Yohannis 19

Yeesus masqalakke takaroona baahan

(Maatiyos 27:27-32; Markos 15:15-21)

1Sarrah Bilaatos Yeesus beyeyaako akah kaa sabacaanaakah abe. 2Amaa caskar filci lel sawawwalen keenanko aben bor amokke akko hayenyaako diimayin sareena kaa sarishen. 3Alle yemeetiinih lel: “Maaxiyo gee, Yahuud nuguso!” arhxuk sinni gabubuh akko safucak yinin. 4Bilaatos lel malammih alle yewceh: “Ubula, walaa inki cagab adde migeyinniyom taarhagoona ciloh kayya sinalle ayyaacuk aniyo” akko yerhxe. 5Amaymih Yeesus keenanti bor kee diimayin sareena sariteh irolle yewce. Bilaatos: “Taykinna ta xiyawti!” akko yerhxe. 6Sheekhat manabottit kee amaa dhawrheenit kaa yublin gedda wac-yerhxinyaako: “Masqalakke kaa takar, masqalakke kaa takar” yerhxin. Bilaatos lel: “Anu cagab adde migeyinniyomhi sabbatah atin sinneh beyteenih sinneh masqalakke kaa takara” akko yerhxe. 7Yahuud lel: “Nanu sercat lino, usuk Yallih Barha ishek abemhi sabbatah lel ni sercatalle rabo akah eedda” yerhxiinih alle yedebbin. 8Bilaatos tayim yoobbe gedda inkinnah mangum mashshiite. 9Usuk malammih ishi naba caredde orobeh Yeesusuk: “Atu awlaako kito?” akko yerhxe. Yeesus laakin alle maadabbinna. 10Amaymih Bilaatos: “Yottaalih miwaanishsha? Anu ku dhirhiyo kee masqalakke ku takaro reeza liyom mitaarhige?” akko yerhxe. 11Yeesus: “Aganaako koh tomxowweh maarhige, yi bukalle inkinnah reeza taallo mirhicta. Amaydo, kottalle yi yiyrhibirheti naba zambih wanna kinni” yerhxeh alle yedebbe.

12Amaa waqhtek sarrah Bilaatos kaa dhirhiyo farhak yine, Yahuud laakin wac-yerhxiinih: “Ta xiyawto dhirhiitemko, atu Roomaati naba nugus hi saaxib makito. Nugus ishek abinnanti lel Roomaati naba nugus-hi didde kinni” yerhxin. 13Bilaatos lel tayim yoobbe gedda, Yeesus irolle yeyyeeceh “Dhayitti dandas”, hido lel Cibriyah “Gabbata” akko yarhxin daaniyat kurselle defeye. 14Kado lel amaa maaxi Faasigi Anqaraarabti lellec kuuk yine. Lellecti-abrha takkem lel kuuk tine. Yahuuduk lel: “Ubula Sinni Nugus!” akko yerhxe. 15Wac-yerhxiinih: “Asac kaa ish, asac kaa ish, masqalak kaa takar!” yerhxin. Bilaatos lel: “Sin nugus masqalak takaro?” akko yerhxe. Sheekhat manabottit: “Roomaati naba nugusuh kibah nugus malino” akko yerhxin. 16Amaymih lel masqalak kaa takaroona akah yoxoye.

Masqalakkehi takarimnan

(Maatiyos 27:32-44; Markos 15:21-32; Luukas 23:43)

Amaymih Yeesus beyeenih, 17usuk lel yewceyaako, ishi masqal yooqhoceh, “Amot xanxanta makaano”, Cibriyah lel “Golgota” akko yarhxin makaanolle yedee. 18Amalle aki lamma xiyawto, lamma gabooko eelih hayenih, Yeesus fanadde akko hayeenih masqalakke kaa takaren. 19Bilaatos lel wuli kutuub yuktubeh amaa masqalakke haye. “Naazret Yeesus, Yahuud Nugus” yarhxiinim lel kuuk yine. 20Amaa Yeesus masqalak alle takarime makaano daafot agaaga kuuk tinemhi sabbatah, amaa kutuub mango Yahuud yiqhriin. Amaa kutuub lel Cibriya, Laatiin kee Giriikih yunkuttubeh yine. 21Amaymih, amaa sheekhat manabottit kee Yahuud Bilaatosuk: “Ta xiyawti, ‘Anu Yahuud Nugus kiyo’ yerhxem kibah ‘Yahuud Nugus’ terhxeh maktabin” akko yerhxin. 22Bilaatos lel: “Uktubem uktubeh aniyo” akko yerhxe.

