JEREMIAH 2

Pathian In Israel A Kilkhawi

1 Bawipa ih ṭong cu ka hnenah a ra thleng ih, 2Jerusalem khawsungih ummi hmuahhmuah hnenah a thuailam bangtuk in sim aw, i ti.

“Tleirawl na si laiah rinsantlak

na si zia le,

Kan ṭhit awk pekte in i duh zia

kha ka ciing ringring.

Nelrawn lakah i thlun ih zohmanih

thlawh dah lo ram khalah i thlun.

3Maw Israel, nang cu keimah

lawngih ta na si;

Ka neihmi mithianghlim na si.

Nangmah a lo tuahmawhtu parah cun,

harsatnak le siatsuahnak

ka thlen ter a si;

Keimah Bawipa in ka sim zo,”

tiah i ti.

Israel Ih Pupa Pawl Sualnak

4Jakob tesinfa pawl,

Israel ih cithlahmi pawl,

Bawipa ih thusimmi hi

ngaihnik uh.

5 Bawipa in, “Nan pu le

nan pa pawl in ka parah

ziang sualpuh dingso an neih?

Ziangruangah so in dungtun?

Santlai lomi milem an biak ih

anmah khal zianghman lo ah

an cang zo.

6Zianghman ah in siar lo,

‘In suahtu Pathianó an ti dah lo;

Izipt ram sung ihsin ka suahter,

Thlaler ramṭhing in ka hruai;

Nelrawn ram le vunnel khur thukmi,

Ram caar le khawthim sahzet ram

le ram ṭihnung,

Zohman an um, an feh dah lonak ram

sungin ka hruai hai naón

zianghman in poisa lo.

7“Ram ṭhazet sungah ramsung

suakmi thil ṭha le a rah pawl

ei dingah ka thlenpi hai.

Asinain ka ram an siatsuah riangri.

Ka pekmi ram an borhhlawhter a si.

8Puithiam pawl in,

“Bawipa khuiah a um?” an ti lo.

Daan a tongthamtu ka puithiam pawl

hman in in thei nawn lo.

An hotu pawl in in dodal ih,

An profet pawl khal in Baal

khawzing hmin in thu an sim ih

zianghman si lomi milem an biak.

Pathian In A Milai A Mawhthluk

9“Curuangah Keimah Bawipa in,

Ka minung pawl parah mawhthluk

thu ka rel ding;

An tesinfa pawl par khalah

thu ka nei ding a si.

10Nitlaknak lamah Saipras tikulh

tiang feh uh;

Nisuahnak lamah Kedar ram tiang

mi thlah uh!

Hitiih a cangmi bangtuk thil cangmi

khuihman ah nan hmu lo ding.

11Miphun dang zohman in,

an pathian an thleng dah keel lo,

pathian ngai si lo hman sehla!

Sikhalsehla ka minung pawl cun

an Pathian in thleng;

An parih sunlawinak a thlentertu

Pathian cu,

An hrangih zianghman ṭhahnem lo,

khuavang ah in thleng a si.

12Curuangah maw van tla,

Mangbang in hnin ṭheh uh;

Ninghang riahsia in khur ṭheh uh.

13Ziangahtile ka minung pawl in

thil sualral pahnih an tuah:

Nunnak cerhti Keimah in hnong ih,

tidai zianghman a li thei lo,

a khingmi tikhur an lai a si.

Israel Sualnak Ih Rah

14“Israel cu sal a si lo;

ṭuangsuak sal a si dah lo.

Asinain ziangah so a ral pawl in

suk le so ah an hual ciamco?

15A ral pawl in kiosa bangin

an auh hnawh;

A ram cu nelrawn ah an canter.

A khawpi pawl cu khawrop ah

an tuah ih an tlansan ṭheh.

16Asi, Memfis mi le Tahpanhes mi in,

a luruh an khuai a si.

17Maw Israel, lamzin ih ka lo hruai

lai rori ah,

Bawipa na Pathian Kei i tlansan

ruangah,

Hi thil poimawh hi na parah

nangmah in na thlenter a si.

18Izipt ram ah feh ih Nail tivapi

tidai innak in ziang ka ngah ding

tiah so na ruat?

Assiria ram ah feh in ziangso

hlawh na tum?

Zufrates tivapi tidai innak in

ziang ka ngah ding

tiah so na ruat?

19Nangmah ih sual tuahmi lala in

a lo hrem ding ih,

Zinpeng na zawhnak hin a lo

mawhthluk ding a si.

Keimah Bawipa na Pathian

i dungtun ih,

Ka parah ṭihzahnak zianghman na

neih nawn lo ruangah,

Na hrangih thil ṭha lo le

thil poimawh a sizia hi

na thei vivo ding.

