Phŭn Blŭng 42

Môt yŏng Yôsep nao blơi dai pơ čal Êjĭp

1Tơl Yakô̆p hmĭ laĭ pơ čal Êjĭp hmâo dai, nŭn ñu pơhiăp hr̂ŏm môt nă đahkơi ñu: «Yĕt gô-ih dŏ ep nao r̂ai gŏp gô-ih nĭng nŭn lĕ?» 2Nŭn ñu laĭ: «Nêne kâo hmĭ a laĭ pơ čal Êjĭp hmâo dai, br̂ơi gô-ih tr̂ŭn nao blơi dai pơ anŭn wŏ, ta mơ̆ng dĭp, ta huai djai.» 3Nĭng nŭn yơh, môt yŏng Yôsep pluh r̂ăng, gơñu tr̂ŭn nao blơi dai pơ čal Êjĭp. 4Plai Ƀênyamin adơi Yôsep dŏng, Yakô̆p bĭ br̂ơi ñu nao hr̂ŏm yŏng ñu ôh, yua Yakô̆p laĭ: «Huĭ dah ñu pŏ klơi kơnap-tap.» 5Nĭng nŭn yơh, môt nă Israel#42:5 Nă Israel nŭn ha tô̆ «Nă Yakô̆p» nŭn yơh, yua Yakô̆p hmâo ƀŏ dua. An Phŭn 32:28. nao blơi dai hr̂ŏm r̂ăng, yua mơ̆ng lŏn-ia Kanan hmâo klơi ĭ lơpa mơ̆n.

6Pah nôk nŭn, Yôsep ngă khua mơ̆ng čal Êjĭp, ñu yơh pô ƀuo dai pơ tơgr̂ư̆ nă plơi lan dŏ mơ̆ng čal nŭn. Tơl môt yŏng Yôsep mŭt nao, nŭn gơñu bon kô̆p kŏ gơñu tơl pơ kơnah ti năp Yôsep. 7Tơl Yôsep ƀôh môt yŏng ñu, ñu thâo kr̂ăn môt gơñu yơh, plai ñu ngă lôi pô ñu hla ti bĭ thâo kr̂ăn môt gơñu ôh, jr̂ŏng nŭn ñu pơhiăp khui hr̂ŏm môt gơñu: «Môt gih r̂ai mơ̆ng pă?» Gơñu til glaĭ: «Mơi r̂ai mơ̆ng lŏn-ia Kanan, čiăng blơi dai.» 8Yôsep thâo kr̂ăn môt yŏng ñu, plai gơñu bĭ thâo kr̂ăn Yôsep ôh. 9Pah anŭn Yôsep hơdŏl glaĭ klơi ñu lơpơi mơ̆ng môt yŏng ñu,#An Phŭn 37:5-10. jr̂ŏng nŭn Yôsep pơhiăp hr̂ŏm gơñu: «Gih môt r̂ai sưp-suŏn yơh, gih r̂ai čiăng sem ƀon pă dơdu mơ̆ng čal ne#42:9 Sem ƀon pă dơdu mơ̆ng čal ne Hêbrơ laĭ «Ƀôh klơi mlâo čal ne.» đơč.» 10Jr̂ŏng nŭn môt gơñu til glaĭ: «Bĭ ôh khua, môt mơi hlŭn ih, mơi r̂ai blơi nŏ ƀŏng đơč. 11Bih mơi ne, ha ma đơč. Mơi hlŭn ih, mơi mơnuih kơpă, mơi bĭ djơ̆ mơnuih sưp-suŏn ôh!» 12Jr̂ŏng nŭn Yôsep til glaĭ: «Bĭ ôh, gih r̂ai čiăng sem ƀon pă dơdu mơ̆ng čal ne yơh!» 13Nŭn môt gơñu til glaĭ: «Mơi hlŭn ih, mơi hmâo yŏng dơi pluh dua r̂ăng, bih mơi ne ha ma đơč. Nêne ma mơi, ñu dŏ mơ̆ng lŏn-ia Kanan. Adơi nŭč mơi dŏ glaĭ hr̂ŏm ma mơi, adơi mơi ha r̂ăng dŏng, ñu ñă lôi yơh.» 14Jr̂ŏng nŭn Yôsep pơhiăp hr̂ŏm môt gơñu: «Djơ̆ hla ti kâo laĭ dơdi, gih môt r̂ai sưp-suŏn dơdi yơh! 15Kâo ti long-lăng gih hla ne: Kâo uăn mơ̆ng Pharon,#42:15 Kâo uăn mơ̆ng Pharon Hêbrơ laĭ «Tui klơi hơdĭp Pharon.» môt gih bĭ biă đuĕ mơ̆ng ane ôh, tơl adơi nŭč gih r̂ai pơ ane ƀơĭ. 16Br̂ơi gih pơđơi ha r̂ăng mơ̆ng môt gih glaĭ tô̆ adơi nŭč gih ba r̂ai, plai môt gih dŏng, r̂ăng ti čĕ dăng mơ̆ng sang khŭk ƀơĭ. Nĭng nŭn yơh, kâo ti long-lăng gih, čiăng thâo kr̂ăn laĭ klơi gih pơhiăp nŭn kơpă mơ̆n ah. Jơ̆ laĭ bĭ kơpă ôh, nŭn kâo tô̆ ƀŏ Pharon#42:16 Kâo tô̆ ƀŏ Pharon Hêbrơ laĭ «Tui klơi hơdĭp Pharon.» laĭ, môt gih r̂ai sưp-suŏn dơdi yơh.» 17Jr̂ŏng nŭn Yôsep ba nao môt gơñu čĕ dăng tăm khŭk klâo r̂ơi.

