Yohannis 18

Yeesus yomxoyeh yumudhdhuwe

(Maatiyos 26:47-56; Markos 14:43-50; Luukas 22:47-53)

1Yeesus tayim yerhxeh, ishi katattaynitlih amaa-carhi Qidroon gade, jardiin leyalle tabeh, amadde ishi katattaynitlih orobe. 2Yeesus ishi katattaynitlih alle gaxangaaxak yinemhi sabbatah, tamaa kaa yosxoye Yahuuda gantah amaa cara aarhiguk yine. 3Amaymih Yahuuda, caskar filco, sheekhat manabottit hi dhawrheenitko garo kee Faarisiin baaheh fawaanis, dabetta kee aslaxaalih amalle yemeete. 4Sarrah Yeesus, alle takko lem inkoh yeerhegeh, nifti gabolle yemeeteyaako: “Miya wagiitaana?” akko yerhxe. 5Usun lel: “Naazret Yeesus” yerhxiinih alle yedebbin. Yeesus: “Anu kayya Kiyo” akko yerhxe. Kayya yosxoye Yahuuda lel tenlih amalle daw-yerhxeh yine. 6Yeesus: “Anu kayya Kiyo” akko yerhxe gedda, caazalle gaxeenih baarholle raden. 7Amaymih malammih: “Miyatto wagiitaana?” yerhxeh ten essere. Usun lel: “Naazret Yeesus” akko yerhxin. 8Yeesus: “Anu kayya Kiyom sinah warisheh aniyo. Amaymih, yotta fadhdheenimko, ta xiyaw yadawna ten xaba” yerhxeh alle yedebbe. 9Tayim lel: “Yoh toxoye maraako inketti yok maalayinna” yerhxin waanitta takmalo ciloh tekkem kinni. 10Sarrah Simcoon Bithroos, luuk yine sef yeyyeeceyaako, naba shekhti garuzzok akko yootokeh mizgi cokka akko yigrice. Amaa garuzzi migac lel Malkhos kuuk yine. 11Amaymih Yeesus Bithroosuk: “Ishi sef kaa kibadde edebba. Yi Abba yoh yoxoye kobbaayaako aacabo makiyo?” akko yerhxe.

Yeesus Hannas kee Kayaafasalle yamiite

(Maatiyos 26:57-58; Markos 14:53-54; Luukas 22:54)

12Amaymih, caskar filco, ten manabotta kee Yahuud dhawrheenit Yeesus yibbirhiinih kaa yurhuwin. 13Hannas amaa iggidadde naba shekh kuuk yine Kayaafasti ballo kuuk yinemhi sabbatah, erherhih kaa fanah kaa beyen. 14Xiyaw idhdhadde inki xiyawti rabam tashshe yerhxeh Yahuud fayishshem lel Kayaafas kuuk yine.

Bithroos Yeesus xina

(Maatiyos 26:69-70; Markos 14:66-68; Luukas 22:55-57)

15Simcoon Bithroos lel aki katattaynaalih yekkeh Yeesusudde kataye. Naba shekhih mudhdhug kuuk yine katattayni lel Yeesuslih amaa naba shekhti kanshellodde orobe. 16Bithroos laakin carafko irolle daw-yerhxe. Amaa naba shekhih mudhdhug kin aki katattayni lel irolle yewceh caraf dhawudhdha garuzzöh warisheh Bithroos orbishe. 17Caraf dhawudhdha garuzzö lel Bithroosuk: “Atu ta xiyawtih katattaynitko tiya makito, kitoho?” akko terhxe. Usuk: “Makiyo” yerhxe. 18Kado, amaa garuuza kee dhawrheenit gallaco tinemhi sabbatah gira bololisheenih yinin, daw-yerhxiinih lel lalacak yinin. Bithroos lel tenlih gaxeh, daw-yerhxeyaako lalacak yine.

