Mateo 23
23
I čačepangren hi douy djia
1Palle rakras o Yezous ap i tsele menshende, kay troul leste tardo his, oun ap peskre malende, 2oun penas: I biboldengre čačepangre oun i Farisarya, kolen hi o Moseskro vast, te penenn le i menshenge o Debleskro lab.
3Kova, hoy yon t'menge penenna, kova krenn lauter oun rikrenn t'men ap kova! Kova, hoy yon krenna, ma krenn! Yon kokres krenn kova gar, hoy yon i menshenge penenna.
4Oun yon krenn i menshenge o djipen pharo. Ko tselo koova, hoy kolla hounte rikrenn, hi har i pharo gono ap lengri phik. I čačepangre oun i Farisarya kokres rikrenn pen gar ap kova. 5Lauter, hoy kolla krenna, krenn le, te dikenn kova i vavar. Te pandenn le i diklo troul o shero oun troul i moussi, kay o Debleskre laba dren činlo hi, yaake hi lengro diklo bourhleder har ko diklo i vavar morshendar. Oun len hi lengste koola ap pende, te sikrenn le i menshende, te hi le o Debleskre morsha.
6Pash i baro rhapen kamenn le ap i feteder beshepangre te beshell. Oun an i biboldengre kangria kamenn le ap i pralstoune beshepangre te beshell. 7Te djan le an o foro, kamenn le, te penenn i menshe ap lende: Lačo dives, mo ray.
8T'menge penau me: Ma moukenn t'men te kharell: Mo ray! T'mer han halauter phrala. Yek kokres hi t'maro ray.
9Ma kharenn yekes ap kay phoub: Dad! Yek dad hi t'men. Kova hi o Devel an o bolepen.
10Ma moukenn t'men te kharell: Baro sikepaskro! Yek baro sikepaskro hi t'men. Kova hi o Kristo. 11O bareder t'mendar te vell t'maro boudepaskro. 12Kova, kay krell pes baro, koles krell o Devel tikneder har i vavar. Kova, kay krell pes tikno, koles krell o Devel baro.
13T'mer čačepangre oun Farisarya! Kova, hoy t'mer krenna, ko hi gar mishto. T'maro patsepen ap o Debleste hi rhorhepen! T'mer krenn o voudar pandlo, te vell kek ap o Debleskro drom. T'mer djan gar koy dren. Vitar gar moukenn i vavaren dren te djal.
14T'mer čačepangre oun Farisarya! Kova, hoy t'mer krenna, ko hi gar mishto. T'maro patsepen ap o Debleste hi rhorhepen. T'mer lenn i khera i djouvyendar krik, kolengre romma moulo hi. T'mer te rakrenn o Debleha, rakrenn t'mer i rah tsiro, te dikenn i menshe har patslo t'mer han. O Devel rakrell o čačepen pral t'mende vin, oun t'mer lenn i zorleder phagi har i vavar.
15T'mer čačepangre oun Farisarya! Kova, hoy t'mer krenna, ko hi gar mishto. T'maro patsepen ap o Debleste hi rhorhepen. T'mer djan pral i tseli phoub, te anenn i menshenge o biboldengro patsepen. Oun te djivell yek pal t'maro patsepen, palle krenn lestar i bengeskro čavo. Oun yob vell douy kope čilačeder har t'mer han.
16Kova, hoy t'mer krenna, ko hi gar mishto. T'mer kamenn i vavaren o čačo drom te sikrell, oun han kokres har i korele, kay či dikenna. T'mer penenn i menshenge: “Te dell yek pes ap o Debleskro baro kheer sovel, yaake hi kava sovel či moldo. Te dell yek pes ap o sonakay sovel, hoy an o Debleskro baro kheer hi, palle hounte krell lo kova, hoy yob penas.” 17T'mer han dinelo oun korelo! Hi o Debleskro baro kheer gar boudeder moldo har o sonakay, hoy an koleste hi oun doleske i Debleskro koova hi? 18T'mer penenn i menshenge ninna: Te dell yek pes ap o Debleskri rhačepaskri sovel, palle hi kava sovel či moldo. Te dell yek rhapen sovel, hoy ap late čiddo hi, palle hounte krell lo kova, hoy yob penas.
19T'mer han korelo! Hi o Debleskri rhačepaskri gar boudeder moldo har o rhapen, hoy ap late čiddo hi oun doleske i Debleskro koova hi? 20Kova, kay dell pes ap o Debleskri rhačepaskri sovel, kova dell pes ninna ap lauter sovel, hoy kote pre čiddo hi. 21Kova, kay dell pes ap o Debleskro baro kheer sovel, kova dell pes ninna ap o Debleste sovel, kay kote djivella. 22Kova, kay dell pes ap o bolepen sovel, kova dell pes ninna ap o Debleskro beshepaskro sovel oun ap o Debleste, kay kote beshdo hi.