18Tơl r̂ơi ti klâo, Yôsep pơhiăp hr̂ŏm môt gơñu: «Br̂ơi gih ngă hla ne, gih mơ̆ng hmâo klơi hơdĭp, yua kâo mơnuih huĭ pơpô̆ Ơi Adai, 19jơ̆ laĭ gih mơnuih kơpă dơdi, br̂ơi gih čr̂oh glaĭ ha r̂ăng tăm sang khŭk gih dŏ ne, plai môt pơkŏn dŏng, biă nao tô̆ dai ba glaĭ pơ mơnuih dŏ ĭ lơpa pơ sang wŏ. 20Gah adơi nŭč môt gih, ba r̂ai pơ kâo wŏ, kâo mơ̆ng thâo jel laĭ gih kơpă dơdi, nŭn gih huai djai.» Nŭn yơh gơñu ngă tui nĭng nŭn. 21Gơñu pơhiăp nao r̂ai gŏp gơñu: «Ta hmâo kơđi yua mơ̆ng klơi ta ngă glaĭ mơ̆ng adơi ta dơdi yơh, ta ƀôh klơi kơnap-tap ñu pah ñu dueh alôm ta, plai ta bĭ hmĭ ñu ôh. Yua nŭn yơh, klơi set ne lĕ r̂ai pơ ta dŏng.» 22Pah anŭn Ruƀên til đĭ, ñu laĭ: «Hiư̆m, kâo bĭ khă ôh gô-ih? Kâo laĭ anăm ngă glaĭ mơ̆ng nă muai nŭn ôh.#An Phŭn 37:21-22. Plai gô-ih bĭ hmĭ kâo ôh. Ep wŏ, nêne môt ta hmâo kơđi yua mơ̆ng dr̂ah ñu boih#42:22 Môt ta hmâo kơđi yua mơ̆ng dr̂ah ñu boih Hêbrơ laĭ «A tĭ glaĭ dr̂ah ñu boih.» .»#An Phŭn 9:5-6. 23Gơñu bĭ thâo kr̂ăn laĭ Yôsep thâo hmĭ klơi gơñu pơhiăp nŭn ôh, yua hmâo mơnuih pr̂e br̂ơi gơñu. 24Jr̂ŏng nŭn Yôsep biă đuĕ mơ̆ng môt gơñu, nŭn ñu hia. Tơl ñu wŏt glaĭ, ñu pơhiăp hr̂ŏm môt gơñu dŏng, jr̂ŏng nŭn ñu mă čă lôi Simien ti năp môt gơñu. 25Jr̂ŏng nŭn Yôsep pơđơi r̂ăng čr̂ŏ dai bŏ mơ̆ng kơpâo, dăp čr̂oh glaĭ len tăm kơpâo gơñu ha r̂ăng ha r̂ăng, wŏt pha br̂ơi gơñu hnă ƀŏng r̂ok glan he mơ̆n. Nŭn r̂ăng ngă tui klơi ñu pơđơi.

