Luukas 1
1
Tabarruc Te-ofilosuh
1Mangum xishma-le Te-ofilos, mango mari amaa ni fanadde tikmile zantahim yaskattoona yicikkiniinik sarrah, 2amaa erherhaako intih yuble mara kee Kalimat khaddamti kuuk yine maraako nottalle tillabtem balih, 3anu gantah erherhaako ummanim xeelaalih katattayemko sarrah, rigah koh aktubem meceh yolle yimmingide. 4Amayim lel tamaa tuydurusem thummut kinam taarhago ciloh kinni.
Yaythimmiqhe Yohannis yaabako kinam yerhxiinih yinin
5Yahuudiyaati nugus kin Heerodesti max, Abiyyaati filcooko kin Zakariyya akko yarhxin shekh yine. Haaruun zaraako kin Elsaabeth akko yarhxin numa lel luuk yine. 6Usun inkoh Yallih wajhelle xaqqi-wannun kuuk yinin. Usun lel inkoh Maddari amrit kee obsadde cadale hinnim gerhak yinin. 7Elsaabeth gedme kuuk tinemhi sabbatah cindham luuk miyiniini. Lellec akko tillaabe baarrit lel inkoh kuuk yinin.
8Zakariyya Yallih wajhelle ishi filcohi ibreh shekh yekkeh akhdumuk, 9sheekhinooti cayda balih, Maddari macbadadde orobeh caydarruus ceerisho cija kaa gufte. 10Amaa caydarruus waqhte lel inkoh tekette xiyaw irolle assilluuk yinin. 11Maddari malaykatti lel amaa caydarruus mazbaxalle mizgi carhaako daw-yerhxeh akah yumbulluwe. 12Zakariyya kayya yuble gedda yomroocode, gilix lel kaa yibbirhe. 13Amaa malaykatti laakin: “Zakariyya, ku duca tomobbeh tanemhi sabbatah mimashshiitin. Elsaabeth ku numa lel barha koh bahto kinni. Yohannis yan migac akah tayyaaco kito. 14Atu xeden kee mango cafad taallo kito, kaa ubkalle lel mango mari xedento kinni. 15Amayim lel usuk Maddari wajhelle naba tiya yakko kinamhi sabbatah kinni. Wayni kee khamre yaacabo maki. Inat garbadde aniikoh, Quddus kin Ufayeh yammaago kinni. 16Israa-eel dhaylo mango mara lel Maddara ten Yallalle yadabbo kinni. 17Eliyaas ufaye kee xaylaalih usuk Maddaraako yookomeh yamaato kinni. Abbubti afcaado cindhamalle, amre xina mara lel kas-le xaqqi-wannunulle yadabbo kinni. Ummat lel Maddarah yinthirrifiinih akah sugaanaakah akko abo kinni” akko yerhxe.
18Zakariyya lel malaykattok: “Anu baarra kiyo, yi numa lel cumreh lellec akko tillaabe tiya kinamhi sabbatah, tayim aaginah aarhago kiyo?” akko yerhxe. 19Malaykatti lel “Anu Jibriil kiyo, Yallih wajhelle daw-yerhxeh yane tiya kiyo. Kottaalih waanisho kee ta bissiraata koh baaho farritime. 20Yi waani ishi waqhteh takmalo leyah atu maamanitomhi sabbatah, taykinna lel, tayim takke max fanah sik-terhxeh waanishsho dhiicinnixitom takko kito” yerhxeh radde akah yoxoye. 21Xiyaw lel Zakariyya ilaalak yinin. Macbadadde caawitem lel cibra akah yekke. 22Yewce gedda lel tenlih waanisho mirhiicinna. Macbadadde mablo yublem lel yeerhegin. Gabah lel akah aymiknuuk yine, naxar-male yekkeh lel raace.
