JOB 13
13
1-2Nan ṭongmi hmuahhmuah cu
ka mit ih ka hmuh ciami le
ka hna ih ka theih cia hlir an si.
Ka theithiam lomi a um lo.
Nanmah theih zat poh ka thei ko.
Nanmah hnak in ka nau cuang lo.
3Asinain nannih thawn thu kan el
aw lo; Ziangkimtithei,
Pathian thawn kan el aw a si.
Ka thu cu Pathian thawn el awk
ka duh.
4Nan thutheih lozia hi thuphan in
nan khuh;
Zohman a damter thei lotu sibawi
vek nan si.
5Ṭong lotein um sawn uhla,
Mi in mifim ah an lo ruat ding.
6Ka ṭongmi ngai hrih uhla
Ka thu feh daan ruat hnik uh.
7Ziangah so thuphan hlir nan rel?
Nan thuphan hi Pathian hrangah
a ṭhahnem ding nan ti mawsi?
8Pathian nan ṭan tum ngai mawsi?
Thuṭhennak hmunah a hnen ṭangin
in el tum maw?
9Pathian in lo zingzoi ngai sehla
Thil ṭha pakhatte tal na parah
a hmu ding maw?
Milai nan bum thei vekin
Pathian bum thei nan tum maw si?
10A thupte ih mi thleidannak
nan neih a si ahcun,
Amah in a lo phuang ding ih nun
a lo sim ding.
11A huham in a lo phangter ih,
A ṭih nunnak na tlunah a tla
lo ding maw?
12Nan ṭongṭhimnak pawl cu vutcam
vek an si;
Nan thu-el thiamnak pawl cu tlak
vek lawng an si.
13Daite in rak um hrih uh,
ka ṭong ve ding;
A piannaknak ah piang seh!
14Ṭihphannak hmun ka thleng,
Ka nunnak ka ui nawn lo.
15Beiseinak ka nei nawn lo,
Pathian in i that leh ko ding;
Sikhalsehla ka thuhla cu a hnenah,
a hmai rori ah ka thlenpi ding.
16Ka ralṭhatnak hin i hum thei
meen ding,
Ziangahtile miṭha loin Pathian
an tong ngam dah keel lo.
17Ka simfiangnak ṭong hi ngai uh,
Ka thusimmi hi nan hna ah lut seh.
18Ka thuhla cu ka ngaihtuah kim zo,
Thiam in coter ding, ziangahtile
ka thu a dik a si, ti ka thei.
19Maw Pathian, ra tahrat in sual
i puh ngaingai ding maw?
Cutiin asile kei cu daiziar in
ka um ding ih ka thi sawn ding.
20Thil pahnih lo dil duhmi ka nei;
Na lungkim awla na hnen ihsin
ka relh lo ding.
21I hremnak cu bang thlang awla,
Na ṭihnunnak in ka thin
i phangter nawn hlah.
22Maw Pathian, nang ṭong hmaisa
awla ka lo let ding.
Culole kei ka ṭong hmaisa ding ih
i let aw.
23Ka mawhnak le daan ka buarnak
ziangzat so an si?
Ka sualnak le ka tlaksamnak pawl
i sim hnik?
24Ziangruangah so na hmai na thuh?
Ziangruangah so ral vekih i zoh?
25A thin phang seh i ti maw si?
Kei cu zianghman ka si ual lo,
Hnahrawp ka si ko lo maw?
Fangkungro pakhat na do rero vek
a si ko!
26A mawi lo zetmi sualnak tla
i puh ciamco,
Ka no lai ih ka rak tuah mi
thil sual pawl tla.
27Thir cikcin in ka ke na ṭeem;
Ka ke kar na zoh hliah ih
Ka keneh tiangin na zingzoi ṭheh.
28Curuangah thingrop bangin
ka tlu ih,
A muatmi hnipuan bangin
ka zaam ṭheh.
Currently Selected:
JOB 13: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
