Fartottit hi Abittot 17

Bawlos kee Silas Tessaloniikelle

1Bawlos kee Silas Amfibolis kee Abollooniyaako tillaabeenik sarrah, Yahuud sunagooge alle yine Tessaloniikelle yemeetin. 2Bawlos amaa sunagoogedde orobeh, ishi amal balih, Sambatah adooxa max Kutuubko tenlih madareyaako: 3“Ta Yeesus, anu sinah warishaya, Masiix kinni” arhxuk, Masiix yamcazzabo kee rabaako uguto raacinnixem kuuk tinem ten yuybulluweyaako akah caddoyshe. 4Amaa maraako gari lel amayim yeemeniinih Bawlos kee Silasadde yengelin. Tamaa Yalla mashshitta Giriikko mango mara kee ware-le sayyooko wuli dago mari amah aben. 5Yahuud laakin ashshiineenih, amaa cadaagaako wuli uma mara inkidde yeskettiinih amaa daafo yiyribbishin. Bawlos kee Silas amaa xiyawalle baahoona farheenih lel Yasoon care yootokin. 6Tena wayen gedda lel Yasoon kee saculko garo gototeenih amaa daafot mas-uuliinille baaheenih, wac-yerhxinyaako: “Ta caalamak rabshah guba yane af agana haye mari talle gantah yemeetin. 7Yasoon lel ten kabbaate, ta mari lel inkoh ‘Yeesus akko yarhxin aki nugus yane’ arhxuk, Roomaati naba nugus hi awaajadde kinni aacituk yaniinim” yerhxin. 8Amaa xiyaw kee amaa daafohi mas-uuliin tayim yoobbin gedda yimribbishin. 9Dhiishinnat solaadi Yasoon kee aki maraako kabbaateenih lel yadawna ten xaben.

Bawlos kee Silas Beroyalle

10Amaa sacul akkanih Bawlos kee Silas bar Beroya fanah ten sukuukuwen. Usun amakke gufen gedda lel Yahuud sunagoogedde oroben. 11Kado, talle tine Yahuud amaa Tessaloniikelle tinemko ziyaada inti faktem kuuk yinin; amaa waanitta lel naba farhiilih kabbaaten, ta gondo rumma kinam kee makinam yabloona lel max-yeenim amaa Kutuub amirmiruk yinin. 12Amaymih tenko mango mari yeemenin, amaa Giriik sayyo ware-leya kee labhaako mango mari yeemenin. 13Amaa Tessaloniikelle tine Yahuud lel, Bawlos Beroyalle Yallih waanitta warroyshem yoobbin gedda, amalle gantah yemeetiinih uguugusenyaako xiyaw yiyribbishin. 14Sarrah amaa sacul akkanih Bawlos bad fanah kaa sukuukuwen, Silas kee Timoteyos laakin amalle raacen. 15Amaa Bawlos sukuukuwe mari Ateena fanah kaa goorisheenih: “Silas kee Timoteyos dheh yodde katawna” tarhxe farto kaako kabbaateenih Biiriya fanah gaxen.

Bawlos Ateenalle

16Bawlos Ateenalle ten ilaalak, amaa daafo asnaam waydolko temmeegeh yubleyaako, kurah ufayi adde yexeewe. 17Amaymih, Yahuud kee tamaa Yalla mashshiita maraalih sunagoogedde kee cadaagalle umman max amiitinnan maraalih mabbalowak yine. 18Ebikuureyos kee Istoyikos kin falaasifaako gari gantah kaalih ankeexeduk yinin. Gari lel: “Ta madareeni ayim kinni yarhxo farhak yanem?” arhxuk yinin. Usuk Yeesus kee rabaakohi ugut warroyshak yinemhi sabbatah, wuli mari lel: “Wuli godobot yallahi warroysheenah higgida” arhxuk yinin. 19Kaa beyenyaako lel Areyosbagosulle kaa baaheenih: “Ta cusub aydaras atu arhxuk tanitoya naarhago dhicna? 20Amayim lel cibra kinam cokkalle nokko baahak tanitomhi sabbatah kinni. Amaydo, tayim ayim kinam naarhago farhna” akko yerhxin. 21Inkoh Ateenaati xiyaw kee godobo amalle marak tineya lel cusubam warishe kee aabbe yakkiinih sinni waqhte tillaabishak yinin.

Bawlos Areyosbagosulle madara

22Amaymih Bawlos, Areyosbagosti fanadde daw-yerhxeyaako: “Ateenaati xiyawo, atin umman ginah diin xiyaw kitiinim macalsiiteh aniyo. 23Tillaabak aniyuk atin akah tacbudiinim uble, kutubuh: ‘Amidhdhiginnixe yalla fanah’ yarhxiinim alle tane mazbax lel uble. Amaydo, sorhak akah tacbudiinimih, tayim sinah warisha. 24#1 Nuguusa 8:27; Isayas 42:5; Fartottit hi Abittot 7:48Ta caalam kee inkoh teyadde tanem yukhluqhe Yalli, carshe kee baarhoh Maddara kinya, gabah siraaxime maqhdas caredde maki sigam. 25Usuk isheh umbuka xiyawah aniina, hanra kee ummanim yaxayenkah, wulim kaa farhshishsha tiya balih, xiyaw gaba kaa mitakhdume. 26Usuk inki xiyawtooko umbuka wathunti xiyaw abeh, umbuka baarhot garballe akah maraanaakah lel akko abe; sugoona lon waqhte kee alle sigan makaanoh darat akah barhishe. 27Tayim lel Yalla wagiyoona kee kaa soomaameenih kaa geyoona ciloh abem kinni. Yakko kibah, usuk umman nottaako mirheerha. 28‘Kayyah marnah hel-narhxeh kayyah nanino’, sin cadaareenitko gantah gari akah yerhxiinih yaniiniikah lel: ‘Nanu rummah kaa zara kino.’ 29Yallih zara nekkek sarrah, carshi-tiya, xiyawti cijaajinna kee niyah yekke dahab, fidda hido dhayitko siraaxime siile kaa nakkalo nolle mitane. 30Yalli sorhat waqhteeko akko tillaabeh yane. Kado laakin ummanille ummanti yataabo amre yoxoyeh yane. 31Tamaa usuk doore xiyawtohi araxah, caalam xaqqeh yafride max abaysheh yane. Tayim rumma kinam lel, kayya rabaako uguseh umman tiya yiyshidhdhigeh yane” akko yerhxe.

32Kado, rabaakohi ugut yoobbin gedda, gari ancasah alle yoosolin. Gari laakin: “Tayimhi zacabah malammih ku naabbo kino” yerhxin. 33Amaymih Bawlos Areebagosko yedee. 34Xiyawko gari laakin yeemeniinih kaa katayen, usun lel Areyosbagosti zoobatto kin Diyoniisiyos kee wuli Damaris akko yarhxin numa kee aki mari tenlih yinin.

Currently Selected:

Fartottit hi Abittot 17: SCC

Highlight

Copy