23Kaa khadaamahi waqhti yikimile gedda, usuk ishi careh gaxe. 24Amaa maxko sarrah Elsaabeth kaa numa soonoyitte. Koona alsa lel ishe sucusse. 25“Tayim Maddari ishi intih kulux yodde yerhxe max yoh abem kinni. Xiyaw fantaako lel yi xoola asac yoh ishe” terhxe.
Yeesus yaabako kinam yerhxiinih yinin
26-27Lix-ya alsadde lel malaykatti Jibriil, Naazret akko yarhxin Galiilaati daafolle, Dawud meelaako kin Yoosuf migacah le labhattodde timliishe dhaggitinnexe barhä fanah Yallaako farritime. Amaa dhaggitinnexe barhähi migac lel Maryam kuuk yine. 28Alle yemeeteh lel: “Nagaa! tinkixxine-tiyawo, Maddari kottaalih yane!” akko yerhxe. 29Ta waanih lel mangum temlelekke. Aaginale salaamta yakko kinam lel texeesebe. 30Malaykatti lel: “Maryamo, Yallaako nicma geyteh tanitomhi sabbatah, mimashshiitin! 31Taykinna lel, soonoyitteh barha bahto kito. Kaa migacak lel Yeesus akko tarhxo kito. 32Tati naba tiya yekkeh Nabamko Naba tiyahi Barhah decsiimo kinni. Maddara kin Yalli lel Dawud kaa abbahi nugus-kurse akah yaxaw kinni. 33Yacqoob meelahi bukalle lel umman geddah reezo kinni. Kaa nigsinna lel abayshima taallo maki” akko yerhxe 34Maryam lel malaykattok: “Anu labhatto maarhige hanuk, tayim aaginah takko kinni?” akko terhxe. 35Malaykatti lel “Quddus kin Ufayi kolle oobo kinni, Nabamko Naba tiyahi xayli lel ku silaalisho kinni. Amaymih lel, tamaa yaabuketi Quddus kin tiya kee Yallih Barhah decsiimo kinni. 36Taykinna lel, Elsaabeth ku ahlentö gantah ishi baarrinoolih barhalle soonoyitte. Gedmeh decsiima tinemko, kado tati tee lix-ya alsa kinni! 37Yallaalih akkinnexem mitane” yerhxeh radde akah yoxoye. 38Maryam lel “Taykiyo lel, anu Maddari garuzzö kiyo. Ku waanitta balih yoh takkoo” akko terhxe. Malaykatti lel xabeh akko yedee.
Maryam Elsaabeth gufta
39Amaa waqhtedde ugutteh lel iba-lacteh wuli Yahuudiyaati koomah daafo fanah tedee. 40Zakariyyaati caredde orobteh lel Elsaabethik salaam terhxe. 41Elsaabeth lel Maryam salaamta toobbe gedda, laatseeni tee garbadde gerraace. Elsaabeth lel Quddus kin Ufayeh temmeege. 42Wac-terhxeyaako andhax xaf-ishsheh lel tahe terhxe: “Atu umman sayyooko baraka le tiya kito, ku guzehi daro lel baraka-le! 43Anu aamottä ekke gedii, yi Maddarih ina yolle tamiitem? 44Taykinna lel, ku salaamtahi dhaw yi cokka gufe gedda, yi guzedde laatseeni xedenih gerraace. 45Amaa Maddari akko yerhxem takmalo kinamah teemene tiya lel, ishi baraka-letiyä kinni.”
Maryamti faylat margadde
46Maryam lel:
“Yi rooxi Maddara yaynabe,
47-48Usuk ishi garuzzohi ramacta duheh yanemhi sabbatah lel,
yi ufayi Yalla yi Gargeereenah mangum cafada.
Taykinna lel, kadooko lakalle umman ijo dhaacole yok yarhxoona kinni.
49Amaa Dhiiceeni lel, naba xaaja yoh abeh yanemhi sabbatah,
quddus kinni lel kaa migac.
50Kaa mashshiita marah lel, kaa raxma ijooko ijolle kinni.
