Mateo 26
26
I čačepangre kamenn o Yezouses te marell
1Oun har o Yezous kova lauter ap i tsele menshende penas, kay kote his, penas lo peskre malenge: 2“T'mer djinenna, an douy divessa venn kol bare divessa, kay Passa#26:2 dik: 2. Mose 12 kharenna. Oun o Menshengro Čaves vell an i vasta kolendar dino, kay les ap o troushel denna, te merell lo.”
3Ap ko tsiro van i bare rashaya oun i biboldengre phoureder khetne an o kheer o baro rashayestar. Koleskro lab his Kayafas. 4Oun yon rodan i drom, har nay taprans le o Yezouses čorrhanes, te marenn le les.
5“Mer taprah les gar ap o Passa,” penan le, “te venn i menshe gar divyo oun rhoyedo ap mende.”
Koy djouvel vell gar bistedo
6Oun o Yezous his an o gab Betani, an o Simoneskro kheer. Kova hi ko Simon, kay his les i djoungelo nasslepen ap peskro mass.#26:6 Ko djoungelo nasslepen, kay o mass tele merella, kras les pale-čiddo an i biboldengre yaka.
7Oun har o Yezous kote rhas, vas i djouvel pash leste. Kolat his i toushni#26:7 toushni flasha an o vast. Kote his kouč djet dren. Ko djet čoras yoy ap leskro shero vin, te makell li les dren. 8Oun har leskre mala kova dikan, rhoyran le pen oun penan: “Hoske čoras li ko djet čičeske vin? 9Te bikrams ko djet, lams boud love. Oun kol love nay dams mer i čorvelende.”
10Oun har o Yezous hayvas, hoy rakran le, penas lo ap lende: “Moukenn koy djouvyat! Yoy kras i lačo koova. 11I čorvele hi hako tsiro pash t'mende. Me hom gar hako tsiro pash t'mende. 12Kova, hoy yoy kras, kras li, te makell li man dren ko diveske, kay vau paskedo. 13Čačepah, me penau t'menge: Ap i tseli phoub, kay mire laba i menshenge penlo venna, koy vell ninna penlo, hoy koya djouvel mange kras. Yoy vell gar bistedo.”
O Youdas phoukrell ap o Yezouseste
14Pal kova djas yek kol deesh-te-douyendar, leskro lab hi Youdas Iskariot, pash i bare rashayende, 15oun poučas lendar: “Kitse love denn man t'mer, te dau les an t'mare vasta?”
Oun yon dan les triyanda roupene beme.
16Oun palle rodas o Youdas i lačo tsiro, kay nay dals lo les an lengre vasta.
O Yezouseskre mala krenn i baro rhapen
17O dives glan ko kourko, kay i bibolde o maro rhan, kay kek shoutlo yarro dren hi, van i Yezouseskre mala pash leste, oun poučan lestar: “Kay kameh tou, te kras o rhapen touke?”
18Koy penas yob lenge, pash havo morsheste an o foro Yerusalem yon hounte djan. “Koleske penenn”, penas yob, “maro sikepaskro penell touke: Miro tsiro hi kanna kay. Pash toute kamau te rhal o rhapen mire malentsa.”
19Oun o Yezouseskre mala djan kote, oun kran les yaake, har yob kova penas. Oun yon kran o rhapen.
O Yezous rhal peskre malentsa
20Ap i rati vas o Yezous peskre deesh-te-douy malentsa an ko kheer. Oun yon beshan pen, te rhan le ko rhapen.
21Pash o rhapen penas lo ap lende: “Čačepah me penau t'menge: Yek t'mendar phoukrella ap mande.”
22Kova doukas len an o dji. Oun yon poučan lestar, yek pal o vavar: “Mo ray, hom me kava?”
23Penas lo ap lende: “Ko morsh, kay čivell o maro mantsa an yek čaro, kava phoukrell ap mande. 24O Mensheskro Čavo hounte merella, yaake har hi lestar činlo an o Debleskro lab. Havi bibarht vell ap koleste, kay ap leste phoukrella! Koleske vals feteder, te vals lo gar boldo.”
25Oun o Youdas, kay ap leste phoukrell kamell, poučas lestar: “Sikepaskro, hom me kova?” Penas o Yezous: “Ava, tou hal kova.”
26Har yon rhan, las o Yezous o maro, parkras pes pash o Debleste, phagas ko maro, das les peskre malende, oun penas: “Ake, lenn ko maro oun rhan les! Kava maro hi miro mass.”
