Mateo 25
25
I deesh terne ča
1Oun o Yezous penas: Ap ko tsiro, kay vella o Mensheskro Čavo pale, djal kova yaake har kol deesh terne čentsa, kay djan ap i biyab. Yon lan pengre momlia an o vast, oun djan ap o drom, kay o biyabeskro hounte vella. 2Panč lendar his dinelo, oun panč lendar his gosevo. 3Kolla panč dinele lan kek djet peha. 4I goseve čen his djet an pengre khore.
5Oun ko biyabeskro vas gar yaake sik. Doleske van lauter khino oun sovan dren.
6His deesh-te-douyenge an i rati, kote das yek bari gole: O biyabeskro vella! Djan vin pash leste! 7Koy stan i tsele terne ča pre, oun kran i yag an pengre momlia bareder. 8Oun kol dinele ča penan ap kolla goseve čende: Denn men djet! Mare momlia djan vin. 9Penan i goseve: Na-a! Maro djet hi gar doha menge oun t'menge. Djan pash i bikepangre, oun ginenn t'menge djet!
10Har yon kote djan, te ginenn le penge djet, koy vas o biyabeskro. Oun kolen, kay len djet his, djan leha an o kheer, kay i biyab hi. Oun o voudar vas pal lende pandlo. 11Oun pal i tikno tsiro van ninna kolla vavar terne ča glan o voudar, oun penan: Ray, ray, kre menge o voudar pre! 12Penas lo ap lende: Čačepah, me prindjrau t'men gar.
13Doleske penau me t'menge: Rikrenn t'mare yaka pre! T'mer djinenn gar ko dives, kay o ray pale vella!
I triin boudepangre
14Kova hi yaake har pash o morsheste, kay kamas an i vavar them te djal. Dran kova das lo peskre boudepangren gole, oun das len peskro tselo bravlepen an i vast.
15Hakeneste das lo yaake boud love, har kova hayvas, te ginell oun te bikrell kolla loventsa. Ko yekeste das lo panč gone pherdo roup, oun ko vavareste das lo douy gone, oun pale i vavareste yek gono. Oun palle djas lo an o vavar them.
16Oun ko morsh, kay kol panč gone pherdo roup las, kova djas sik pash i bikepangre, ginas oun bikras boud koova, oun anas panč vavar gone pherdo roup khetne pashel.
17Oun ninna kova, kay kol douy gone peskro rayestar las, kova las douy vavar gone pashel. 18Ko morsh, kay yek gono peskro rayestar las, djas ap i kotar phoub oun khatras ko roup an i phoub.
19Oun pal i rah tsiro vas lengro ray pale oun moukas peskre boudepangren glan leste te anell, te lell lo lendar kol love, hoy yon leske khetne anan.
20Oun ko boudepaskro, kay las lestar panč gone pherdo roup, djas pash leste, oun penas: Mo ray, panč gone dal man. Oun dik, me lom panč vavar gone pashel.
21Penas o ray ap leste: Kova kral tou mishto. Tou hal i lačo boudepaskro. Me dom tout i tikni boudi, oun tou kral kay boudi mishto. Doleske dau me kanna boud koova an tire vasta. Ab an miro kheer dren, te vess tou mantsa barhteles!
22Oun ko boudepaskro, kay las lestar douy gone pherdo roup, kova djas ninna pash leste, oun penas: Mo ray, douy gone dal man. Oun dik, me lom douy vavar gone pashel.
23Penas o ray ap leste: Kova kral tou mishto. Tou hal i lačo boudepaskro. Me dom tout i tikni boudi, oun tou kral lat mishto. Doleske dau me kanna boud koova an tire vasta. Ab an miro kheer dren, te vess tou mantsa barhteles!
24Oun ko boudepaskro, kay yek gono pherdo roup las, kova djas pash leste, oun penas: Mo ray, me djinom, tout hi i dji dran bar. Tou leh touke o djob, hoy i vavar an i phoub čivas, te vas kova baro. Tou leh kote touke khetne, kay boudral gar. 25Doleske darom toutar, djom vin, oun khatrom tiro gono pherdo roup an i phoub. Oun dik, kate hi lo.
