Phŭn Blŭng 43

Ƀênyamin nao pơ čal Êjĭp hr̂ŏm môt yŏng ñu

1Pah anŭn klơi ĭ lơpa nŭn pr̂ŏng jat mơ̆ng lŏn-ia Kanan. 2Tơl gơñu ƀŏng bih lôi dai gơñu ba glaĭ mơ̆ng čal Êjĭp boih, nŭn ma gơñu pơhiăp hr̂ŏm gơñu: «Br̂ơi gô-ih nao blơi tô̆ dai sĕt-mĕt dŏng wŏ.» 3Plai Yuđa til glaĭ pơ ma ñu: «Đahkơi nŭn laĭ br̂ơi mơi jel jat, “Jơ̆ laĭ adơi nŭč gih bĭ r̂ai hr̂ŏm, gih bĭ ƀôh ƀŏ kâo dŏng tah.” 4Jơ̆ laĭ ih br̂ơi adơi mơi nao hr̂ŏm, nŭn mơi ti tr̂ŭn nao blơi br̂ơi ih dai. 5Jơ̆ laĭ ih bĭ br̂ơi ñu nao hr̂ŏm mơi ôh, mơi bĭ tr̂ŭn nao le, yua đahkơi nŭn laĭ br̂ơi mơi hla ne, “Jơ̆ laĭ adơi gih bĭ r̂ai hr̂ŏm, gih bĭ ƀôh ƀŏ kâo dŏng tah.”» 6Nŭn Israel laĭ: «Yua yĕt gih ngă set mơ̆ng kâo, r̂ă br̂ơi đahkơi nŭn, laĭ gih hmâo adơi ha r̂ăng dŏng nĭng nŭn lĕ?» 7Gơñu til glaĭ: «Đahkơi nŭn kơña mơi jel-lĕk jat, čiăng thâo kr̂ăn mơ̆ng mơi dăp mơ̆ng phung wang ta he mơ̆n, ñu laĭ, “Hiư̆m, ma gih dŏ dĭp mơ̆n? Hiư̆m, gih hmâo yŏng dơi pơkŏn dŏng mơ̆n ah?” Nŭn mơi r̂ă r̂oi br̂ơi tui klơi ñu kơña. Mơi bĭ thâo ôh ñu ti laĭ, “Ba r̂ai adơi gih wŏ.”» 8Pah anŭn Yuđa pơhiăp hr̂ŏm Israel ma ñu: «Br̂ơi nă muai nŭn nao hr̂ŏm kâo wŏ, jr̂ŏng nŭn mơi ti gŭ nao. Nĭng nŭn yơh, ta mơ̆ng dĭp, ta huai djai, dăp mơi dăp ih wŏt bih nă čo ta he mơ̆n. 9Kâo yơh ti lăp wai-lăng ñu, jơ̆ laĭ kâo bĭ ba glaĭ ñu čr̂oh ti năp ih ôh, nŭn kâo ti đom kơđi hr̂ŏm ih hayoh. 10Jơ̆ laĭ ta bĭ pơhr̂ĭ r̂ơi hla ne ôh, nŭn mơi nao glaĭ găl dua wŏt yơh.»

