooqhaxak yiymisrite xiyawto balih kinni. Meceetih siraaximemhi sabbatah, sirii laye temeeteh weeci amaa carek yootoke gedda, minkix-isho taane. 49Laakin yi waani yoobbeh abittodde ashishinnixeti, baarholle masarrat hinnim care siraaxe xiyawto balih kinni. Weeci amaa carek yootoke gedda, amaa cari amalle anuk dume. Amaa cari nabaatih raasa yekke.”

Currently Selected:

Luukas 6: SCC

Highlight

Copy