Naba shekh Yeesus essera

(Maatiyos 26:59-66; Markos 14:55-64; Luukas 22:66-71)

19Amaa naba shekh lel Yeesus kaa katattaynit kee kaa aydarasti zacabah kaa essere. 20Yeesus: “Umman tiyaalih caddoysheh aalih waanisheh aniyo. Umman gedda lel tamaa Yahuud alle yakattin sunagooge kee maqhdas caredde aydurusuk ine. Suctodde erhxemih walaa inkim mitane. 21Aymih yi esserak tanito? Ayim erhxem yi yoobbe mara esser. Anu ayim erhxem yaarhigin” yerhxeh alle yedebbe. 22Tayim yerhxe gedda, amalle daw-arhxuk yine dhawrheeni Yeesusuk: “Taginah kinni naba shekhille yadabbiinim?” yerhxeh gabah akko safuce. 23Yeesus: “Anu erhxem qalath yekkemko, amaymih shaahid tik, anu erhxem yane yekkemko laakin aymih yok taatuke?” yerhxeh alle yedebbe. 24Hannas lel madhdhuwadde naba shekh kin Kayaafas fanah kaa dhirhiye.

Bithroos Yeesus malammih xina

(Maatiyos 26:71-75; Markos 14:69-72; Luukas 22:58-62)

25Kado, Simcoon Bithroos daw-yerhxeh lalacak yine. Amaymih usun: “Atu gantah ta xiyawtih katattaynitko tiya makito, kitoho?” akko yerhxin. Usuk lel yaamano xineyaako: “Makiyo” yerhxe. 26Amaa naba shekh hi garuuzaako wuliti, amaa Bithroos cokka akko yigrice xiyawtohi zamad lel: “Jardiinidde inkidde kaalih ku maballiyo?” yerhxeh kaa essere. 27Bithroos lel malammih yaamano xine, akkanih lel dor-hotti andhaxe.

Yeesus Bilaatos nifille

(Maatiyos 27:1-2,11-14; Markos 15:1-5; Luukas 23:1-5)

28Sarrah Yeesus amaa Kayaafasko masxadaadari naba care fanah kaa beyen. Baarho lel dhaxiine kuuk tine. Usun sinneh laakin Faasigi dirar beetoona ciloh najaasa ten dhagtamko amaa masxadaadari naba caredde moorobinnooni. 29Amaymih Bilaatos alle yewceh: “Ta xiyawtolle kisseh baahak taniinim ayim kinni?” yerhxeh ten essere. 30Usun lel: “Ta xiyawti umam abe wayeh yakkeedo, kottalle baahe mirhaarhino” yerhxiinih alle yedebbin. 31Bilaatos lel: “Sinneh kaa beytenyaako sinni sercatah kaa ifrida” akko yerhxe. Yahuud lel: “Nottalle akkinnan tiya yagdifiinim sercat maki” akko yerhxin. 32Tayim lel Yeesus akah rabo le rabahi zacabah waanisheh yine waanitta takmalo ciloh tekkem kinni.

Yi nigsinna ta caalamko maki

33Amaymih Bilaatos malammih ishi naba caredde orobeh Yeesusuh deecimeyaako: “Atu Yahuud nugus kitoho?” akko yerhxe. 34Yeesus: “Atu tayim ishi amooko arhxuk tanito, woole aki mari yi sabbatah kok yerhxiini?” akko yerhxe. 35Bilaatos lel: “Anu Yahuuddo kiyoho? Ku wathan kee sheekhat manabottit yottalle ku baahen. Atu ayim abte?” akko yerhxe. 36Yeesus: “Yi nigsinna ta caalamko maki. Yi nigsinna ta caalamko kuuk tineh takkeedo, anu Yahuuduh andhibbirhemko ciloh yi khaddamte angaace dhaarhen. Laakin yi nigsinna takkeeko maki” yerhxeh alle yedebbe. 37Sarrah Bilaatos: “Amaydo, nugus kito haye?” akko yerhxe. Yeesus: “Anu nugus kiyom atu arhxuk tanito. Anu rummah ashhado, taymih kinni oobokem, tayimhi ciloh kinni lel ta caalamalle emeetem. Rummi carha gaxinnanti yi dhaw yaabbe” yerhxeh alle yedebbe. 38Bilaatos lel: “Rummi ayim kinni?” akko yerhxe.

Tayim yerhxemko sarrah, usuk Yahuud fanah irolle gaxeyaako: “Walaa inki cagab adde migeyinniyo. 39Faasigah inki xiyawto sinah dherhirhiyam laakin labcadah litin. Amaymih Yahuud nugus sinah dhirhiyo yok fadhdhaana?” akko yerhxe. 40Usun lel malammih wac-yerhxinyaako: “Barabbaas kibah tatiya maki” yerhxin. Barabbaas lel shiftatto kuuk yine.

Currently Selected:

Yohannis 18: SCC

Highlight

Copy