Mateo 24
24
I čilačo tsiro vella
1Oun o Yezous moukas o Debleskro baro kheer. Har yob peske djas, van peskre mala pash leste, te sikrenn le leste o tselo Debleskro baro kheer. 2Koy penas lo ap lende: “Kova, hoy t'mer kote lauter dikenna, kova lauter djal paash. Kate ačell kek bar ap i vavareste.”
3Pale djas lo ap i djeteskri berga oun beshas pes. Leskre mala kokres his pash leste oun poučan lestar: “Ap havo tsiro vell o Debleskro baro kheer tele phagedo? Har nay dikas mer, te vas ko tsiro, kay tou pale veh, oun o Devel o ray hi pral halauter?”
4Penas o Yezous: Denn yak, ma moukenn t'men kekestar o Debleskro dromestar tele te anell! 5Boud morsha venna oun penenna: Me hom o Kristo, ko baro ray, kolestar o Devel penas, te vell yob! Oun boud menshe patsenn ap lengro rhorhepen. 6Baro kourepen vella an kol themma, kay hi dour t'mendar oun ninna an kolla themma, kay hi gar dour t'mendar. Te shounenn t'mer kova, ma trashenn! Ko hounte vell yaake. Ko tsiro, kay o Devel o ray hi pral halauterende, vell gar yaake sik. 7I pralstoune pral bare themma kourenn pen i vavar pralstunentsa. Oun i menshe dran yek them marenn kolen an i vavar them. An boud themma hi i menshen gar doha te rhal. Oun kate oun kote vell i phoub trisslemen.
8Kova lauter vella yaake pral i phoub, har i douka venn pral i djouvyate, kay lell i ternepen.
9Palle taprenn le t'men, denn t'men dava, oun marenn t'men. Oun i menshe an i tsele themma venna rhoyedo ap t'mende doleske, kay patsenn t'mer ap mande. 10Oun boud denn pengro patsepen ap mande pre, oun phoukrenn ninna ap i vavarende, kay ap mande patsenna, oun yek krell o vavareske čilačepen.
11Ninna venna boud rhorhene rakepangre oun penenna, te hi le bičedo o Deblestar. Kolla anenn boud menshen o čačo dromestar tele. 12O čilačepen vell yaake baro ap i phoub, te denn boud patsle pengro kamlepen i vavarenge pre. 13Kova, kay ačell zoreles tardo an o patsepen, yaake rah, har yob djivella, kova lell o Debleskro djipen. 14Ap i tseli phoub vell i menshenge ko lačo lab penlo, kay o Devel kamell len dran o čilačepen te lell oun kamell lengro ray te vell. I menshe an hake themma hounte shounenn ko lab. Oun palle vell ko tsiro, kay hi o Devel o ray pral lauterende.
I čilačo tsiro vella pral i menshende
15Glan i rah tsiro rakras o Debleskro rakepaskro Daniel pral koy djoungeli čilači figura#24:15a dik: Daniel 12:11. Koon kava draverella#24:15b draverella: leserella , kamaus, te hayvell lo les ninna. Ap ko dives, kay dikenn t'mer koy djoungeli čilači figura an o Debleskro baro kheer tardo, 16hounte nashenn kolla, kay an o them Youdea djivenna, sik ap i berga. 17Kova, kay pral ap o kheer hi, hounte djal bouder gar an peskro kheer dren, te lell lo peskro koova vin. 18Oun kova, kay ap i kotar phoub boudrella, kova hounte djal bouder gar khere, te lell lo peskri baya. 19Koy bibarht hi bari kol djouvyenge, kay hi an vavar koova, ninna kol djouvyenge, kay hi len i ternepen.
20Mangenn o Deblestar, te hounte nashenn gar krik an o vend, vitar gar ap o Debleskro dives! 21Ko tsiro vella djoungleder har halauter, hoy ap i menshende vas, yaake rah, har i phoub tardo hi. Oun ko tsiro, hoy vell pal kova, vell vitar gar yaake čilačo. 22Te krals o Devel o čilačo tsiro gar tikneder, palle vals kek mensho dran o čilačo tsiro vin. Kolen, kay o Devel peske vin rodas, kolenge krell lo o čilačo tsiro tikneder.
I rhorhene rakepangre venna pash t'mende
23Te penell yek ap t'mende: Dikenn, kate hi o baro ray, kolestar o Devel penas, te vell yob! palle patsenn les gar! Oun te penell i vavar ap t'mende: Ake, kote hi lo! palle patsenn les vitar gar!