27Palle las lo i khoro, parkras pes pash o Debleste, das lende ko khoro, oun penas: “Piyenn halauter lestar! 28Kay mool hi miro rat, hoy me ratau boudenge, te lap lengri doosh lendar. Yaake krau i drom, kay o Devel oun i menshe mala venna.
29Oun me penau t'menge: Me piyau bouder gar i mool, bis te vell ko dives, kay me piyau nevi mool t'mentsa khetne pash miro dadeste an o bolepen.”
30Oun palle givan le o Debleske i gili, oun djan vin pash o djeteskri berga.
O Yezous rakrell o Petreha
31Kote penas o Yezous lenge: “Kay rati nashenn t'mer halauter mandar. An o Debleskro lab hi činlo: O Devel penella: Me dau o bakrengro rayes. Oun i bakre nashenn penge.#26:31 dik: Zakarie 13:7 32Pal kova krell o Devel man i moulendar djido. Oun te djan t'mer an o them Galilea, djau glan t'mende.”
33Koy penas o Petro ap leste: “Ninna te nashenn halauter toutar krik, me moukau tout gar.”
34Penas o Yezous ap leste: “Čačepah me penau touke: Kay rati dell o bashno gar gole yaake rah har tou man gar triin kope bourhoste dal.”
35Penas o Petro: “Ninna te hounte meroms touha, doms tout gar bourhoste.”
Ninna kol tsele vavar penan kova.
An o baar Getsemani
36Oun palle djas o Yezous peskre malentsa an i baar#26:36 baar garta , hoy kharella Getsemani. Oun yob penas ap lende: “Beshenn t'men kate! Me djau kote, te rakrap o Debleha.”
37Oun yob las o Petres oun kol douy Zebedeskre čaven peha, oun djas kote. Oun leskro dji rovas, oun i daar tapras les.
38Koy penas lo ap lende: “Miro dji rovella, oun mange hi yaake har te merap. Ačenn kate oun sovenn gar dren!”
39Oun yob djas i kotar drom doureder, vitsras pes ap i phoub, oun mangas o Debles: “Mo dad, te kameh tou, mouk kek douka oun merepen ap mande te vell! Mangau tout: Ma kre, har me kamau! Kre yaake, har tou kameh!”
40Oun yob djas pale pash lende oun dikas, har sovan le, oun penas ap o Petreste: “Kate dik, kek tikno tsiro nay ačan t'mare yaka pre. 41Ma sovenn dren! Mangenn o Deblestar, te perenn gar miro dromestar tele! T'men kokres hi kek zoor te ačenn pash mande, ninna te kamell kova t'maro dji.”
42Oun palle djas lo i douyto kopo kote, te mangell lo o Debles. Oun yob penas pale: “Mo dad, tou te kameh gar kol douka oun merepen mandar te lell, palle mouk kova te vell, hoy tou kameh!”
43Oun yob djas pale pash lende oun dikas, te sovan le pale. Yon rikran nay pengre yaka gar pre.
44Oun yob moukas len, oun djas pale kote, te mangell lo o Debles, oun penas pale kolla laba o Debleske.
45Palle djas lo pash peskre malende pale, oun penas: “Kamenn t'mer doureder sovell oun kate čiddo ačell? O tsiro hi kay, kay denn le o Menshengro Čaves an i vasta kol čilače menshendar.
46Stenn pre! Djas menge kanna! Kanna vell kova, kay phoukrell ap mande.”
O Yezous vella tapedo
47Oun har yob yaake rakras, vas o Youdas, ko yek kol deesh-te-douyendar. Pash leste his boud vavar morsha. Len his rhare oun kashta an i vasta. Kolen bičran i bare rashaya oun i biboldengre phoureder.
48O Youdas kras lentsa vin: “Koles, kay čoumrau, kova hi lo. Koles taprenn!”
49Oun sik djas lo pash o Yezouseste oun penas ap leste: “Lačo dives, mo ray!” oun čoumras les.
50Penas o Yezous: “Mo maal, hoske val tou?” Oun palle van kol vavar morsha, tapran o Yezouses, oun pandan les.
51Oun yek kolendar, kay o Yezouseha djas, las peskro rharo oun das yek klisteske o kand tele. Oun kova his i klisto, kay boudrell o baro rashayeske.