11Jr̂ŏng nŭn Israel ma gơñu pơhiăp hr̂ŏm gơñu: «Jơ̆ nĭng nŭn, ngă hla ne wŏ, br̂ơi tô̆ dr̂ăm-gơnăm hiam-hiam mơ̆ng lŏn-ia ne čr̂oh tăm kơpâo gô-ih, ba nao br̂ơi đahkơi nŭn, hla ti jr̂ao a sôt pơanah, dăp ia ni pơanah, kơtăk kơyâo a ngă bơgang, dăp kơtăk kơyâo phĭ, wŏt săl bơjeh a ƀŏng haêk, dăp săl boh čia mơ̆n.#An Phŭn 37:25. 12Nêne dŏng, br̂ơi gô-ih djă nao len phr̂âo, dăp len hađăp#43:12 Len phr̂âo dăp len hađăp Hêbrơ laĭ «Len lô hloh mơ̆ng ahlâo dua wŏt.» r̂ăng čr̂oh glaĭ tăm bah kơpâo gô-ih ahlâo nŭn, ai-ñu r̂ăng hơwŏl thâo. 13Wŏt adơi gô-ih, ba nao ñu hr̂ŏm gô-ih mơ̆n. Nêne gŭ bat nao pơ đahkơi nŭn wŏ. 14Dueh mơ̆ng Ơi Adai, Yang Kơtang Hloh, ngă br̂ơi đahkơi nŭn pap-dr̂ap gô-ih, čiăng đahkơi nŭn br̂ơi yŏng gô-ih dăp Ƀênyamin glaĭ r̂ai hr̂ŏm gô-ih he mơ̆n. Gah kâo dŏng, mă kâo ñă lôi nă, hiư̆m kâo ti ngă?» 15Jr̂ŏng nŭn môt gơñu djă ba dr̂ăm-gơnăm, dăp len lô hloh mơ̆ng ahlâo,#43:15 Len lô hloh mơ̆ng ahlâo Hêbrơ laĭ «Len lô hloh mơ̆ng ahlâo dua wŏt.» wŏt Ƀênyamin he mơ̆n, jr̂ŏng nŭn gơñu gŭ đĭ tr̂ŭn nao pơ čal Êjĭp, nŭn gơñu nao dŏ dŏng ti năp Yôsep.

16Tơl Yôsep ƀôh Ƀênyamin r̂ai hr̂ŏm gơñu, nŭn ñu pơhiăp hr̂ŏm hlŭn wai-lăng sang ñu: «Ba nao môt ne mŭt tăm sang kâo wŏ, jr̂ŏng nŭn br̂ơi ih pơdjai čĭm pơkr̂a klơi ƀŏng huă hŏ, yua tơl yang r̂ơi dŏng kăl, môt ne ti ƀŏng huă hr̂ŏm kâo.» 17Nŭn yơh đahkơi nŭn ngă tui klơi Yôsep pơđơi, dăp ba nao gơñu mŭt tăm sang Yôsep. 18Plai môt gơñu huĭ, yua r̂ăng ba nao gơñu pơ sang Yôsep, nŭn gơñu bơgĭt gŏp gơñu: «Buă ne yua mơ̆ng len a čr̂oh glaĭ tăm kơpâo ta pah ahlâo nŭn boih, nŭn yơh gơñu mơ̆ng ba r̂ai ta pơ sang hla ne, yua gơñu čiăng mă ta, br̂ơi ta ngă hlŭn gơñu, dăp tô̆ lie ta he mơ̆n.» 19Jr̂ŏng nŭn gơñu nao jĕ hlŭn wai-lăng sang Yôsep, nŭn pơhiăp hr̂ŏm ñu ti bah amăng sang: 20«Ơ khua, ahlâo mơi tr̂ŭn r̂ai blơi dai, 21tơl mơi glaĭ tr̂uh pơ ƀon mơi đŏm, nŭn mơi kleh kơpâo, phŏ, tơgr̂ư̆ mơi ƀôh len mơi pô tăm bah kơpâo, len nŭn dŏ nŏng tôm mơ̆n. Nŭn yơh mơi djă r̂ai len nŭn dŏng. 22Mơi djă r̂ai len pơkŏn dŏng he mơ̆n, čiăng blơi dai. Mơi bĭ thâo kr̂ăn lơi čr̂oh len nŭn tăm kơpâo mơi ôh.» 23Đahkơi nŭn til glaĭ: «Huai đi ôh, anăm huĭ ôh, Ơi Adai, Yang gô-ih, ñu Yang ma gô-ih mơ̆n, ñu yơh čr̂oh dr̂ăm nŭn tăm kơpâo gô-ih. Kâo tô̆ len gô-ih boih.» Jr̂ŏng nŭn ñu pih lôi Simien biă r̂ai pơ gơñu. 24Tơl đahkơi nŭn ba môt gơñu mŭt tăm sang Yôsep boih, ñu tô̆ ia ba r̂ai br̂ơi môt gơñu r̂ao le, jr̂ŏng nŭn ñu tô̆ mr̂ơ̆k br̂ơi lie gơñu ƀŏng mơ̆n. 25Pah gơñu dŏ yong Yôsep glaĭ r̂ai pơ sang pơ yang r̂ơi dŏng, môt gơñu tr̂ĕm čr̂oh dr̂ăm-gơnăm ti br̂ơi Yôsep, yua gơñu hmĭ a laĭ gơñu ti ƀŏng huă hr̂ŏm Yôsep ha anŭn.