Ziangkimtithei Bawipa, Pathian

Keimah in ka sim zo a si,”

tiah a ti.

Israel In Bawipa A Biak Duh Lo

20Cungnungbik Bawipa in,

“Maw Israel, hlanlai ihsin

ka thu na rak el zo;

Ka thu na thlun duh lo ih

i bia duh lo.

Tlang sang kipah le thing niim

thuai tinah milem na biak ih

hlawhhlang na ṭuan.

21Sabit hri sung ihsin a ṭha ce

bangin ka lo phun,

Ci ṭha sungin hrilmi na si.

Asinain ziang na cang hi zohhnik!

A thu a ṭawtmi le santlai lo

Sabit hri na si zo hi!

22Satpia ṭha bik hman in kholh aw

khal cila,

Na sualnak neh cu ka hmu thotho.

23Ziangtin so mi borhhlawh ka si lo,

Baal ka bia dah lo na ti thei?

Horkuam sungih na sualzia zohhnik!

Thilsual na tuahzia hi

zoh ṭha hnik!

Hrem theih lomi kalauk nu na bang;

A hur laiah cun amah duhduh in

a tlanmi,

24Vunnel lakah a pet ciamcomi

kalauk nu vek na si;

A hur laimi kalauk cu zoso a uk

thei ding?

Kalauk cang hrangah hawl rero hman

a ṭul lo;

A hur laiah cun olte in

ngah theih a si.

25“Maw Israel, khawzing dangdang

na dawinakah na ke

bangter duh hlah,

Na dang khal carter duh hlah.

Sikhalsehla nang cun, ‘Ka kir thei

nawn lo,

Ram dang khawzing ka ngai tuk

thlang ih,

Ka dawi vivo ding na ti,’”

tiah a ti.

Israel Cu Hrem Tlak A Si

26 Bawipa in, “Fifir an kaih ih a ning a zah bangin Israel mi pawl cu nan ning a zak ding: nan siangpahrang, nan hotu bawi pawl, nan puithiam le nan profet pawl tiangin ningzahnak tumpi nan tuar ding. 27Thingkung hi kan pa a si a titu le lungto hi kan nu a si a titu nannih pawl cu nan ning a zak ding. Ka hnenah kir sawn loin ka hnen ihsin nan tlan ruangah hi bangtuk ningzak le mualpho in nan um ding a si. Cule mangbang le vansaangih nan um tikah cun, ‘Ra awla in ra run aw,’ in ti.

28Nanmah hrangih nan tuahmi nan biakmi nan khawzing pawl cu khuiah so an si? Nan harsat tikah lo bawm hai seh, an lo bawm thei asile! Maw Judah, khawpi na neihzat in khawzing khal tampi na nei. 29Ka parih na vuihramnak ziangso a si? Ziangah so i dodal? 30Ka lo hrem naón na hrangah a ṭhahnem lo. Nunsim ṭha khal na si lo. A hrang zetmi kiosa bangin nanmah ih ralnam lala in nan profet pawl nan that. 31Maw Israel mi pawl, ka sim mi hi ngaihnik uh! Nan hrangah hin nelrawn caar vek maw, ram thim le ram ṭihnungza vek maw ka rak si? Ziangah so, ‘Kan luat ih kan duh vekin kan nung ding, na hnenah cun kan kir lo ding,’ in ti. 32Fala in a hlawnthil a hngilh thei dah maw si? Mo thar in ṭhit-umnak hnipuan a hngilh thei dah maw si? Sikhalsehla ka minung pawl cun in hngilh ih a ni le a thla hman ka siar cawk nawn lo. 33A lo ngaitu pawl duhzawng ih umtlandan cu nan thiamzet. Nunau ṭha lo bik hnen hmanah zirh theimi nan nei lai. 34Nan hnipuan cu thisen in a neh; cuih thisen cu rukru misualral pawl ih thisen si loin mawh nei lo farah pawl ih thisen a si.

“Cucingin nanmah cun, 35‘Mawhnak kan nei lo, Pathian cu kan parah a thin a heng lo ding,’ nan ti lai. Sikhalsehla nan sualnak nan phat ruangah hin keimah Bawipa rori in ka lo hrem hai ding. 36Miphun dang khawzing hnenih nan tlan ruangah hin nanmahte in man nei lo ah nan tuah aw. Assiria parih nan bei a dong zo vek khan Izipt khal in nan beidong in a lo tuah hai ding. 37Izipt lam hoi duh nawn loin nan lu ah na kut nan sih ding ih ningzak in leilung nan bih ding. Nan rinsanmi pawl cu keimah Bawipa ih ka hnon ciami an si ruangah an hnen ihsin zianghman nan ngah lo pei,” tiah a ti.

Currently Selected:

JEREMIAH 2: FCL

Highlight

Copy