24Boud rhorhene morsha penenn ap t'mende: Me hom ko baro ray, kolestar o Devel penas, te vell yob. Oun rhorhene rakepangre penenna: Me hom o Debleskro bičedo. Oun yon krenna baro oun zorelo koova, hoy i mensho nashte krell gar dran peskri zoor. Kova krenn le, te anenn le i menshen o čačo dromestar tele. Te djals kova, anans le ninna kolen o Debleskro dromestar tele, kolen o Devel peske vin rodas.
25Ma bistrenn, hoy me t'menge penom! 26Yon te penenn t'menge: O baro ray, kolestar o Devel penas, te vell yob, kova hi an o moulo them! ma djan kote vin! Oun yon te penenn: Yob hi an ko kheer! ma patsenn len! 27Ap ko dives, kay o Mensheskro Čavo pale vella, dikenn les i tsele menshe, yaake har i Debleskri yag ap o bolepen diklo vell, hoy djal yek rigyatar ap i vavar rig an o bolepen. 28Kote, kay i moulo mass čiddo hi, kote venn i bare divye čirkle khetne te rhan le.
O Mensheskro Čavo vella pale
29Oun sik pal kol čilače divessa, vell o kham kalo har i rat, oun o moonto dikell kek bouder. Oun i bare momlia ap o bolepen perenn tele. Oun i bolepaskri zoor perell khetne. 30Palle dikenn le o Menshengro Čaves, har yob dran o bolepen vella. An hake themma dikenn le les, har yob vella ap i volke bari zoryah oun raylepen. Oun yon rovenna oun penenna: Patsams mer ap leste! 31Oun yob bičrell peskre bolepangren pral i tseli phoub. Oun kolla phourdenn an i bashepangre#24:31 bashepangre, kate: trompette , te anenn le dran hako them kolen khetne, kay o Devel peske vin rodas.
O faygetikro rouk
32Me kamau te sikrap t'mende čomone. Dikenn ap o faygetikro rouk! Te venn leskre kashta zenelo, oun i patria venn dran lende vin, palle djinenn t'mer, te vell sik o niyal.
33Yaake hi kova ninna koleha, pral kova rakrom. Te dikenn t'mer, har kova lauter vella, palle djinenn t'mer, kay o Debleskro tsiro vas.
34Čačepah, me penau t'menge: Kol menshe, kay an ko tsiro djivenna, dikenna kova lauter pengre yakentsa.
35O bolepen oun i phoub ačenna gar. Mire laba ačenna hako tsiro.
36Kek djinell ko tsiro, kaana kova lauter vella. I bolepangre an o bolepen djinenn les gar, vitar gar o Debleskro čavo. Miro dad an o bolepen kokres djinell les.
37Yaake har i menshe djivan an ko tsiro, kay o Noah djivas, yaake djivenn le an ko tsiro, kay o Mensheskro Čavo pale vella. 38Glan ko tsiro, har o baro pani vas, rhan oun piyan le, romedineran le, oun van romedino. Har o Noah an o panyeskro kheer djas, 39hayvan le gar, hoy koy djas. O baro pani vas pral lende, oun yon lauter tassan. Yaake djal kova ninna ap ko dives, kay vell o Mensheskro Čavo pale. 40Douy boudrenn ap i kotar phoub. Ko yek vell krik lino, ko vavar ačell koy.
41Douy djouvya krenn yarro dran djob. Koy yek vell krik lino, koy vavar ačell koy.
42Rikrenn t'mare yaka pre! T'mer djinenn gar ko dives, kay t'maro ray pale vella.
43Hayvenn: Te djinals o ray pral i kheer ko tsiro an i rati, kaana o čorepaskro vella, palle sovals lo gar, oun moukals kekes an peskro kheer dren te phagell.
44Doleske penau t'menge: Denn garda! Me, o Mensheskro Čavo, vau pale an i tsiro, kay t'mer gar djinenna.
O lačo boudepaskro
45I lačo boudepaskro della mishto garda ap peskro rayeskro kheer, oun sovella gar. Leskro ray das peskre tsele boudepangren an leskre vasta. Oun ko lačo boudepaskro dell len hako dives kova, hoy len hounte vell djipaske. 46Barhtelo hi lo, te vell leskro ray pale, oun dikell, kay yob peskri boudi mishto kras. 47Čačepah, me penau t'menge: Leskro ray dell peskro tselo bravlepen an leskre vasta. 48Yob te hi i čilačo boudepaskro oun penell ap peste: Miro ray vell gar yaake sik pale, 49oun yob dell kol vavar boudepangren dava, oun rhal oun piyell pes mato kolla matentsa, 50palle vell leskro ray pale ap i dives, kay o boudepaskro gar patsell, te vell yob. Ap yek kopo hi lo koy, 51oun dell ko boudepaskres khetne, oun anell les kote, kay i rhorhene hi. Kote rovenn le, oun dandrenn i danda khetne i doukatar.
Currently Selected:
Mateo 24: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