23T'mer čačepangre oun Farisarya! Kova, hoy t'mer krenna, ko hi gar mishto! T'maro patsepen hi rhorhepen. T'mer denna o Debleste o deshto kotar dran hako zenlepen an t'mari baar#23:23 baar garta . Oun t'mer bistrenn ko bareder koova, hoy o Devel t'mendar kamella: O čačepen, oun o kamlepen, oun o patsepen. Kava hounte krenn, oun ko vavar gar moukenn! 24T'mer kamenn i vavaren o čačo drom te sikrell, oun han kokres har i korele, kay či dikenna. T'mer trashenn hako tikno koova, hoy t'men pale-čiddo krella, oun denn gar garda ap kova, hoy t'men glan o Debleste pale-čiddo krella.
25T'mer čačepangre oun Farisarya! Kova, hoy t'mer krenna, ko hi gar mishto! T'maro patsepen hi rhorhepen! T'mer thovenn i khore oun čare kokres vriyal. T'mer han har i čaro, hoy vin djoudjo hi oun dren djoungelo. An t'mare djia han boklo oun čilačo. 26Tou Farisari, tou hal korelo. Kre tiro dji djoudjo! Palle vell touke o tselo vavar koova ninna djoudjo.
27T'mer čačepangre oun Farisarya! Kova, hoy t'mer krenna, ko hi gar mishto! T'maro patsepen hi rhorhepen! T'mer han har i moulengre khera, hoy parno kerdo van. Kolla hi vin shoukar. Dren hi le pherdo čik oun kokale. 28Yaake han t'mer. Te dikenn t'men i menshe, patsenn le, te han lače oun čače menshe. An t'mende hi lauter rhorhepen oun čilačepen.
29T'mer čačepangre oun Farisarya! Kova, hoy t'mer krenna, ko hi gar mishto! T'maro patsepen hi rhorhepen! T'mer krenn shoukar moulengre khera kolenge, kay his o Debleskre rakepangre. Oun i moulengre khera, kay lače menshe paskedo hi, krenn t'mer shoukar oun raylo. 30Oun t'mer penenna: Te djivams mer an ko tsiro, kay mare phoure djivan, palle marams mer kol Debleskre rakepangren gar.
31Me penau t'menge: Te penenn t'mer kova yaake, palle sikrenn t'mer, kay han i čave kolendar, kay o Debleskre rakepangren maran. 32Ava, krenn kova doureder yaake, har t'mare phoure kran!
33T'mer han sapa. Ava, čilače sapa han t'mer. O Devel vitsrell t'men an o bengeskri yag. Oun t'mer nashte nashenn gar glan koleste krik.
34Shounenn, bičrau pash t'mende mire rakepangren, mire goseve morshen, oun mire čačepangren. Kolen denn t'mer ap o troushel, marenn len, oun denn len dava an t'mare kangria. Oun t'mer lenn len palla an hako foro.
35T'mer han čilačo har t'mare phoure. Yon maran i lače menshen yaake rah har i phoub tardo hi: O lačo morsh Abel vas maredo glan i tsele vavar menshende.#23:35 O Abel his o Adameskro čavo. Pal leste maran le vavar lače menshen bis ap ko tsiro, kay o Zakari maredo vas, koleskro dad his o Baraki. O Zakares maran t'mer mashkral o Debleskro kheer oun i sasterni rhačepaskri, kay i firhe o Debleske rhačedo venna.
Doleske vell i phagi ap t'mende, kay kanna djivenna.
36Čačepah, me penau t'menge: Kalla menshe, kay kanna djivenna, kolla lenna i tseli phagi.
O Yezous rakrell pral o foro Yerusalem
37T'mer menshe an o foro Yerusalem! T'mer maran o Debleskre rakepangren, oun dan kolen i barrentsa moulo, kay o Devel pash t'mende bičras. Boud kope kamom t'men pash mande te lell, te dap garda ap t'mende, har i karhni ap peskre terne garda della, oun lell len tel peskre phora. Oun t'mer kaman gar. 38Doleske moukell o Devel peskro kheer pash t'mende oun djivell bouder gar koy#23:38 dik: Yeremia 22:5; 1. Rayengro liil 9:7-8.
39Oun me penau t'menge: T'mer dikenn man yaake rah bouder gar bis te vas ko tsiro, kay t'mer penenna: Sharedo vell kova, kay hi o Deblestar bičedo!
Currently Selected:
Mateo 23: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
