JEREMIAH 1

Jeremiah

1Benjamin ram Anathoth khua ih ummi puithiam pawl lakih puithiam pakhat Hilkiah an timi ih fapa Jeremiah ih thusimmi pawl cu hiti in a si. 2Amon fapa Josiah in Judah ram siangpahrang a ṭuannak kum hleithum kum ah Bawipa ih ṭongkam cu Jeremiah hnen ah a thleng. 3Josiah fapa Jehoiakim ih siangpahrang a ṭuan tik khalah Bawipa ih ṭongkam cu a hnen ah a rung thleng sal. Cuih hnuah Josiah fapa Zedekiah in siangpahrang a ṭuannak kum hleikhat kum tiang Bawipa ih ṭongkam cu a hnen an voi tampi a ra thleng. Cuih kum thla nga thla ah Jerusalem mi pawl cu saltaannak ih hruai hlo an si.

Jeremiah Kawhnak

4 Bawipa in ka hnenah, 5“Na nu ih pum sungih ka lo seemter hlan ihsin ka lo thei zo ih na suah hlan ihsin miphun tampi hnenih profet si dingah ka lo hril zo a si,” i ti.

6Cutikah kei in, “Maw Cungnungbik Bawipa, ṭong thiammi ka si lo; ka no tuk lai,” tiah ka ti.

7Asinain Bawipa in ka hnen ah, “Ka no tuk lai ti hlah; ka lo thlahnak misenpi hnenah feh sawn awla sim dingih thu ka lo pek vekin an hnenah sim aw. 8Ṭih aw hlah, na hnen ah ka um ding ih ka lo hum ding. Keimah Bawipa in ka sim zo a si,” tiah i ti.

9Cule Bawipa cun a kut a hun sam ih ka hmur i tham hnuah, “Ngai aw, na ṭong dingmi ka thu pawl cu na kaa sungah ka ret zo. 10Tuih sunah miphun hmuahhmuah le siangpahrang ukmi ram tampi parah phawi theinak le bal theinak, siatsuah theinak le hlon theinak, sak theinak le din theinak thu ka lo pek a si,” tiah i ti.

Hmuhnak Pahnih

11Cule Bawipa in, “Jeremiah, ziangso na hmuh?” tiah i sut.

Kei in, “Khumkhal thingkung hnge ka hmu,” ka ti.

12 Bawipa in, “Na hmu dikzet; ka ṭong ciami pawl an kimnak ding ka zoh #ka zoh timi le khumkhal timi hi Hebru ṭong cun aw-suah daan a bang aw. lai a si,” tiah a ti.

13Cuih hnuah Bawipa in, “A dang teh ziangso na hmuh?” tiah i sut sal.

Kei in, “Saklam ah a so hluahhlomi beel, hi lam ah a rung lei-aw mi ka hmu,” tiah ka ti.

14Cutikah Bawipa in, “Siatsuahnak cu saklam ihsin tiso bangin hi ramsung mi hmuahhmuah parah a rung liam ding; 15ziangahtile saklam ram pawl cu hi ram rung thleng dingin ka ko zo. An siangpahrang pawl in Jerusalem khawpi kotka le a kulhnak phar kimvel ah le Judah ram khua dangdang kimvel ah an bawi tokham an ret ding. 16Ka minung pawl parah ka mihremnak cu ka thlenter ding; an sual ih in dungtun ruangah, khuavang dangdang hnenah raithawinak an pek ih milem pawl anmah ih kut rori in tuah tahrat in an biak ruangah ka cawh hai ding a si. 17Curuangah Jeremiah, na timtuah aw; feh awla sim dingih thu ka lo pekmi hmuahhmuah an hnenah sim ṭheh aw. Ṭih hai hlah; culole an hmai na thlen tikah ka lo ṭihter sinsin ding. 18-19Jeremiah, ngai hnik! Hi ramsungmi hmuahhmuah Judah ram siangpahrang le a kut thuai bawi pawl le puithiam pawl le mi senpi pawl in an lo ral ding. Sikhalsehla anmah do theinak ah thazaang ka lo pe ding; ralhruang ih kulhmi khawpi vek na si ding, thir ṭhuam bangtuk le daar ih tuahmi phar bangtuk na si ding. Na hnenah ka um ding ih ka lo hum ding. Curuangah zo hman in an lo neh lo ding. Bawipa keimah in ka lo sim zo,” tiah i ti.

Currently Selected:

JEREMIAH 1: FCL

Highlight

Copy