Fartottit hi Abittot 18

Bawlos Korintosulle

1Taymik sarrah Bawlos Ateenaako uguteh Korintosulle yemeete. 2Amalle Akiila akko yarhxin Yahuuddo, Bontosko kinya geye. Usuk Biriskilla akko yarhxin ishi numaalih Ithaaliyaako amaa ayyamadde yemeeteh yine. Usun Kilawdiyos umbuka Yahuud Roomaako yadawna amre yoxoye gedda Ithaaliyaako yedeyin. Bawlos ten yablo lel yedeeh, 3usuk tena balih bicishradde yinemhi sabbatah, usun lel tenda siraaxa mara kuuk yiniinimhi sabbatah, tenlih defeyeyaako yushtuqhule. 4Sambat Sambatah sunagoogedde tenlih madarak lel Yahuud kee Giriik xiyaw yashshamano acikkinuk yine.

5Silas kee Timoteyos Makedooniyaako yemeetin gedda, Bawlos Yeesus, Masiix kinam Yahuuduh ashhiduk waanittadde hammito erherhishe. 6Kaa yeceerediinih akah waatimen gedda, ishi sara alle urgufeyaako: “Sin biili sin amokke gaxoo! Anu barii kiyo. Tayek sarrah Aki-maralle adaw kiyo” akko yerhxe. 7Sarrah Bawlos amakkeeko yedeeh: Titiyos Yustus akko yarhxin wuli Yallah yacbude tiyahi carelle yemeete. Kaa cari lel sunagoogeeko malammit baab kuuk yine. 8Amaa sunagoogeeti manabotta kin Kirisbos lel ishe kee ishi xawazah Maddarah yeemene. Korintosti xiyawko mango mari Bawlos yoobbeya yeemeniinih yinthimmiqhin. 9Wuli bar Maddari Bawlosuh mablodde akah yumbulluweh: “Mimashshiitin, waani dhuguugulus, sik marhxin. 10Anu koolih aniyomhi sabbatah, ta daafolle lel yi xiyaw kinamko mango mara liyomhi sabbatah, kodde dhago dhiicati miyane” akko yerhxe. 11Amaymih Bawlos Yallih waanitta ten aydurusuk iggida kee abrha amalle suge.

12Galliyoon Akhaayaati Roomaati zoobah masxadaadara kuuk yine gedda, Yahuud inketta yekkiinih Bawlosulle ugutenyaako firdi makaanolle kaa baaheenih: 13“Sercatko irolle kin araxah Yallah yacbadoona xiyaw ashshiminuk yane” akko yerhxin. 14Bawlos waanisho farhak, Galliyoon Yahuuduk: “Ko Yahuudo, akkinnan uma ciyyo, hido naba cagab yakkeedo, sin kisse akah kabbaata takale aalle dhaarhe. 15Laakin, ta gondo, waani, migoc kee sin sercat tablem yekkek sarrah, atin sinneh ubula. Tayimhi daaniya maakke” akko yerhxe. 16Amaa firdi makaanooko lel ten yeyyeece. 17Inkoh sunagoogeeti manabotta kin Sostenees yibbirhiinih, amaa firdi makaanoh nifille kaa yootokin. Galliyoon laakin taymidde macal maabitinna.

Bawlos Anthaakiya fanah gaxa

18 # Cadad 6:18 Bawlos Korintosulle mango max sugek sarrah, amaa saculko barhsimeyaako Biriskilla kee Akiila goruh abiteh, badah Suuriya yedee. Ugutekkah lel abeh yine nadrehi sabbatah Kenkhereyalle dagar yuttugummude. 19Efesos gufen gedda lel tena xabeyaako, usuk isheh sunagoogedde orobeh Yahuudlih madare. 20Usun dago waqhte tenlih sugo kaa esseren gedda xine. 21Tenko aduuk laakin: “Yallih farhi tekkemko gaxo kiyo” akko yerhxeyaako, Efesosko doonikih yedee.

22Usuk Qayseeriyalle oobe gedda, aganalle yewceyaako kaniisak salaam yerhxeh, Anthaakiya fanah oobe. 23Amalle dagum sugeh, amakkeeko yedeeyaako, katattaynit aysheedeyik Galaatiya kee Ferigiyaati zoobäako tillaabe.

Abbolloos Efesosulle fidbeelih waanisha

24Wuli Abolloos akko yarhxin Yahuuddi Aleksaanderiyaako kinya, Efesosulle yemeete. Usuk madareena kee Kutuub dhic le tiya kuuk yine. 25Usuk Maddari arax yudruse tiya kuuk yine. Usuk Yohannis anthammaq bisa aarhiguk yine haaki, ufayi kaa uguugusayaako, Yeesus zacabah meceetih waanishak kee aydurusuk yine. 26Usuk sunagoogedde fidbeelih waanisho erherhishe. Biriskilla kee Akiila kaa yoobbin gedda, kaa yiscirhiinyaako Yallih arax meceetih akah caddoyshen. 27Usuk Akhaaya fanah yadaw farhe gedda, amaa sacul kaa aydukumusenyaako, kaa kabbaatoona katattaynitille farto akah yuktube. Usuk tena gufe gedda lel Yallih nicmahi araxah yeemene mara mangum ten xate. 28Yeesus Masiix kinam Kutuubko aybulluuk, Yahuudko umman tiyahi nifille dhacumaatih akko yusluge.

Currently Selected:

Fartottit hi Abittot 18: SCC

Highlight

Copy