ISAIAH 66

Bawipa In Miphun Pawlih Thu A ṭhen

1 Bawipa in, “Vancung cu ka tokham a si ih leilung cu ka ke retnak a si. Curuangah ziang bangtuk inn le hmun so ka umnak dingah nan sak thei ding? 2Lei le van pumpi hi keimai seemsuah mi an si. Thinlung a neem mi, siir awknak thinlung a nei mi le ka thu thlun ih i ṭihzahtu pawl parah cun ka lung a awi a si.

3“Minung cun anmah ih duhnak thlun in hna an ṭuan. Saserh hrangah cawcang an that, milai tla raithawinak ah an pek; tuufaate an that ih uico ih hngawng tla an tan; sangphut thawinak an pekih vok thii khal an pek. Rimhmui an ur ih milem hmaiah thla an cam. Ningsinza biaknak cu an lungawi zawng a si. 4Curuangah an parah harsatnak thil poimawh ka thlenter ding, an ṭih thlohthlo mi thil poimawh ka thlen ter ding a si. Ziangahtile ka kawh tikah zohman in in awi lo; ka ṭong tikah zohman in an ngailo. Ka thu el le thil ṭha lo tuah cu anmah ih hrilmi a si,” tiah a ti.

5 Bawipaió ṭongmi hi ngaihnik uh, nannih amah a ṭihzahtu le a thu a thluntu pawl: “Keimah in rinsan ruangah nan phunpi hrekkhat pawl cun an lo hua ih ziang hmanah an lo siarlo a si. An lo hmuhsuam ih ‘Lungawi aipuang in khua nan sak cu kan hmu duh a si. Curuangah Bawipa in a cahnak langter sehla lo hum seh,’ an ti. Sikhalsehla anmah sawn kha ningzaktu ding an si. 6Ngaihnik uh! Khawpi sungih thawmvang le Biakinn ihsin aw a thangmi cu Bawipa in a ral pawl a hremnak thawmvang a si.

7“Ka khawpi thianghlim cu, nausuah natnak zianghman tuar lotein rinlopi ih fapa a neitu nunau nu vek a si. 8Cubangtuk cu zotalin an thei dah, an hmu dah maw? Miphun phunkhat hi ni khat sungah hrin a si dah maw? Hi miphun phunkhat a suah tikah Zion cu reipi a tuar a ṭul lo ding. 9Hi ka miphun cu hrin tikcu tiang ka hruai ding naan ka suak ter lo dingah maw nan ruat?” tiah a ti. Bawipa in a sim zo a si!

10Jerusalem thawn nan lungawi uh,

a hrangah nan thin nuam uh,

hi khawpi a duhtu pawl!

Atu ah amah thawn nan lungawi uh,

a hrangih ninghannak a neitu pawl!

11A lennak parah nan thin a nuam ding,

a nu ih hnawi hnangam zetih a fawptu naute bangin.

12 Bawipa in, “Malsawmnak le ṭhansonak cu cat loin ka lo pe ding; a kang dah lomi tiva bangin miphun tampi ih lennak cu nan hnenah a luang ding. Duhdawtnak thlum thawn a nu in a ṭaang parah a cawi ih ṭhate ih a kilkhawi mi naute bangtuk nan si ding. 13Naute hrangih hneemtu ṭhabik cu a nu a si bangtuk in Jerusalem khuasungah ka lo hneem ding. 14Cu bangtuk ih a cangmi thil nan hmuh tikah nan lung a awi ding; a lo cakter dingih nan damnak khal a si ding. Cuticun Bawipa keimah in ka thu a thluntu cu ka bawm ih ka ral pawl parih ka thinhengnak ka langter zia kha nan thei ding,” tiah a ti.

15 Bawipa cu meisa thawn a ra ding. Thlipi ih thlazim parah Bawipa cu a to dingih a thin a heng tertu pawl cu a hrem ding. 16Amah hmai ih mawhnak neitu leilung tlun minung pawl cu meisa le ralnam in a hrem dingih mi tampi an thi ding a si.

17 Bawipa in, “Raithawinak hrangah a thiangfai awter ih hmuan sungih an dawl mi biakṭheng ah a rual, a rual in a fehtu pawl, voksa le zinghnam ah a rual, a rual in a fehtu pawl, voksa le zinghnam sa le a dang ti-rawl fihnungza a ei tu pawl ih san cu a cemzik thlang. 18An thinlung ruah mi le an hnaṭuannak cu ka thei ṭheh a si.

“Phun tampi le hnam tampi ih milai pawl, pumkhawm ter dingah ka ra ding. Cuti ih an ton awk khawm tikah ka thilti theizia an hmu dingih, 19anmah hremtu cu keimah ka si kha an thei ding.

“Sikhalsehla mihrekkhat cu ka zuah dingih, ka hminthannak, ka natsatnak le ka huham neihzia a thei dah lotu miphun pawl le lamhlatpi ih a um mi ramah ka kuat ding: Spain ram, Libia ram, conkiang saithiam pawl umnak Lidia ram, Tubal ram le Grik ramah ka kuat ding. Hi miphun pawl lakah ka natsatnak thu an sim ding. 20Hi ram pawl ihsin nan phunpi nan unau pawl cu an rak kirpi dingih ka hrangah laksawng bangtuk an si ding. Israel mi pawl in sangphut thawinak cu bawm thiangfai thawn Biakinn ih an rak ken bangin nan hrinpi unau pawl cu Jerusalem ih ka tlang thiang parah rang, laak, kalauk, rangleng le cawleng thawn an ratpi ding. 21Anmah sungin mi hrek khat cu puithiam le Levi mi ah ka tuah ding.

22“Van thar le leilung thar tla cu ka huham thawngin a hngetmi an si ding vekin nan tefa sin le nan hmin tla cu a hmun mi an si ve ding. 23Thla thar puai tin le nizarh ni tinah miphun tinkim cu hi Jerusalem ah keimah be dingah an ra ding,” tiah Bawipa in a ti.

24“An kir sal tikah keimah i dotu le i raltu ih ruak pawl cu an hmu ding. An ruak a ei tu tholung pawl cu an thi dah lo dingih anmah urnak meisa khal a mit dah lo ding. Miphun tinkim ih mithmuh ah fihnungza an si ding,” tiah a ti.

Currently Selected:

ISAIAH 66: FCL

Highlight

Copy