23Amaa caskar Yeesus masqalak takareenimko sarrah, kaa sara beyeenih affaralle xaziilenyaako, umman caskarti babbarhi tiya akko abite, amaa kaa qamish lel amaye balih. Amaa qamish lel aganaako guba fanah lemille siraaximteh tinenkah tumurrufeh mitine. 24Amaymih: “Candhishe waynowaantaaki miitiya takkemih cija alle cidnowaa” sittiyak yerhxin. Tayim lel amaa:

“Yi sara sinneh xazziiliteenih,

yi sareenalle lel cija alle ciden”#Zaabur 22:18

yarhxe Kutuub yakmalo tekkem kinni. Amaymih amaa caskar tayim aben. 25Kaa ina kee kaa inah sacla, Koloopasti numa kin Maryam kee Magdalat Maryam amaa Yeesus masqalhi agaagalle daw-yerhxiinih yinin. 26Yeesus kaa ina kee usuk kixin katattayna kaa agaagalle daw-yerhxiinih ten yuble gedda, ishi inak: “Te numa, taykoo ku barhi!” akko yerhxe. 27Sarrah amaa katattaynak: “Taykinna ku ina!” akko yerhxe. Amaa saacaako sarrah amaa katattayni ishi careh beyeh isheelih tee sigishe.

Yeesus raba

(Maatiyos 27:45-56; Markos 15:33-41; Luukas 23:44-49)

28Amaymik sarrah, Yeesus, ummannim bakittem yeerhegeyaako, Kutuub yaskamalo: “Bakhaarite” yerhxe. 29Amalle cur-tarhxe wayniiko temmeege citro tine. Amaa cur-tarhxe wayni wuli tababtot xakak hayen thuththah afadde akko yibbirhin. 30Yeesus amaa cur-tarhxe wayniiko dhacame gedda: “Bakitte!” yerhxeyaako, amo cunuunuseh kaa wafa tewce.

Yeesus masangaleeko mudduta

31Anqaraarabti lellec kuuk yineyaako, (Sambat lel naba lellec kuuk yinemhi sabbatah), amaa rashshit Sambatah amaa masqalakke raacamko, lakuk akko yegeedeliinih oobishoona Yahuud Bilaatos dhaacimen. 32Amaa caskar yemeetiinih erherh tiyaako lakuk akko yigdilin, amaa kaalih masqalakke takarimeh yine tiyaako lel amaye balih. 33Yeesusulle yemeetiinih mece geddaako rabeh yinem yublin gedda, lakuk akko magdalinnooni. 34Wuli caskarti laakin maxaarhoh abeh masangaleeko kaa mudeh, akkanih biilo kee laye akko tewce. 35Amaa yubleti lel yishhide, kaa shahaada rumma kinni. Atin gantah taamanoona ciloh, usuk rumma waanishak yanem lel yaarhige. 36Tayim lel: “Kaa lafufko walaa inketta taggadalo maki” yarhxe Kutuub yakmalo tekkem kinni. 37“Kaa muda mari kaa yabloona kinon” yarhxe aki Kutuub lel yane.

Yeesus macaga

(Maatiyos 27:57-61; Markos 15:42-47; Luukas 23:50-56)

38Tayimko sarrah, Arimatayaati Yoosuf, Yahuudko mashshiiteh suctodde Yeesus katattayna kuuk yineya, Yeesus rashsha beyo Bilaatos dhaacime. Bilaatos lel izne akah yoxoye. Amaymih yemeeteh kaa rashsha beye. 39Ukuum-yerhxeh bar Yeesusulle yemeeteh yine Niqhodiimos lel tengeegelle karbe kee cororsimaako soddom kee adox kiilotiya takkem yibbirheh yemeete. 40Amaymih, Yeesus rashsha beyeenih tamaa Yahuud macagih labcad balih maknazadde qamamlih yiknizin. 41Kado, usuk masqalakke alle takarimeh yinekkeh agaagalle jardiin yine, amaa jardiinidde lel tayek basolle walaa inketti adde amuccuginnixe cusub qabri yine. 42Amaa qabri dhayelle yineya kee, Yahuud Anqaraarabti lellec lel adde orobemhi sabbatah, Yeesus amadde yoocogin.

Currently Selected:

Yohannis 19: SCC

Highlight

Copy