Luukas 2

Yeesus Masiix ubka

(Maatiyos 1:18-25)

1Amaa waqhtedde lel tekke, kaa gizet hi baarholle xiyaw inkoh yankattaboona Awgustus akko yarhxin Roomaati naba nugusko awaaj yewce. 2Tayim amaa Kureenyos Suuriya agzuk yine gedda tekke erherh kataaba kinni. 3Ummanti lel ishi-ishi daafolle yankattabo yedee. 4Yoosuf lel, Dawud meelaako kee ahlento kuuk yinemhi sabbatah Galiilaati Naazret daafooko, Yahuudiya fanah Beetlexem akko yarhxin Dawud daafolle yewce. 5Kaa liishoytä kin Maryam lih lel yankattabo yedee. Ishi lel soonowa kuuk tine. 6Usun amalle anuk lel ishe adde umulta waqhti gufe. 7Ishi riishih lel barhalle umla tekke. Tenah takke cara gerhi makaanodde mitinemhi sabbatah agoogishsheh makal makaanolle carhah hayte.

Loynit kee malaykut

8Amaa baarholle lel zibolle orobah barti gazalle sinni saca dhawrha loynit yinin. 9Maddari malaykatti lel tenah yumbulluwe. Maddari nabne lel ten wakalille ifishshe. Mangum lel mashshiiten. 10Malaykatti lel: “Mimashshiitina! Umman tiya xedenishsho le naba xedenhi bissiraata sinah baaheh aniyo: 11Kaafa Dawud daafolle Gargeereeni sinah yooboke. Usuk Masiix kee Maddara kinni. 12Tayim sinah tuumar kinni: laatseeni agoogiteh makal makaanodde carhah gaxeh sinah sugo kinni” akko yerhxe. 13Gar-heeko lel mango carshi maxaarhi amaa malaykattoolih yekkiinih Yalla faylishak:

14“Agani carshelle Yallah nabne, baarholle lel Yalli kixin xiyawah salaam!” arhxuk yinin. 15Amaa malaykut carshi gabolle tenko yedeyin gedda, amaa loynit sinne-sinneh: “Kata Beetlexem fanah nedeeh ta tekkeh tane xaaja, Maddari lel ni yiyshidhdhigeya nabloo” sittiyak yerhxin. 16Iba laceenih lel yedeyin. Maryam, Yoosuf kee amaa makal makaanolle carhah gaxe laatseena lel geyen. 17Tayim yublin gedda lel amaa cindhooki zacabah malaykut tenah warisheenim akuula yiyshidhdhigin 18Tayim toobbem lel inkoh amaa loynit tenah warisheenimille cibrah raben. 19Maryam laakin tayim inkoh teskeeketteh ishi afcaadodde tibbirhe. 20Amaa loynit lel inkoh yubliinim kee yoobbiinimih Yalla aynabi kee faylishak gaxen. Tayim lel amaa malaykatti tenah akah warisheekah kinni.

21Baxxara lellec gufek sarrah askok akko kaleenih, Yeesus yarhxe migac akah yeyyeecin. Ta migac lel guzedde amxinninekkah malaykatti akah yeyyeece migac kinni.

Yeesus Maqhdas careh yomxoye

22Ten thahaarahi waqhti gufek sarrah lel, Moosat sercatalle akah yaneekah, Maddaradde kaa garayshoona aganalle Yerusaalem fanah kaa beyen. 23(Maddari sercatalle akah yunkuttubeh yaneekah: “Erherhih guze faakinnan barhi Maddarah yinqiddise tiya yakko kinni.”) 24Amayim balih Maddari sercatalle “Kuduudulti tsimde hido lamma cindhaa xamaama” sadaqhah uxuwa yarhxiinim tane.

