Luukas 7

Yeesus boolti mas-uulhi garuzzo urusa

(Maatiyos 8:5-13)

1Yeesus, kaa aabbuk tine xiyawlih inkoh ishi waani abayshek sarrah, Kafarnaxuumudde orobe. 2Amalle lel, wuli bool caskartiyah manabotti mangum kaa xishmata garuzzi, laxuuteh rabi kab-isheh yine. 3Amaa bool caskartiyah manabotti lel Yeesus ware yoobbe gedda, yemeeteh kaa garuzzo akah uruso, wuli Yahuud naba mara alle fare. 4-5Usun lel Yeesus fanah yemeetiinih: “Usuk ni ummat kixina, ni sunagooge abtem lel kayya kinamhi sabbatah, tayim akah abto akah meedda” yerhxiinih sirii ginah Yeesus dhaacimen. 6Yeesus lel tenlih yedee. Amaa bool caskartiyah manabotti ishi soxoba tahe akko yarhxoona alle fare gedda, usuk amaa careeko dheerhuk miyine: “Maddara, atu yi carelle tamiitem akah missil tiya makiyo, mixawalin 7Amaymih kinni lel kottalle yamiitiinim yoh eeddam maaxasabinniyom. Laakin, atu waanitta erhexaaki yi khaddaam urus. 8Amayim lel inni geridde liyo caskarlih, anu gantah inneh reezat geridde yane tiya kiyo. Wuli tiyak, ‘Aduu’ akko erhxemko, yadiye, akettok lel, ‘Amo’ akko erhxemko, yamiite, inni khaddaamak, ‘Tayim ab’ akko erhxemko abamhi sabbatah kinni.” 9Yeesus tayim yoobbe gedda, cibrah rabe. Kayyadde kataak tine mango xiyawadde ufkun-yeh lel: “Ta gina le naba imaan Israa-eelille yakkeedo migeyinniyom sinak arhxiyuk ane” akko yerhxe. 10Amaa farritime mari carelle gaxen gedda, amaa garuzzi ureh akah suge.

Yeesus gubnat barha rabaako ugusa

11Amayek sarrah lel Yeesus akkanih Naayin akko yarhxin daafo fanah yedee. Kaa katattaynit kee amaa mango xiyaw lel kaalih yedeyin. 12Usuk daafot carafah kab-yerhxe gedda, taykinna lel rashshi amuqqucuk akah suge. Amaati lel gubna kin kaa ina inkettak luuk tine barha kuuk yine. Daafooko lel mango xiyaw aalih tine. 13Maddari teya yuble gedda, raxmah uluc akko xadhdhemhi sabbatah: “Miweecin” akko yerhxe. 14Yeesus lel yemeeteh amaa rashsha gabah dhage, amaa aaqhucuk tinem lel daw-yerhxin. Usuk lel: “Ko burgudda, ugut kok arhxiyuk ane!” akko yerhxe. 15Amaa rabeti lel defeyeh waanisho erherhishe. Yeesus lel kaa inah kaa yedebbe. 16Inkoh mashshi ten tibbirheh: “Naba nabii ni fanko yewce”. “Yalli ishi xiyaw xato yemeete” arhxuk Yalla yaynaboona erherhishen. 17Ta wari lel umbuka Yahuudiya kee umbuka amaa wakalille yomobbe.

Fartottit Yaythimmiqhe Yohannisko

(Maatiyos 11:2-19)

18Yohannis katattaynit lel tayimhi ware inkoh akah baahen. Yohannis lel ishi katattaynitko lammaah deecimeh 19“Amaa yamaato leti kotta kinni woole aketto ilalno nolle tane?” yerhxiinih kaa esseroona Maddara fanah ten fare. 20Amaa xiyaw lel Yeesus gufen gedda tahe akko yerhxin: “Yaythimmiqhe Yohannis ‘Amiituk yaneti kotta kinni woole aketto ilalna?’ yerhxeh ku essero ni fare.” 21Usuk amaa geddaako, mango mara laxuu, waaxelta kee uma ufayeko ten uruse. Mango mari inti-malit kinya lel yabloona ten dhicshiishe. 22Yeesus lel: “Aduwantaaki Yohannisih tubliinim kee toobbiinim akah warisha: inti-malit yablin, tumunkusem yadiin, saknittem yamsiffiin, cokka-malit lel yaabbin, rabtem ugutan, baaxentit Mece Ware yambissirin. 23Yi sabbatah xoolashshiitinnixeti, baraka-letiya kinni” yerhxeh alle deheye.