26Pah Yôsep tơl glaĭ pơ sang, môt gơñu tô̆ dr̂ăm-gơnăm gơñu djă ba nŭn, mŭt nao tăm sang br̂ơi Yôsep, jr̂ŏng nŭn gơñu bon tơl pơ kơnah ti năp Yôsep. 27Yôsep kơña-bla gơñu, jr̂ŏng nŭn ñu laĭ: «Ahlâo gô-ih r̂ă br̂ơi kâo, ma gô-ih tha boih. Hiư̆m nêne, ñu dŏ ak-oi mơ̆n? Ñu dŏ nŏng dŏ dĭp mơ̆n ah?» 28Môt gơñu til glaĭ: «Ma mơi hlŭn ih, ñu dŏ ak-oi mơ̆n, ñu dŏ nŏng dŏ dĭp mơ̆n.» Jr̂ŏng nŭn gơñu bon kô̆p kŏ. 29Jr̂ŏng nŭn Yôsep ep nao, ñu ƀôh Ƀênyamin adơi ñu ha mĭ, nŭn ñu kơña laĭ: «Hiư̆m, ne yơh, adơi nŭč gô-ih r̂ă br̂ơi kâo ahlâo?» Jr̂ŏng nŭn Yôsep pơhiăp hr̂ŏm adơi ñu: «Ơ no, kâo dueh mơ̆ng Ơi Adai ngă hiam hr̂ŏm ih!» 30Pah anŭn bŭt-tai Yôsep pap adơi ñu kơtang jat, ngă br̂ơi ñu hao ti hia, nŭn yơh ñu biă đuĕ tăñ mơ̆ng môt gơñu, mŭt nao hia tăm nih. 31Jr̂ŏng nŭn ñu pač lôi ƀŏ ñu, dăp khŏm ĕñ tăm bŭt, nŭn ñu biă r̂ai dŏng, ñu laĭ: «Br̂ơi pô̆ r̂ai nŏ ƀŏng huă wŏ.» 32Nŭn r̂ăng pô̆ r̂ai nŏ ƀŏng huă br̂ơi Yôsep ha dr̂ơi ñu, pô̆ br̂ơi môt yŏng dơi ñu ha r̂oh gơñu, dăp môt sô̆n-sat Êjĭp ƀŏng ha anŭn ha r̂oh gơñu he mơ̆n, yua klơi juăt sô̆n-sat Êjĭp kŏm, bĭ br̂ơi ƀŏng hr̂ŏm môt sô̆n-sat Hêbrơ ôh. 33R̂ăng br̂ơi gơñu dŏ ben tŏ-tr̂ŏ gah năp Yôsep, tô̆ mơ̆ng yŏng phŭn tr̂uh pơ adơi nŭč, tui ayŭ gơñu. Bih môt gơñu ep nao r̂ai gŏp gơñu, gơñu khư̆t ƀôh pliw. 34R̂ăng tô̆ nŏ ƀŏng mơ̆ng tŭ Yôsep, ba nao pơ môt yŏng dơi ñu, plai nŏ ƀŏng a pô̆ br̂ơi Ƀênyamin hmâo lô hloh mơ̆ng môt yŏng ñu ma wŏt. Nŭn yơh gơñu ƀŏng mơñŭm ak-oi#43:34 Gơñu ƀŏng mơñŭm ak-oi Hêbrơ laĭ «Gơñu ñŭm pai tơl măt.» hr̂ŏm Yôsep.

Currently Selected:

Phŭn Blŭng 43: JKB

Highlight

Copy