26Penas peskro ray ap leste: I čilačo boudepaskro hal tou. Tou kral tiri boudi gar mishto. Tou djinal, te lap mange o djob, hoy me gar an i phoub čivom, oun lap mange kote khetne, kay boudrom gar. 27Tou hounte dals mire love kolende, kay patsenn i loven vin. Oun te voms pale, palle loms boudeder love pale, har tou len dal.
28Oun palle penas o ray ap i vavarende, kay koy tardo hi: Lenn ko yek gono lestar, oun denn les koleste, kay hi les kolla vavar deesh gone! 29Hakeno, kay hi les boud, kova lell boudeder. Yaake vell les boud bravlepen. Oun kova, kay hi les gar boud, kolestar vell ninna kova krik lino, hoy les hi. 30Ko boudepaskro, kay či moldo hi, vitsrenn les an i kali rat vin! Kote rovenn le, oun dandrenn i danda i doukatar khetne.
O Debleskro tsillo
31Oun o Yezous penas: Ap ko dives, kay vell o Mensheskro Čavo an peskro tselo raylepen, oun leha venna i tsele bolepangre, palle hi lo o ray pral halauter, oun rakrell o čačepen vin pral i tsele menshende ap i phoub. 32Oun glan leste venn i tsele menshe dran hake themma khetne. Oun yob čivell len ap douy rigya, yaake har i bakrengro ray čivell i bakre ap yek rig oun i bouzya#25:32 bouzya chèvres ap i vavar rig. 33I lače menshen čivell lo ap peskri čači rig, oun i vavar ap peskri servi rig. 34Oun palle penell o baro ray ap kolende, kay ap leskri čači rig tardo hi: Ap t'mende vell i barht miro dadestar an o bolepen. Avenn oun djivenn mantsa khetne an miri harmenatsyona. Kova kamas o Devel yaake rah har o bolepen oun i phoub koy hi.
35Man his bok. Oun t'mer dan man te rhal. Man his troush. Oun t'mer dan man te piyell. Me homs kek t'mendar. Oun t'mer lan man an t'mare khera. 36Man his kek ripen ap mande. Oun t'mer dan man i ripen. Me homs nasselo. Oun t'mer van pash mande. Me homs an o stilepen. Oun t'mer van ninna pash mande.
37Palle poučenn lestar i lače menshe, kay ap peskri čači rig tardo hi: Ray, kaana his tout bok, oun mer dam tout te rhal? Oun kaana his tout troush, oun mer dam tout te piyell? 38Oun kaana hals tou kek mendar, oun mer lam tout an mare khera? Oun kaana his tout kek ripen, oun mer dam tout yek? 39Oun kaana hals tou nasselo oun stildo, oun mer vam pash toute?
40Oun o baro ray penell lenge: Čačepah, me penau t'menge: Ko lačepen, hoy t'mer yekeske mire čorvele phralendar kran, ko lačepen kran t'mer mange.
41Oun palle penell yob kolenge, kay ap leskri servi rig tardo hi: T'mer han tel o Debleskro praasepen tardo! Djan t'menge! Djan an koy yag, hoy rhačella hako tsiro, oun hoy hi o bengeske oun leskre kourepangre kerdo!
42Man his bok. T'mer dan man či te rhal. Man his troush. T'mer dan man či te piyell. 43Me homs kek t'mendar. Oun t'mer lan man gar an t'mare khera dren. Man his kek ripen, oun t'mer dan man kek. Me homs nasselo oun stildo, oun t'mer van gar pash mande.
44Oun palle penenn yon ap leste: Ray, kaana his tout bok oun troush? Kaana hals tou kek mendar? Kaana his tout kek ripen? Kaana hals tou nasselo oun stildo, oun mer hams gar touke koy?
45Palle penell lo ap lende: Čačepah, me penau t'menge: Ko lačepen, hoy t'mer gar yekeske mire čorvele phralendar kran, ko lačepen kran t'mer mange ninna gar.
46Oun kol čilače len i phagi hako tsireske. I lače lenn o djipen, hoy gar pre-herella.
Currently Selected:
Mateo 25: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