24Yohannis fartottit yedeyin gedda, Yeesus amaa mango xiyawlih Yohannis zacabah waanisho erherhishe: “Ayim tabloona zibolle tewciini? Xaaxatti waxwax-isha shambuqqo? 25Laakin ayim tabloona tewciini? Carha-mece sara sarite xiyawto? Taykinna lel, xarer kin sara sarittem kee raaxah martam nugus rooshanadde yanin. 26Amaydo, ayim tabloona zibolle tewciini? Nabii? Yoo, usuk rummah nabiiko aganalle kinam sinak arhxiyuk ane. 27‘Taykinna, ku basolle ku arax yasqarrabo le inni luukta ku nifidde dhirhiyak aniyo’#Mal-aakhi 3:1 yarhxiinim kaa sabbatah akko tunkuttubeti kayya kinni. 28Sayyooko toobokemidde, Yohannisko nabati miyanem inkinnah sinak arhxiyuk ane. Yallih nigsinnadde ummanimko cindhati laakin kaako naba.” 29Amaa tayim toobbe xiyaw kee miiri yaskattit gantah, Yohannis athammaqhah yimthimmiqhiinih yiniinimhi sabbatah, Yalli xaqqi-wanna kinam yeerhegin. 30Faarisiin kee sercat dhiiceenit laakin, Yohannisih manthammaqhinnoonimhi sabbatah, Yalli tenah farhe xagara xinen.

31“Ta ijoh xiyaw miyaalih aybalaalawo liyo? Miyahle higgidooni? 32Usun cadaagat fanalle defeyaanah sittah deecimak: ‘Machambara sinah nootoke, margaditiini; xazanah sinah zerne, miweecitiini’ yarhxe irroh higgidon. 33Yaythimmiqhe Yohannis folo beetak hido wayni aacubuk maamaatinna, atin lel: ‘Jinnetta leya!’ tarhxin. 34Xiyawti Barhi beetak kee aacubuk yemeete, atin lel: ‘Kaa ubula! Beeteena, sakraan, miiri yaskattit kee zambi-wannunhi carke’ tarhxin. 35Xikma laakin inkoh ishi cindhamah titxiqqiqhe.”

Zambi-wanna kin numa xabbot geyte

36Faarisiinko wuliti lel Yeesus kaalih beeto kaa essere. Usuk lel Faarisiiti caredde orobeh maaddille defeye. 37Taykinna lel amaa daafolle wuli zambi-wanna kin numa tine. Usuk Faarisiiti caredde maaddille defeyak yanem teerhege gedda, wuli alabaastiros akko yarhxin dhayittooko siraaximte tharmuuz cithirlih bahte. 38Caazaako kaa ibih afalle daw-terhxeh weecak ishi dhiimoh kaa iba arhurhusso erherhishshe. Ishi amohi dagarah akah tukteh lel kaa iba fugutteh, amaa cithirih lel akah tuskute. 39Amaa kayya yiczimeh yine Faarisiiti tayim yuble gedda, ishi qalbedde: “Ta xiyawti nabii yakkeedo, kaa dhagak tane tiya aaginale numa kinam kee zambi-wanna kinam aarhige dhaarhe” yerhxe. 40Yeesus lel: “Simcoon, kok arhxem liyo” yerhxeh alle yedebbe. Usuk lel: “Mudarris, yok erhex” akko yerhxe. 41“Wuli maylakkaxi lamma mallakkaxa luuk yine. Wuli tiyadde koona bool, wuli tiyadde lel kontom diinaar luuk yine. 42Cida akah yadabboona taanen gedda lel, inkoh ten yeseemexe. Amaydo, lamma tenko miyatti mangum kaa yakxano kinni?” 43Simcoon lel: “Mango cida akah yeseemexe tiyah yolle higgida” yerhxeh alle yedebbe. Yeesus lel: “Meceetih tifride” akko yerhxe. 44Amaa numalle yufkuneh Simcoonuk: “Ta numa table? Anu ku caredde orobe. Atu yi ibah laye yoh maaxayinnito. Ishi laakin yi iba ishi dhiimoh arhurhusseh, ishi dagarah tukteh tane. 45Atu fugto yoh mikuurhito. Ishi laakin anu orobemko taahe, yi iba fugutaanam xabteh mitane. 46Atu zeetih amo yoh maskatito. Ishi laakin cithirih iba yoh tuskuteh tane. 47Amaydo kok arhxiyuk ane, ishi mangum tikxinemhi sabbatah tee mango zambi akah xabbiimeh yane. Dagum akah xabbimteti laakin dagum yakxine” akko yerhxe. 48Yeesus lel teyak: “Ku zambi koh xabbiimeh yane” akko yerhxe. 49Amaa kaalih beetak tinem lel sinne-sinneh: “Miyatto kinni tati, zambe gantah xabshiishati?” yarhxoona erherhishen. 50Usuk lel amaa numak: “Ku imaan ku gargeereh yane. Isheh salaamadde aduu” akko yerhxe.

Currently Selected:

Luukas 7: SCC

Highlight

Copy