51Ishi agadah quwa le xaaja abeh yane.
Sinni afcaadodde amnonobbaati ekkal le mara faax-isheh yane.
52Xayla le mara ten nugus-kursitko sam-isheh yane,
ramacta kin mara lel xaf-isheh yane.
53Safrittem mece xaajah yemegeh yane,
gaddaalit lel foyyak ten hadaneh yane.
54-55Amaa ni abbubuk akah yerhxeekah,
Abraahim kee kaa azaralle umman geddah alle raxmato kinam azikkiruk,
Israa-eel ishi khaddaam xateh yane” terhxe.
56Maryam lel adooxa alsa takkem teelih sugteh ishi careh gaxte.
Yaythimmiqhe Yohannis hi ubka
57Elsaabeth umulta waqhti gufe gedda, barha bahte. 58Tee xuggit kee tee ahle lel Maddari naba raxma teyalle yuybulluweya yoobbin. Usun lel teelih cafaden. 59Baxar-ya max lel amaa zabalooko askok akko kaloona yemeetin. Zakariyya kaa abbahi migac lel akah yayyaacoona farhen. 60Kaa ina lel: “Maale, Yohannis akah nayyaaco kinni” terhxeh radde akah toxoye. 61Usun lel: “Ku ahleeko ta migac leti miyane” akko yerhxin. 62Usun lel kaa abbah akah aymiknuuk miyatto akah yayyaaco farham kaa esseren. 63Usuk lel lux esserimeh: “Kaa migac Yohannis kinni” yerhxeh yuktube. Usun lel inkoh cibrah raben. 64Akkanih lel kaa af fakkite, kaa anrab lel yimfittixe. Yalla faylishak lel waanishe. 65Umbuka ten xuggit lel gilixih raben. Tayim lel inkoh umbuka Yahuudiyaati koomalle warroyte. 66Inkoh tayim yoobbe mari lel sinni afcaadodde hayen. Maddari gaba kaalih tinemhi sabbatah lel: “Ta zabuli ayim yakko kinni?” arhxuk yinin.
Zakariyya takko lem yubleh yineya
67Zakariyya kaa abba lel Quddus kin Ufayeh yemmeege. Nabii balih waanisheh lel:
68“Ishi ummat gufeh yeyyeecemhi sabbatah,
Maddara, Israa-eel Yallah fayla takkoo.
69-70Kalxaako quddus kin ishi nobowat afko akah waanisheekah,
Dawud ishi khaddaamhi caredde,
xayla le Gargeereena noh baahe.
71Ni nacabtoolitko kee umbuka ni nicib marahi gabaako lel ni gargeero kinni.
72Usuk tayim abem lel ni abbubulle raxmato kee
ishi quddus kin cahde yazzakkaro,
73ni abba kin Abraahimih dhiiwite dhiiwa kinni.
74-75Nacabtooli gabaako ni yiysillimem,
umbuka ninni lellecille kaa nifidde tinqiddisem kee xaqqi-wannun nekkeh,
mashshi hinnim kaa nacbado ciloh kinni.
76Zabalo atu lel, Nabamko naba tiyahi nabiih decsimto kitom,
kaa afadde tadaw kee Maddari arax taymaaco kitom hi sabbatah kinni.
77Kaa ummat zambi xabbot akah geyan gargerti irhga taxawo kito.
78Ni Yallahi qalbi raxmahi sabbatah,
maaxi aganaako ni gufo kinni,
79amaati dite kee rabit silaladde defeya marah ifishah,
ni iba lel salaam gabolle yaymirixe” yerhxe.
80Amaa zabali lel carsime, ufayeh lel yigmirhe. Israa-eellih ishe yayshidhdhige max fanah lel zibolle yine.
Currently Selected:
Luukas 1: SCC
Highlight
Share
Copy
Want to have your highlights saved across all your devices? Sign up or sign in
©2024 Wycliffe Ethiopia
