JOB 16
16
Job in hiti in a sawn:
1-2Cuvek ṭong cu voi tampi
ka thei zo,
In hlemnak cu ka hrangah tuar
sinsinnak lawng a si.
3Catbaang loin maw nan ṭong rero
ko ding?
Kan ṭongnet hlan lo tiah maw
nan ti ringring ding?
4Ka umnak ah nannih um in,
nan umnak ah kei um ningla,
Nan ṭongmi vek hi cu ka ṭong
thei ve ko ding.
Uang aw zetin ka lu ka thle
hngualhngo ding ih,
Ka ṭongmi tilik zat sungah,
ka lo phim hai ding.
5Ruahnak ṭhaṭha in nan thazaang
ka cakter ding ih,
Ka hmurka in a suakmi ṭongkam cun
a lo hneem thei zet ding.
6Sikhalsehla ka ṭongmi hin
zianghman ṭhathnemnak i pe lo;
Daiziar ih ka um khalle ka tuar
a deem cuang lo.
7Maw Pathian, i bangter tuk zo,
Ka innsang pawl na thihter ṭheh zo.
8Nangmah in i hrem, ka ral na si.
Ka vun le ka ruh lawng an taang;
Cumi ruangah mi in keimah mawh ah
in ruat.
9A thinheng ah Pathian in i bauh
i thlek ṭheh;
Huatnak thawn a ha i rial hnawh;
I mitkem ih cat loin i zoh.
10Mipi in an kaa ang in in hnihsan,
Ka kiang an ra ih ka hmai in beng;
An ṭangtlang ih in dodal.
11Pathian in miṭha lo pawl ih
kut sungah i thlenter,
Pathian ṭihzah lotu pawl hnenah
i hlon.
12Daite ih ka um laiah i siatsuah,
Pathian in ka or in i deek ih
i sawp ciamco ih i deen.
Pathian in a hmuibah mi ah i tuah;
13Khawzakipin conkiang thawn i sai,
Conkiang in i ngah ih i hriam;
Ka kaileng i ngah, ka hnitkha
leilung ah a luang,
Cuih hnu hmanah zaangfahnak
zianghman a nei lo.
14Atu le atu hma i baih leuhleuh,
Ralkap thinṭeu bangin i nam ciamco.
15Mithi ngai in ka um ih ka vun
khuhnak ah buri hnipuan ka hruk;
Atu leivut lakah thinpit in ka to.
16Ka ṭahnak ah ka hmai a sen ṭheh;
Ka mit tla an cuur ṭheh ih
Ka mit vun a dup ṭiamṭiam ṭheh.
17Sikhalsehla mi thisen luannak ah
ka kutin zianghman a tuah lo;
Pathian hnenih ka thlacamnak cu
a tluangtlam a si.
18Maw Leilung, ka parih thilsual
an tuahmi hi thup hram hlah;
Dingnak um seh tiih ka aunak aw hi
daiter hram hlah.
19Ka thu a theitu vanah khin a um,
I ṭantu cu a saannak hmunah a um.
20I simsaktu cu ka rualpi a si,
Pathian amah lawng cat loin
ka mitthli thawn ka zoh.
21Minung in a rualpi a ṭan ciamco
ṭheu vekin
Mi pakhatkhat in Pathian hmaiah
i ṭan sehla ka va duh so!
22Ka kum cu a liam vivo ih,
Dungkir nawn lonak lamzin ka zawh.
Currently Selected:
JOB 16: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