Môt yŏng Yôsep wŏt glaĭ pơ Kanan

26Nŭn gơñu pô̆ dai čr̂oh mơ̆ng r̂ŏng lie, jr̂ŏng nŭn biă đuĕ mơ̆ng anŭn. 27Tơl ƀon gơñu ti đŏm, hmâo ha r̂ăng kleh kơpâo mă dai čem lie, phŏ, ñu ƀôh len ñu pô, tăm bah kơpâo ñu. 28Jr̂ŏng nŭn ñu r̂ă br̂ơi yŏng dơi ñu: «Ep ne wŏ, r̂ăng čr̂oh glaĭ len kâo, ñu dŏ tăm kơpâo kâo!» Nŭn gơñu lĕ tai huĭ tơtĭ-djĭl, ep nao r̂ai gŏp gơñu, jr̂ŏng nŭn pơhiăp laĭ: «Nŏ yĕt Ơi Adai ngă ta nĭng ne lĕ?»

29Tơl gơñu tr̂uh glaĭ pơ Yakô̆p ma gơñu pơ lŏn-ia Kanan boih, gơñu r̂ă r̂oi br̂ơi ma gơñu bih buă gơñu pŏ, 30gơñu laĭ: «Pô khua mơ̆ng čal nŭn pơhiăp hr̂ŏm mơi khui jat, jr̂ŏng nŭn ñu săl mơi, ñu laĭ mơi môt nao sưp-suŏn čal ñu. 31Plai mơi r̂ă br̂ơi ñu, “Mơi mơnuih kơpă, bĭ djơ̆ mơnuih sưp-suŏn ôh. 32Mơi hmâo yŏng dơi pluh dua r̂ăng, bih mơi ne ha ma đơč. Adơi mơi ha r̂ăng ñă lôi yơh, gah adơi nŭč dŏng, ñu dŏ glaĭ hr̂ŏm ma mơi mơ̆ng lŏn-ia Kanan.” 33Plai pô khua čal nŭn pơhiăp hr̂ŏm mơi, “Ngă luaĭ ne, kâo mơ̆ng thâo kr̂ăn laĭ gih mơnuih kơpă: Br̂ơi gih čr̂oh glaĭ yŏng dơi gih ha r̂ăng hr̂ŏm kâo, jr̂ŏng nŭn tô̆ dai ba glaĭ pơ mơnuih dŏ ĭ lơpa pơ sang gih. 34Jr̂ŏng nŭn ba r̂ai adơi nŭč gih pơ kâo, nŭn kâo mơ̆ng thâo kr̂ăn laĭ gih bĭ djơ̆ mơnuih sưp-suŏn ôh, gih mơnuih kơpă dơdi. Nŭn kâo ti br̂ơi glaĭ yŏng dơi gih ne, jr̂ŏng nŭn kâo ti br̂ơi gih r̂ai sem ƀŏng mơ̆ng čal ne he mơ̆n.”»

35Tơl gơñu tuh dai mơ̆ng kơpâo, phŏ, ƀôh gơdŭng len gơñu pô tăm kơpâo gơñu ha r̂ăng ha r̂ăng. Tơl gơñu ƀôh gơdŭng len nŭn, gơñu huĭ, dăp ma gơñu huĭ hr̂ŏm mơ̆n. 36Nŭn Yakô̆p laĭ: «Gô-ih ngă br̂ơi kâo bĭ hmâo nă. Yôsep ñă lôi boih, dăp Simien ñă lôi mơ̆n, nêne gô-ih ti tô̆ Ƀênyamin dŏng! Bih klơi ne ngă pơtr̂ă br̂ơi kâo boih.» 37Pah anŭn Ruƀên pơhiăp hr̂ŏm ma ñu: «Jơ̆ laĭ kâo bĭ ba glaĭ ñu pơ ih ôh, br̂ơi ih pơdjai lôi nă đahkơi kâo dua r̂ăng wŏ. Br̂ơi ih mop ñu mơ̆ng ngan kâo wŏ, nŭn kâo pô ti ba glaĭ ñu pơ ih.» 38Plai Yakô̆p laĭ: «Nă kâo bĭ tr̂ŭn nao hr̂ŏm gô-ih ôh, yua yŏng ñu djai lôi boih, dŏ glaĭ ha dr̂ơi ñu đơč. Jơ̆ laĭ ñu bat nao hr̂ŏm gô-ih, jr̂ŏng nŭn ñu pŏ klơi kơnap-tap r̂ok glan, nŭn gô-ih ti ngă br̂ơi kâo mơnuih tha hla ne,#42:38 Ngă br̂ơi kâo mơnuih tha hla ne Hêbrơ laĭ «Ngă br̂ơi ƀô̆k kŏ kâo ne.» tr̂ŭn nao pơ plơi tâo djai dăng ngot-hơning dơdi yơh.»

Currently Selected:

Phŭn Blŭng 42: JKB

Highlight

Copy