Luukas 5

Yeesus afti katattaynit doora

(Maatiyos 4:18-22; Markos 1:16-20)

1Tekke lel, mango xiyaw Yallih waani yaabboona kaa wakalille antseqheeqhethuk, usuk Gennesaaret igil hi afak daw-arhxuk yine 2Igil afalle lel lamma jalba yuble. Caasa tagoofofem laakin akko oobeenih sinni caasat intilel cakalishaa yinin. 3Amaa jalbabko wuli tiyadde (Simcoon tiyä kintiyä) koreh, baarhooko lel dagum addalle mirix-isho kaa essere. Usuk lel defeyeh xiyaw amaa jalbaako yuyduruse.

4Waani abayshe gedda lel Simcoonuk: “Maraba fanah orbishsheh sin caasat intilel agaafafah oobisha” akko yerhxe 5Simcoon lel: “Mucallimo, muluu bar xawalneh walaa inkim mabbarhino! Ku waanih laakin ta caasat intile oobisho kiyo” yerhxeh alle yedebbe. 6Tayim aben gedda lel xadde hin caasa yibbirhiinih ten caasat intilel candhiirho erherhishe. 7Aki jalbadde yine ten zoobah lel ten xatoona akah yiymikniin. Usun yemeetiinih lel lamma jalba tamandhaco erherhishshandah yemegin. 8Simcoon Bithroos tayim yuble gedda, Yeesusko gulubulle akko radeh: “Maddara, anu zambi-wanna kiyom hi sabbatah, mirix yok erhex” yerhxe. 9Tayim lel kaa kee kaalih tinem inkoh amaa agoofofuk yibbirhin caasah yussuxuttutiinih kinni. 10Yacqoob kee Yohannis Zibdi cindham, Simcoon zooba kinya yakkeedo amayim balih. Yeesus lel: “Mimashshiitin. Kadooko lakalle xiyaw yabbirhe tiya takko kito”. 11Usun lel jalbab baarholle yeyyeecinyaako ummanim xabeenih kaa katayen.

Yeesus wuli saknite tiya yaysiffiye

(Maatiyos 8:1-14;; Markos 1:40-45)

12Usuk daafofko wuli tiyalle anuk, taykinna lel wuli saknah yemmeege xiyawti yine. Usuk Yeesus yuble gedda, nifih radeh kaa dhaacimak: “Maddara, fadhdhemko yi taysaffawo dhicta” yerhxe. 13Usuk lel ishi gaba dhirhiyeyaako kaa yibbirheh: “Anu farha, imsiffii” akko yerhxe. Akkanih lel sakna akah xabte. 14Walaa inkettah warishamko lel kaa asuuse. “Laakin aduwaaki ishi nabse shekh uybulluu. Tenah shahaada takko lel ishi thahaarah Moosa yeezezem balih muttuxuwa bah” akko yerhxe.

15Kaa wari laakin faax-arhxuk faax-yerhxe. Mango xiyaw lel kaa yaabboona kee sinni laxuuko uroona kayyalle yekeekettin. 16Usuk laakin zibolle yacrhiyeh assilluuk yine.

Yeesus wuli kafe tiya urusa

(Maatiyos 9:1-18; Markos 2:1-12)

17Wuli max lel tekke, usuk aydurusuk yine. Umman Galiila kee Yahuudiyaati diikaako kee Yerusaalemko temeete Faarisiin kee sercat mudarrisiin lel amalle defeyak yinin. Uruso lel Maddari xayli kaalih yine. 18Taykinna lel, wuli labha kafe xiyawto barellalle baahen. Addadde kaa orbisheenih lel kaa rigidille carhah hayoona farhak yinin. 19Mango xiyawhi sabbatah addadde kaa orbishoona afa wayen gedda laakin, cari bukak koren. Xalel faakeenih lel kaa kee kaa barellaalih hallaahallisheenih fantalle Yeesus rigidille oobishen 20Ten imaan yubleh lel: “Ko xiyawto! Ku zambit koh xabbiimeh yane” akko yerhxe. 21Sercat dhiiceenit kee Faarisiin lel: “Miyatto kinni waatimak yaneti? Yalla bisaako bextih, miyatto kinni zambe xabshiishati?” arhxuk yaxaasaboona erherhishen. 22Yeesus laakin ten xasaab yeerhegeh taginah alle yedebbe: “Aymihi ta gina lem sinni afcaadodde taxeesebiinim? 23‘Ku zambit koh xabbiimeh yane’ yarhxiinim kee ‘Ugutaaki aduu’ yarhxiinimko awlihim ruhuwa? 24Amaydo, Xiyawti Barhi zambe baarholle xabshiisho reeza lem taarhagoona ciloh, ‘Kok arhxiyuk ane: ugutaaki ishi barella tuttuqhuceh careh aduu’ (akko yerhxe amaa kafe tiyak)”. 25Akkanih ten nifille uguteh lel amaa carhah alle yine tiya yuttuqhuceh, Yalla aynabuk ishi careh yedee. 26Inkoh lel cibrah qalbe xaben, Yalla aynabuk, mashshih yemmeegiinih lel: “Kaafa bexsishsha xaaja nuble” yerhxin.

Yeesus Leewih deecima

(Maatiyos 9:9-13; Markos 2:13-17)

27Irolle yewcemko sarrah lel Leewi akko yarhxin miiri yaskatte, miiri alle yaskattin caralle defeyak yuble. “Yi kataa” lel akko yerhxe. 28Ummannim xabeh lel uguteh kaa kataye. 29Leewi lel ishi carelle naba cazuuma akah abe. Mango miiri yaskattit kee aki xiyaw lel tenlih maaddille cikkishiteenih yinin. 30Faarisiin kee sercat dhiiceenit lel kaa katattaynitille: “Aymihi miiri yaskattit kee zambi-wannunlih bettaanah taacubiinim?” yerhxiinih alle yongoroozomin. 31Yeesus lel: “Xaakim farhshiisha mari laxuute mara kibah caafiyat-le mara maki. 32Zambi-wannun tooballe kibah xaqqi-wannunuh deecimo maamatiyo” yerhxeh alle yedebbe.

Siyaam essero

(Maatiyos 9:14-17; Markos 2:18-22)

33Usun lel: “Yohannis katattaynit mangole gedda yasoomiinih yassilliin, Faarisiinim amayim balih. Kum laakin beetaanah yaacubin” akko yerhxin. 34Yeesus lel: “Waraddi, marcawwi tenlih anuk taysaamoona dhictaana? 35Marcawwi tenko beyan waqhti yamaato kinni. Amayek sarrah lel amaa waqhte yasaamoona kinon” akko yerhxe. 36Wuli aymassal yakkeedo akah warishe: “Gamde cusub sareenaako candhisheh zirte sareenadde yayrhibbisheti miyane. Abemko lel cusub tiya candhisho kinni. Cusub gamdi lel zirte tiyaalih miyamseene. 37Cusub wayni lel zire waynit idritidde hayati miyane. Abemko lel cusub wayni amaa waynit idrit fotkishsheh xarhitto kinni. Amaa waynit idrit lel caynito kinni. 38Cusub wayni laakin cusub waynit idritidde gaxto alle tane. 39‘Awwalim tashshe’ yarhxemhi sabbatah lel awwal wayni yoocobek sarrah cusub wayni duumutati miyane.”

Currently Selected:

Luukas 5: SCC

Highlight

Copy