1. Mose 17
17
O Abram lell i nevo lab: Abraham
1O Abram his 99 (enya-deesh-te-enya) bersh phouro. Koy moukas pes o baro Devel glan leste te dikell, oun penas ap leste: “Me hom o zorelo Devel. Dja ap miro drom, te hatsap kek čilačepen ap toute! 2Me kamau touha vin te krell, te vap tiro Devel, oun tou oun tire menshe venn mire menshe. Oun me dau tout boud boud čave, kay pal toute venna.”
3Koy moukas pes o Abram ap i phoub te perell. Oun o Devel rakras leha oun penas: 4“Shoun, kova hi, hoy me touke krau: Tou veh o dad boud menshendar. Yon venn yaake boud, kay lendar boud natsyone venna. 5Doleske kharess tou bouder gar Abram. Kanna vell tiro lab Abraham#17:5 Abraham, ap hebretikes čomone har: dad boud natsyonendar . Me krau te vess o dad boud natsyonendar. 6Me dau tout yaake boud čaven, kay pal toute venna, te venn lendar natsyone. Ninna bare raya venna toutar.
7Kova, hoy me touha vin krau, ačell hako tsiro mange oun touke, tire čavenge, kolengre čavenge oun lauterenge, kay pal toute venna. Me hom tiro Devel oun ko Devel tire čavendar, kay pal toute venna. 8Oun me dau tout oun tire čaven kava them, kay tou kanna i vi-themari hal. Kava tselo them Kanaan vell lengro hako tsiro. Oun me hom lengro Devel.”
9Oun o Devel penas pale ap o Abrahameste: “Tou oun tire čave oun kolengre čave oun lauter, kay pal toute venna, t'mer hounte krenn t'maro kotar kolestar, hoy mer vin kram. 10Kava hounte krenn t'mer, tou oun tire čave, kay pal toute venna: Činenn hake morshen pash t'mende ap lengro mass. 11Kova hi o sikepen, kay han mire menshe. 12Hako morsh čavo pash t'mende hounte vell činlo, te hi yob orhta divessa phouro. Krenn kova ninna i tsele morsh čaventsa, kay pal t'mende venna! Činenn ninna i morsh čaven t'mare boudepangrendar: kolla, kay pash t'mende boldo van, oun kolla, kay ginan vavarendar, kay gar t'mare menshendar hi. 13Činlo hounte vell hako boudepaskro, kay pash t'mende boldo vas oun t'mendar ginlo vas. Ap t'maro mass dikenn t'mer, kay han mire menshe. Kava koova ačell yaake hako tsiro. 14Hako morsh, kay gar činlo hi ap peskro mass, kova hounte ačell bouder gar djido mashkral peskre menshende. Yob rikras pes gar ap kova, hoy mer vin kram.”
15Oun o Devel penas pale ap o Abrahameste: “Tou peness bouder gar Saray ap tiri romyate. Lakro lab vell kanna Sara. 16Oun me čivau miri zoor oun miri barht ap late. Oun ninna latar dau tout i čaves. Ava, me čivau miri zoor ap late. Yoy vell i day boud menshendar. Latar venna yaake boud menshe, kay lendar natsyone venna. Ninna bare raya pral boud menshende venna latar.”
17Koy moukas pes o Abraham ap i phoub te perell, sanas oun penas peske: “Me hom sheel bersh phouro. Oun man te vell i čavo? Oun i Sara hi enya-deesh bersh phouro. Yoy te lell i ternepen?” 18Oun o Abraham penas ap o Debleste: “Ah, mouk kova, hoy tou mange penal, ap o Ismael te vell!”
19“Na-a”, penas o Devel, “tiri romni, i Sara, anell touke i čaves ap i phoub. Koles dess tou o lab Isaak. Koleske oun leskre čavenge ačell kova, hoy me touha vin krom hako tsireske. 20Ninna, hoy tou mandar mangal tiro čaveske Ismael, kamau me te krell. Shoun, me čivau miri zoor oun miri barht ap leste. Oun me dau les boud čaven, te venn lestar boud boud menshe. Yob vell o dad deesh-te-douy rayendar oun lestar vell i bari natsyona. 21Kokres ko koova, hoy me touha vin krom, te vap t'maro Devel oun te venn t'mer mire menshe, kova djal doureder ap o Isaak. Koles leh tou tiri romyatar Sara ko vavar bersh an kava tsiro.”
22Oun o Devel heras pre, te rakrell lo o Abrahameha oun djas peske.
23Oun o Abraham las peskro čaves Ismael oun kol morshen, kay pash leste boldo van oun kolen, kay yob i vavarendar ginas. Oun činas len ap lengro mass. Ap kava dives činas yob i tsele morshen an peskro kheer, yaake har o Devel leske penas.
24Har o Abraham ap peskro mass činlo vas, his lo 99 (enya-deesh-te-enya) bersha phouro. 25Oun leskro čavo Ismael his 13 (deesh-te-triin) bersh phouro, har yob ap peskro mass činlo vas. 26Yaake van o Abraham oun peskro čavo Ismael ap kava dives činlo. 27Oun i tsele morsha an leskro kheer, kay pash leste boldo van, ninna kolla, kay i vavarendar ginlo van, van lentsa činlo.
Currently Selected:
1. Mose 17: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
