JOB 15
15
Biakson Awk A Voihnihnak
(15.1—21.34)
Elifas in hiti in a ti:
1-2Job, na ṭongmi hi thulolak
lawnglawng a si.
Nisuah ihsin a rami thli bangtuk
lawng a si.
3Na ṭong vekin mifim zohman
an ṭong lo ding;
Tican nei lo ṭong cun zohman in
anmah ṭannak ah an hmang lo ding.
4Pathian ṭihzah lo dingin mi
thapetu na si,
A hnenih thlacam duh lo dingin
na tuah hai a si.
5Na ṭhat lonak in na hmur a zirh;
Na hrilmi cu depdetnak lei a si.
6Kei ih lo hnon a ṭul lo;
Na ṭongkam in sual a lo puh ih
a lo hnong zo a si.
7A suak hmaisa bikmi ah na ruat aw
maw si?
Pathian in tlang pawl a siam laiah
na rak um zo maw si?
8Pathian ih tumtahnak na rak thei
cia maw si?
Milai fimnak hi nangmah lawngih
neih ah maw na ruat?
9Na theih mi hi kan theih lomi
zianghman a um lo.
Na theihthiammi kan theihthiam lomi
ziangso a um?
10Kan fimnak hi ṭuakpaar cia upa,
Na pa hnakih upa sawn hnen ihsin
kan zirmi a si.
11Pathian in hlemnak thu a lo ruah,
Hmurka neemte ṭong hi na hrangah
zianghman a ṭangkai lo maw?
Ziangah so na pom duh thotho lo?
12Na ti hlehle ih na thinheng in
in zoh ciamco.
13Pathian parah na ning a hang ih
a thang na siat ciamco.
Na hmur in ṭongsia a suak ciamco.
14A thianghlim milai an um thei
ngai ding maw?
Pathian hmaiah miding an um ngai
pei maw?
15Pathian in a vancungmi hman
a zum lo ih,
A hmaiah anmah hman an thiang lo.
16A borhhlawh mi milai, felnak
zianghman nei lo,
Tidai in vekih siatnak lawng
a intu milai cu,
ziangtlukin so a thianghlim lo
sinsin ding?
17Curuangah Job, ka theih ve mi
hi ngaihnik!
Ka hmuhmi na hnenah ka phuang ding.
18Mifim pawl in an pale hnen ihsin
An zirmi fimnak thutak in zirh,
An thuhmi zianghman a um lo.
19An ram sungah ramdang mi zohman
an rak um lo ih,
Pathian hnenin a hruaisualtu ding
milai zohman an um lo a si.
20Miṭha lo le misual in a nunsung
hmuahhmuah ah harsatnak a tong.
Zaangfah nei lo hrangah hremnak cu
retsak cia in a um.
21Ṭihphannak aw cu a hna sungah
cat loin a thang.
Ka him a si, a ti laifangah rukru
in an ram.
22Thimnak sungin luat thei dingah
ruahsannak a nei lo,
Khuitawk hmun in simaw ralnam in
a rak hngak.
23A ruaksa ei dingah langta pawl
in an thlir.
Ka hmailam cu a thimzet, ti a thei.
24A cakzet mi siangpahrang in mi
a do bangin,
Siatsuahnak in do dingah a bawh
ringring.
25Ziangkimtithei a dodaltu le,
Pathian hnenih a kuttum a hawi
rerotu milai ih nunnak lamzin cu
cu bangtuk in a si.
26-27Mi puarthau le mi luhlul in,
Thinlung ruhzet in a ralphaw cu
a khai ih Pathian do dingah
hmaiah a nor ciamco.
28Khua tampi a nehtu le
Innram pawl a luahtu cu amah a si.
Asinain raldonak a um tikah cun
cuih khua le inn pawl cu
a siat ṭheh ding.
29Kum rei a lian lo ding,
A neihmi pawl rei an awh lo ding,
A phenthlam tiang in a hlo ding.
30Thimnak sungin a luat lo ding;
A hnge meisa in a kaang ṭhehmi,
A par thlisia in a nuai ṭhehmi
thingkung bangtuk a si ding.
31A aat hraat ih siatnak lawng
a rinsan ahcun,
A comi cu siatnak lawng a si ding.
32A tikcu a kim hlanah a vuai ding,
Thinghnge bangin a ro ding ih
a hring sal nawn lo ding.
33A hmin hlan ih a rah a ṭil ṭhehmi
Sabit kuang vek a si ding,
A par a ṭilmi Olif kung vek
a si ding.
34Pathian thei lo pawl cun tesinfa
an nei lo ding,
Nawhthuh tangka in an sak mi inn cu
meisa in a kang ṭheh ding.
35Annih cu mi siatsuah a tumtu le
ṭhatlonak a tuahtu an si;
An thinlung cu mi bumnak lawngin
a khat.
Currently Selected:
JOB 15: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
