JOB 12
12
Job in hiti in a sawn:
1-2Asiko, na ṭong mi cu misenpi
ruahnak a si.
Nan thih tikah nan fimnak cu a cem
ve ding.
3Asinain nanmah tlukin fimnak
ka nei ve ko;
Nannih hnakin ka nauta cuang lo;
Nan ṭong mi cu zokhal ih theih
thluh cia mi a si.
4Ka rualpi pawl hman in atu ah
in hnihsan;
Soi ding um lo, a ding mi ka si
naón an hni thotho;
Sikhalsehla Pathian in ka thlacam
mi i leh caan a um.
5Nannih cu harsatnak nan tong lo,
Curuangah hnihsuahsainak meen ah
in hmang;
A sawn ciami pa cu nan vuak beet.
6Asinain rukru le Pathian thei lo
pawl cu hnangam zetin an um;
An pathian cu an kut ih an ken
theimi a si.
7Vate le ramsa hman in tampi an lo
zirh thei ding;
8Leilung par ramsa le ti sung nga
hnen in fimnak dil uh.
9An zatein Pathian kutih tuahmi
an si kha an thei ṭheh.
10Pathian in a ramsa hmuahhmuah
a uk ṭheh,
Milai ih nunnak cu a kut ah a um.
11Nan lei in rawl a thawtzia
a theih bangin,
Nan hna in mi ṭong theih cu
a duh zet a si.
12Kum upa pawl in fimnak an nei,
Sansau pawl in theihthiamnak an nei,
13Asinain Pathian cun fimnak le
huham a nei;
A hnenah ruahnak ṭha le theih thiamnak a um a si.
14Pathian ih a balmi cu zoso a sak
sal thei ding?
Pathian ih thawng a thlakmi cu
zoso a suah thei ding?
15Pathian in ruah a kham tikah cun
ziang hmuahhmuah an car ṭheh;
Tidai a thlah sal tikah cun tilik
in ziangtinkim a siatsuah ṭheh.
16Pathian cu a cak ih nehtu a si
ringring;
Bumtu le bummi pawl khal amah ih
ukmi an si.
17Remruattu pawl ih fimnak cu
a siatter ṭheh;
Hruaitu pawl cu mi aa bangin
hna a ṭuanter.
18Siangpahrang in hreng a khenmi
pawl cu a phuaksak hai ih,
Thawng ah siangpahrang pawl a thlak
hai ih an taai ah taikhap a khap.
19Puithiam le thuneitu pawl cu
an ning a zahter.
20Rinsan zetmi pawl a vuakdai ih
Kum upa pawl ih theihthiamnak cu
a long ṭheh a si.
21Thuneitu pawl cu mualpho in
a ret ih,
Uktu pawl an thuneihnak a cemter
a si.
22Khawthim sungih thuthup
a langter ih,
A pit zetmi khawdur kha tleunak ah
a thlengter.
23Miphun tampi a tumter ih a cakter;
Asinain a neh ih a siatsuah ṭheh.
24An hotu pawl cu a aatter ih,
Lamzin thei loin an vakvai.
25Khawthim sungah an vak ih
Zuri bangin an sawn an ril.
Currently Selected:
JOB 12: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
