Fartottit hi Abittot 16

Timoteyos Bawlos kee Silasadde yangale

1Bawlos Derbe kee Listiralle yakkeedo yemeete. Amalle lel wuli taamine Yahuuddot barha kin Timoteyos akko yarhxin katattayni yine. Kaa abba laakin Giriikto kuuk yine. 2Listira kee Ikooniyonille yine sacul mece shahaada akko axawuk yinin. 3Bawlos Timoteyos isheelih beyo farhe, kaa abba Giriikto kinam inkoh aarhiguk yiniinimhi sabbatah lel amaa baarholle tine Yahuuduh arhxuk askok kalum akah abe. 4Akko tillaabinnan daafolle lel amaa fartottit kee kaniisat naba mara Yerusaalemille yeyyeeciinih baken awaaj dhawrhoona alle baahen. 5Amaymih, amaa kanaayis imaanah yisbite, max-yeenim lel ammanguk yemmenge.

Makedooniyatti deeco

6Aasiyaati zoobälle amaa waanitta waanishaanamko Quddus kin Ufayi ten deese gedda, Ferigiya kee Galaatiyaati zoobäako tillaaben. 7Usun Miisiyalle yemeetin gedda, Bitiiniya fanah yadawna farhen, laakin Yeesus Ufayi akah masmaxinna 8Amaymih, Miisiyaako tillaabeenih Tirooyasalle ooben. 9Bawlos lel bar wuli Makedooniyaati xiyawti daw-yerhxeyaako: “Makedooniyalle amowaaki ni xat” yerhxeh kaa dhaacimak mablo yuble. 10Bawlos mablo yublek sarrah, mece ware ten naybassaro Yalli noh deecimem neerhege gedda, akkanih Makedooniya fanah nadawo ninqirribe.

Liidiya taamine

11Tirooyasko badah ugunneh gedda, rig-nerhxeh Samotrakeeti gabolle nedee, malammit max lel Niyabolis gufne. 12Amakkeeko lel Makedooniyaati zoobah naba daafo kin Roomaati giz-at kin Filibbille nemeete. Ta daafolle dago max sugne. 13Sambatah lel, amaa daafoh baabko irolle newceh, amaa nahaar gimamhi afalle wuli salat makaano tanem nekkeleh, amalle defeyneh amalle teketteh tine sayyoolih waanishne. 14Wuli Liidiya akko yarhxin Yalla mashshitta numa Tiyateyraati daafooko kinya, diimayin sara taabixeya ni toobbe. Bawlos arhxuk yinem macalsitto lel Maddari afcaado akah faake. 15Tee kee tee xawaz inkoh yinthimmiqhiinik sarrah: “Maddarah eemenemih yi kabbatteenih tekkiinimko, temeetiinih yi caredde oroba” terhxeh ni dhaacimte. Ni gantah tishshimine.

Bawlos kee Silas xabshedde

16Salat makaano fanah adiinuk, wuli takko-lem warishsho tee dhicshiisha uma ufaye le garuzzä geyne. Ishe mece caashir warishak ishi wannunuh mango gadda bahte tiya kinni. 17Ishi Bawlos kee ni sarradde kataak: “Ta mari Nabamko Naba Yallih khaddamte kinon, gargerti arax lel sinah warishak yanin” terhxeyaako wac-terhxeh waanishak tine. 18Tayim lel mango max gabbacte. Bawlos lel mangum yuxurtumeyaako, yufkuneh amaa ufayek: “Teeko tawco Yeesus Masiix migacalle ku aamiriyuk ane” akko yerhxe. Usuk lel inki geddalle teeko yewce.

19Tee wannun laakin amaa geyoona caagak yinin gadda waynim yublin gedda, Bawlos kee Silas yibbirhiinih amaa cadaagalle gototenyaako reezonulle ten baahen. 20Xukmi baacilille ten baaheenih lel: “Ta mari Yahuud kinon, ni daafo lel ayribbishuk yanin. 21Nanu Roomaati xiyawak, kabbatno hido lel abno ammissilinnixino labcad aydurusuk yanin” yerhxin. 22Amaa xiyaw ten utkadde gaba yessegellin, amaa xukmi baacil lel sara akko yislibiinih iloluh ten yaatakoona amre yoxoyin. 23Dhacumaatih ten yootokiinik sarrah, xabshedde ten cidenyaako, amaa xabshi dhawrheeni meceetih ten dhawrho kaa yeemerin. 24Ta amre kabbaateyaako lel addat xabshedde ten orbisheh meceetih lakukuh gundek ten yurhuwe.

Xabshe dhawrha Filibbiyatti yeemene

25Barti abrha takkeh iggidin waqhte, Bawlos kee Silas dhaaco abitak kee Yallih faylah qannishak, amaa xabshedde tinem ten aabbuk yinin. 26Gar-heeko lel naba kirdidimo tomobbeyaako, amaa xabshih masarrat qinqin-yerhxe. Akkanih lel amaa caruf inkoh fakkiteyaako amaa xabshedde tinemih silansil akah yimfittixe. 27Amaa xabshe dhawrhati uguteyaako amaa xabshi caruf fakkitem yuble gedda, amaa xabshedde tinem kuden yekkeleh sef yeyyeeceyaako ishe yagdafo farhe. 28Bawlos laakin wac-yerhxeyaako: “Nanu inkoh tadde naninok ishi maacammajin” akko yerhxe. 29Amaa dhawrheeni ifo akah baaho deecimeyaako, yerdeh addadde orobeh, mashshih qathqath-arhxuk Bawlos kee Silasko gerille akko rade. 30Irolle ten yeyyeeceyaako lel: “Maddarit, gargeerimo ayim abo yolle tane?” akko yerhxe. 31Usun lel: “Maddara kin Yeesusuh imin, ishe kee ishi xawazah lel gargeerimto kito” akko yerhxin. 32Usun lel Maddari waanitta kaa kee inkoh kaa caredde tinemlih waanishen. 33Amaa baradde ten beyeyaako ten biyok akah yitsfifeh, inki geddalle yinthimmiqhe, inkoh ishe kee ishi xawazah. 34Sarrah ishi caredde ten yeyyeeceh folo akah yisqirribe. Inkoh ishi xawazlih yekkeh lel Yallah yeemenemih xedene.

35Baarho maxte gedda, amaa xukmi baacil: “Tamaa xiyaw dhirhiya” arhxuk boliis faren. 36Amaa xabshi dhawrheeni lel: “Xukmi baacil sin nayyaaco farto fareenih yanin. Amaymih tewciinih salaamadde aduwa” arhxuk ta waani Bawlosuh warishe. 37Bawlos laakin: “Nanu Roomaati dhaylo kino hanuk, xukme hinnim xiyaw nifille ni sabacenyaako xabshedde ni cideenih, kado suctodde ni yayyaacoona? Maale, tayim mitakke. Usun yemeetiinih sinneh ni dhirhiyoona” akko yerhxe. 38Amaa boliis lel tayim amaa xukmi baacilih warishen, usun Roomaati dhaylo kinoonim yoobbin gedda lel mashshiiten. 39Amaymih yemeetinyaako: “Nolle mabbarhina” akko yerhxin. Irolle ten yeyyeeciinih lel amaa daafooko yawcoona ten dhaacimen. 40Amaymih, xabsheeko yewciinih, Liidiyadde booden. Amaa sacul yublinyaako lel ten aydukumseenih amakkeeko yedeyin.

Currently Selected:

Fartottit hi Abittot 16: SCC

Highlight

Copy