JOB 14
14
1Nunau sung suak milai hmuahhmuah,
An nun a tawi ih zonzaih an tuar.
2Pangpar bangin an ṭhang ih
an ziam sal;
Phenthlam bangin an hloralta,
Rei an awh lo.
3Pathian, na mitsiir hmanin i zoh
duh ding maw?
Ka thu ṭhen dingah na hmaiah
i suahpi ngai ding maw?
4A thiang lomi milai sung ihsin
a thiangmi a suak thei ding maw?
A suak thei dah lo ding.
5A nun ding kum zat cu khiah cia
a si ih,
A thla zat tla ruah cia in a um.
Na lairel ciami an si ih thleng
theih an si nawn lo.
6Hmundang hoisan awla amah lawng
taanta mai aw;
A nunnak harsatnak ni cu a nuampi
thei tawkin nuampi seh.
7Hau ciami thingkung hrang hmanah
ruahsannak a um;
A cerh ding ih a nung sal ding,
A hram note a ṭhang vivo ding.
8A hram pawl an tar ih,
a bul cu leilung ah rop hmansehla,
9Tidai a ngah cun a cerh ding ih
thing note bangin a kho sal ding.
10Asinain milai a thih ahcun a cem
thla a si.
A thih hnu khuiah so a um?
11A car mi tiva bangin le
a kang mi tipi bangin,
12Minung a thih cun a tho nawn lo,
Van hmuah a hlohral ṭheh hlanlo
an ṭhang sal nawn lo ding;
An ihnak ihsin an tho nawn lo ding.
13Mithi khua Sheol ah i thup cila
ka va duh so;
Na thinheng a reh hlan lo i thup aw.
Cule nangmah in a tikcu khiak awla,
i theih salnak caan ret aw.
14Milai a thih cun a nung sal thei
ding maw?
Asinain tikcu ṭha ka hngak ding,
Atu-ih harsatnak caan a liam tiang
ka hngak ding.
15Cutikah i ko dingih kei in ka lo
awi ding,
Na kutih sersiammi kei in ka parih
na lungawinak ka hmu ding.
16Ka ke kar cu na zoh hliah ding,
Asinain ka sualnak cu na zingzoi
rero lo ding.
17Ka mawhnak cu i ngaidam ding ih
a tompi in na hlon hlo ding;
ṭhat lonak ka tuahmi hmuahhmuah
na hnawtfai ṭheh ding a si.
18Tlang pawl an cim ṭhehnak tikcu
a thleng ding,
Lungto tumpi pawl tla phong ṭheh
an si ding.
19Tidai in lungto a ei ṭheh,
Lihong in leilung a fehpi ṭheh;
Cuvekin milai ih nunsung ruahsannak
hmuahhmuah na feh hlo ṭheh a si.
20Milai cu kumkhuadaih in na neh ih
an hloral ṭheh;
A thih tikah a hmel na thleng ih
na dawihlo.
21A fapa pawl in hminṭhatnak
an ngah,
Asinain a thei nawn lo;
An hmin a siat tik khalah a thei
cuang lo.
22A taksa ruangpi a nat lawng a thei,
A thinlung harsatnak lawng a tuar.
Currently Selected:
JOB 14: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
