Yohannis 20

Rabaakohi ugut

(Maatiyos 28:1-8; Markos 16:1-8; Luukas 24:1-12)

1Kado, Magdalat Maryam baxuurot afti lellecidde, baarho kaddih dite kuuk, ifanih amaa qabrelle temeete. Amaa qabreeko lel amaa duma ticrhiyeh tuble. 2Amaymih, terdeyaako Simcoon Bithroos kee amaa Yeesus kaa kixin katattaynalle tedeeh: “Maddara qabreeko kaa beyen, awla carhah kaa hayenih yaniinim lel minaarhige” akko terhxe. 3Amaymih Bithroos amaa aki katattaynaalih yewceyaako amaa qabri gabolle yedeyin. 4Usun lel inkoh inkidde arduk yinin, amaa katattayni laakin Bithroosko ardah akko yookomeh amaa qabre gufe. 5Adda yablo cunuune gedda lel amalle maknaz raddeh yuble, addadde laakin moorobo. 6Simcoon Bithroos lel kaa kataak yemeeteh, amaa qabredde orobe. Amaa maknaz lel amalle radeh yuble. 7Amaa Yeesus amokke yine nifti gamed lel, amaa maknazlih makiiki, yinkillebeh wuli caralle yine. 8Sarrah tamaa qabre yookomeh gufe aki katattayni yakkeedo orobeyaako, yubleh yeemene. 9Usuk rabaako uguto alle tinemih Kutuub yifhimiinih miyinin. 10Sarrah amaa katattaynit sinni care fanah gaxen.

Yeesus Magdalat Maryamah yambulluwe

(Maatiyos 28:9-10; Markos 16:9-11)

11Maryam laakin wecteh amaa qabri carafalle daw-terhxe. Weecak cununteyaako amaa qabredde kulux-terhxe. 12Cado sara le lamma malaykatto lel tuble, amaa Yeesus rashshi alle yinelle defeyak, wuliti amot gabooko, wuliti lel ibi gabooko yinin. 13Usun lel: “Te numa, aymih weecak tanito?” akko yerhxin. Ishe lel: “Yi Maddara beyeenih yanin, awla kaa hayeenim lel maarhige” akko terhxe. 14Tayim terhxeh tufkune gedda, Yeesus tee agaagalle daw-yerhxeh tuble, laakin Yeesus kuuk yinem maarhago. 15Yeesus lel: “Te numa aymih weecak tanito? Miyatto wagiyak tanito?” akko yerhxe. Jardiin dhawrheena kaa tekkeleh: “Maddara, kaa beyteh tinniyemko, kaa beyo kinnik, alle kaa hayteh tanitom yoh warish” akko terhxe. 16Yeesus: “Maryam” akko yerhxe. Tufkuneh lel Cibriyaati waanih: “Rabbuni” akko terhxe, (tee macna lel Mudarris kinni.) 17Yeesus: “Kaddih Abballe ewceh maaniyomhi sabbatah yodde maarhabbashin; laakin yi sacul fanah tedeyeyaako ‘Yi Abba kee sin Abba, yi Yalla kee sin Yalla fanah awcuk aniyom’ akah warish” akko yerhxe. 18Magdalat Maryam tedeeh amaa katattaynitik: “Anu Maddara uble” akko terhxeyaako, tayim yakkeedo akko yerhxem akah warishshe.

Yeesus katattaynitih yambulluwe

(Maatiyos 28:16-20; Markos 16:14-18; Luukas 24:26-49)

19Amaa maaxit kaso, baxuurot afti lellecidde, Yahuud mashshih katattaynit caruf alifeenih adde yininidde Yeesus yemeeteyaako, ten fanadde daw-yerhxeh “Salaam sinlih yakko!” akko yerhxe. 20Tayim yerhxemko sarrah, ishi gabub kee ishi masangale ten yuybulluwe. Sarrah amaa katattaynit Yeesus yubliinimih xedeneenit kuuk yinin. 21Yeesus malammih: “Salaam sinlih yakko! Abba akah yi fareekah, anu lel sin farak aniyo” akko yerhxe. 22Tayim yerhxeyaako, adde yoofoyeh: “Quddus kin Ufaye kabbata. 23Akkinnan tiyah zambe akah xabteenimko ten zambi akah xabbiimeh yane. Akkinnan tiyah zambe akah xabe wayteenimko, ten zambi akah xabbiimeh miyane.”

Yeesus kee Toomaas

24Kado, Yeesus yemeete gedda, amaa lamman kee tamanko kin Toomaas, Ganga akko yarhxinya tenlih miyine. 25Amaymih aki katattaynit: “Nanu Maddara nuble” akko yerhxin. Usuk laakin: “Masaamirti tuumar kaa gabadde ablekkah, amaa masaamirti mudumadde inni fera hayekkah, kaa masangaledde inni gaba hayekkah, caduruh aamano makiyo” yerhxe.

26Baxxara lellecko sarrah, kaa katattaynit malammih addadde yinin, Toomaas lel tenlih yine. Caraf alfiimeh yine hanuk, Yeesus orobeyaako ten fanadde daw-yerhxeh: “Salaam sinlih yakko!” akko yerhxe. 27Sarrah Yeesus Toomaasak: “Ishi fera tadde haaki, yi gabub ubul; ishi gabub bahaaki lel yi masangaledde haa. Taamano mixininaaki, imin” akko yerhxe. 28Toomaas: “Yi Maddara, yi Rabbiyo!” yerhxeh alle yedebbe. 29Yeesus: “Yi tublemhi sabbatah teemene? Tamaa ablekkah yeemene mari baraka-lem kinon” akko yerhxe.

Ta kitaab hi bursaale

30Kado, Yeesus amaa katattaynit lih anuk, ta kitaabadde ankuttubinnixemko mango aki ishaarar abe. 31Tayim tunkuttubem laakin, Yeesus, Masiix kee Yallih Barha kinam taamanoona ciloh kee teemeniinih kaa migacalle aniina taalloona ciloh kinni.

Currently Selected:

Yohannis 20: SCC

Highlight

Copy