52Koy penas o Yezous: “Čip tiro rharo tele! Hakeno, kay i rharo lella oun dell i vavares, ko vell i rhareha moulo dino. 53Me nay mangoms miro dadestar an o bolepen, te bičrell lo mange boudeder har efta-deesh-te-douy zerya (72.000) bolepangren, te venn le ap miri rig.
54Kova te kroms, palle nay vals kova gar čačo, hoy an o Debleskro lab činlo hi.”
55Oun koy pre penas lo ap kol tsele morshende, kay troul leste tardo hi: “T'mer van i rharentsa oun i kashtentsa pash mande, har te voms i marepaskro. Hako dives homs an o Debleskro baro kheer oun sikrom i menshende o Debleskro drom. Oun t'mer tapran man gar. 56Kava lauter hounte djas, te vell čačo, hoy o Debleskre rakepangre glan i rah tsiro an pengre lila činan.”
Har peskre mala kova shounan, nashan le penge lauter lestar.
O Yezous hi glan i čačepangre tardo
57Kolla, kay o Yezouses pandan, anan les pash o baro rashayeste, o Kayafas. Oun kote van i biboldengre čačepangre oun phoureder khetne. 58Dour pal leste djas o Petro leske palla, oun vas glan o shoukar kheer o baro rashayestar. Oun yob djas an o baro voudar dren, oun beshas pes pash i lourdende, te nay dikell lo, hoy krenn le o Yezouseha.
59Oun i bare rashaya oun i tsele pralstoune bibolde rodan morshen, kay anenn rhorheno koova ap o Yezouseste, te nay marenn le les.
60Oun yon hatsan či, ninna te van boud morsha pash lende, kay anan rhorheno koova ap leste. Palle van douy morsha pash lende, 61oun penan: “Kava morsh penas, te nay phagell lo o Debleskro baro kheer tele, oun te nay čivell lo les an triin divessa pale pre.”
62Oun o baro rashay stas pre oun poučas o Yezousestar: “Peneh tou či ap kova, hoy yon ap toute pre anan?”
63O Yezous penas či.
Pale penas o baro rashay ap leste: “Glan o djido Devel, pen menge: Hal tou ko baro ray, kolestar o Devel penas, te vell yob? Hal tou o Debleskro čavo?”
64Penas o Yezous: “Ava, hi yaake, har tou penal. Oun kanna penau t'menge: Ko tsiro vell sik, kay dikenn t'mer o Menshengro Čaves, har hi lo beshdo ap i čači rig o zorelo Deblestar, oun har vell lo ap i volke dran o bolepen.”
65Koy kras o baro rashay peskro ripen paash, te sikrell lo peskri rholi, oun penas ap i vavar pralstunende: “Yob krell pes har o Devel. T'mer shounan les. Kek hounte penell menge boudeder. 66Hoy kamenn t'mer leha te krell?”
Penan le: “Yob hounte vell maredo.”
67Oun palle čoungran le leske an o mouy, oun dan les ap o shero. Vavar dan les an o mouy, 68oun penan ap leste: “Tou, baro ray, pen menge, koon das tout?”
O Petro dell o Yezouses bourhoste
69O Petro his vin glan o kheer beshdo. Oun i boudepaskretsa vas pash leste, oun penas ap leste: “Tou hal ninna yek kolendar, kay o Yezouseha dran o them Galilea vas.” 70Oun yob rhorhras glan kol tsele menshende, kay koy beshdo hi, oun penas: “Me hayvau gar, hoy tou peneh.”
71Oun yob djas vin pash o baro voudar glan ko kheer. Kote dikas les i vavar boudepaskretsa. Oun koya penas ap kolende, kay kote tardo hi: “Kova hi ninna yek kolendar, kay his o Yezouseha dran Nazaret khetne.” 72Oun pale rhorhras lo, das pes sovel, oun penas ap late: “Me prindjrau kava morshes gar.”
73Oun pal i tikno tsiro van kolla pash o Petreste, kay kote tardo hi, oun penan ap leste: “Čačepah, tou hal ninna yek kolendar. Tiro rakepen phoukrell ap toute.”
74Koy čingras lo, das pes sovel, oun penas ap lende: “Me prindjrau kava morshes gar!”
Oun sik koy pre das o bashno gole.
75Oun o Petreske van o Yezouseskre laba an o shero, hoy yob leske penas: “O bashno dell gar gole yaake rah, har tou man gar triin kope bourhoste dal.”
Oun o Petro djas dran o baro voudar vin, oun rovas zoreles.
Currently Selected:
Mateo 26: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