25Taykinna lel, Yerusaalemille Simcoon akko yarhxin xiyawti yine. Xaqqi-wanna kee Yalla mashshiita tiya kee Israa-eel aydukumusnan ilaala tiya kuuk yine. Quddus kin Ufayi lel kaalih yine. 26Maddaraako yamiite Masiix ablekkah rabo makinam Quddus kin Ufayi kaa yuybulluweh yine. 27Usuk lel Quddus kin Ufayeh maqhdas care fanah yemeete. Zabali Yeesus, kaa dhaltoyya labcaadime sercat akah aboona kaa orbishen gedda, 28Ishi xulufudde xaf kaa isheh:

29“Ko Maddaraw! Kado ku garuzzo ku waanitta balih salaamadde sukuuku.

30-31Amayim lel umman xiyawhi nifille tisqirribe ku garger yi intit yubleh yane.

32Tayim amaa Aki-marah ifo tayshidhdhigem, ku Israa-eel xiyawah lel nabne kinni” arhxuk Yalla faylishe.

33Kaa abba kee kaa ina lel kaa zacabah yerhxiinimih cibrah raben 34-35Simcoon ten yeybeerekeh lel Maryam kaa inak tahe yerhxe: “Taykinna lel, mango afcaadot xasaab yamadhdhago ciloh, usuk Israa-eelille mango mara uguso kee cido, amayim balih kaa kabbaatinnexe marah tuumar yakko dorriime. Atu yakkeedo ku rooxeeko seef kok tabo kinni”. 36Wuli Hanna akko yarhxin nabiita yakkeedo tine. Ishi lel Aasheer kishooko tekkih Faanuweel barhä kuuk tine. Cumre dufuyte tiyä lel kuuk tine. Erherhih barhäk marcishimtemko sarrah ishi baclaalih malxina iggida sugte. 37Amayek sarrah lel gubnak boxortomon kee afar iggidiya sugte. Bar kee lellecih acbuduk salaat kee siyaamlih maqhdas care caduruh mixabinna. 38Amaa saacadde kab adde terhxeyaako, Yallah xamde taddabbo kee Yerusaalem muuca ilaala maraalih kaa zacabah waanishaanam dhuguugulusse.

Naazretillehi gaxnan

39Ummannim amaa Maddari sercatalle akah yaneekah abeenimko sarrah, Galiilalle sinni Naazret daafo fanah gaxen. 40Zabali lel anabi kee atriruk amayim balih kas baaha yedee. Yallih nicma lel kaalih tine.

Cindhawka kin Yeesus Maqhdas caredde

41Kaa dhaltoyya lel Faasigi cidih iggida-iggidah Yerusaalem aduuk yinin. 42Usuk lamman kee taman iggidiya gufe gedda, cidti caydah agana Yerusaalem yewcin. 43Cid bakiteh usun gaxak, Yeesus ten barhi kaa dhaltoyya aarhigekkah Yerusaalemille raace. 44Usun laakin yadiye filcoolih yine akkaluk lellecti gerho yedeyin. Sinni ahle kee yaarhigin maraalih lel goronishoona erherhishen. 45Kaa wayen gedda lel kaa goronuh Yerusaalem fanah gaxen 46Adooxa lellecik sarrah lel maqhdas caredde mudarrisiin fanadde defeyeh ten aabbi kee ten esserak akah suge. 47Inkoh kaa aabbinnanti lel kaa fahaama kee kaa raddeh cibrah raben. 48Kaa yublin gedda lel yussuxuttutin. Kaa ina lel: “Ko yi barhaw! Tayim aaginah nok abta? Taykinna, ku abba kee yotta nemsheeqheleh ku goronishak sugne” akko terhxe. 49Usuk lel: “Aymih yi goronishak sugteeni? Yi abbahi caredde annaw yolle tanem aarhigi mitiniini?” akko yerhxe. 50Usun laakin usuk akko yerhxem mafhaminnooni 51Guballe tenlih oobak Naazretille yemeeteh lel tenah am-izzizuk yine. Kaa ina lel tayim inkoh ishi afcaadodde tibbirhe. 52Yeesus lel Yalla kee xiyawlih kas, dhedhdhan kee nicmah carsimak carsime.

Currently Selected:

Luukas 2: SCC

Highlight

Copy