1. Mose 18
18
O baro Devel vell pash o Abrahameste
1Oun o baro Devel moukas pes te dikell o Abrahamestar pash kol bare rouka Mamre, har o dives tato his oun o Abraham glan peskro plarhteno kheer beshdo his. 2Ap yek kopo dikas yob triin morshen. Kolla his i kotar glan leste tardo. Har yob len dikas, stas lo pre, nashas pash lende oun moukas pes glan lende ap i phoub te perell. 3Oun penas: “Miro ray! Te hal tou mange lačo, dja mandar gar doureder! Me mangau tout: Ač kay! 4T'menge vell pani anlo, te thovenn t'mare herya. Oun beshenn t'men tel ko rouk! 5Me lau t'menge maro, te venn pale zoreles. Pal kova nashte djan doureder, har t'mer kamenna. Yaake van gar čičeske pash mande.”
Oun yon penan: “Kre yaake, har tou penal!”
6Koy nashas o Abraham sik an o plarhteno kheer pash i Sara oun penas: “Le sik triin khore parno yarro oun kre merklia!” 7Oun yob nashas pash i groumyende, oun rodas peske i lači terni groumni vin. Oun das lat o boudepaskreste, te krell yob sik i lačo rhapen. 8Oun o Abraham las lačo khil, thoud oun ko mass. Oun čivas lauter glan lende tel ko rouk. Oun yob ačas glan lende tardo, har yon rhan.
9Koy poučan yon lestar: “Kay hi tiri romni Sara?”
“Kote an o plarhteno kheer”, penas yob.
10Koy penas yek kol trinendar ap leste: “Čačepah, vavar bersh an kava tsiro vau me pale pash toute. Koy hi tiri romyat, i Sara, i čavo.”
Oun i Sara his tardo pal leste, pal o voudar ko plarhteno kherestar, oun shounas lengro rakepen. 11O Abraham oun i Sara his hake douy phouro. Oun i Sara djinas, kay nay lell li bouder kek čave. 12Koy sanas yoy peske oun penas: “Kanna hom me phouro. Oun miro ray, miro rom, hi ninna phouro! Har nay lau me i ternepen?”
13Koy penas o baro Devel ap o Abrahameste: “Hoske sanas i Sara oun penas: Kanna, kay phouro hom, lau me i ternepen? 14Dell či, hoy o baro Devel gar hayvella. Vavar bersh an kava tsiro, vau me pale pash toute. Koy hi lat i čavo.” 15Koy las i Sara daar oun das bourhoste oun penas: “Me som gar!”
“Na-a, tou sal”, penas o Devel.
O Abraham mangell i menshenge an o foro Sodom
16Oun i morsha stan pre oun djan penge. Oun o Abraham djas i kotar lentsa. Oun yon dikan ap ko them, kay o foro Sodom tardo hi. 17Koy penas o baro Devel peske: “Penap me o Abrahameske gar, hoy me kamau te krell? Na-a! 18Me dom les miro lab: Yob vell o dad yaake boud menshendar, te vell lendar i bari oun zoreli natsyona. Oun koy barht, hoy dau leste, djal doureder ap i tsele natsyone, kay ap i phoub hi. 19Me rodom les mange vin, te penell lo peskre čavenge oun kolenge, kay pal leste venna, te rikrenn pen le ap miro drom oun krenn, hoy mishto oun čačo hi, te nay moukap me halauter ap o Abrahameste te vell, hoy me leske penom.”
20Oun o baro Devel penas: “Boud djoungelo koova vas pral i forya Sodom oun Gomorra rakedo, kay yon an baro čilačepen djivenna. 21Doleske kamau me tele te djal, te dikap: Hi kova ninna čačo, hoy rakedo vas? Oun te hi vavarčandes, kamau kova ninna te djinell.”
22Oun kol douy morsha rissran pen trouyel oun djan an o foro Sodom. O baro Devel ačas glan o Abrahameste tardo. 23Oun o Abraham djas pash leste oun penas: “Kameh tou čačepah lauteren temerl dell, kolen, kay kek čilačepen kran – khetne kolentsa, kay čilačo hi? 24Te hi an ko foro 50 (paash-sheel) menshe, kay krenn, hoy mishto oun čačo hi, kameh tou kolen ninna te marell? Te hatseh kote 50 (paash-sheel) menshen, kay kek čilačepen kran, de o fores kek phagi! 25Ko nashte kreh tou gar, te dess kolen temerl, kay kek čilačepen kran – khetne kolentsa, kay čilačo hi. Yaake te djal koleske, kay an o čačepen tardo hi, har koleske, kay čilačo hi. Tou hal o čačepaskro ray pral i tseli phoub. Kameh tou čomone te krell, hoy gar mishto oun čačo hi?”
26Koy penas o baro Devel: “Te hatsau me 50 (paash-sheel) menshen an o foro Sodom, kay krenna, hoy mishto oun čačo hi, dau o tselo fores kek phagi.”
27Penas o Abraham: “Shoun, miro ray, me lom man khetne, te rakrap touha, kay me čik oun či moldo hom. 28Hoy kameh te krell, te hi panč kol 50 (paash-sheel) menshendar gar an o čačepen tardo? Kameh dran kol pančende ko tselo foro te marell?”
Koy penas yob: “Te hatsau me 45 (star-deesh-te-panč) menshen kote, kay an o čačepen tardo hi, kamau ko foro či te krell.”
29Oun o Abraham rakras pale leha oun penas: “Te hatseh lendar kote 40 (star-deesh), hoy kameh te krell?”
Penas o Devel: “Te hi kote 40 (star-deesh) menshe, kay krenna, hoy mishto oun čačo hi, kamau ko foro či te krell.”
30Oun o Abraham penas: “Miro ray, ab gar rhoyedo, te rakrau pale touha. Hoy, te hatseh kote 30 (triyanda)?”
Penas yob: “Te hatsau 30 (triyanda), kamau ko foro či te krell.”
31Koy penas o Abraham: “Shoun miro ray, me lom man khetne, te rakrap pale touha. Hoy, te hatseh kote 20 (biish)?”
Penas yob: “Te hi kote 20 (biish), kamau ko foro či te krell.”
32Koy penas o Abraham: “Miro ray, me mangau tout, ab gar rhoyedo! Me kamau gomme yek kopo touha te rakrell. Hoy, te hatseh kote deesh?”
Penas yob: “Te hi kote deesh, kamau ko foro či te krell.”
33Oun o baro Devel heras pre, te rakrell lo o Abrahameha oun djas peske. Oun o Abraham djas pale khere.
Currently Selected:
1. Mose 18: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
