THUṬHENTU 19

Levi Mipa Le A Nupisun

1Culai ahcun Israel mi pawl cu siangpahrang an nei lo. Efraim tlangpar ram dengah Levi pa pakhat a um ih Judah ram Bethlehem khua ih nunau pakhat a nupisun ah a lak. 2Voikhat cu a pasal parah a thin a heng#a thing a heng timi hi Hebru Cathiang sungah mizuangzam a si tiin a um. ih Bethlehem khua a pa ih hnenah khua a tlan. Cutawkah thla li sung a um. 3Cule a pasal cu a hnen-um pakhat le a laak pahnih hruai in va leem ih va hruai sal tum in a feh. A nupisun in a pa ih inn ah ṭhatein a rak tlunter. A pa khal in aipuang zetin a rak hmuak. 4A puzon in a kaih ruangah ni thum sung a caam. A nupisun thawn ti in rawl ei tlang in an riak. 5Cule a ni linak zingah an tho ih feh dingin an tim an tuah. Asinain a puzon cun a maakpa ih hnenah, “Rawl ei hmaisata hrih uh. Nan ril a rawng pang ding. Nuamte in nan feh leh pei,” tiah a ti.

6Curuangah an pu-tu in an totlang ih an in an ei tlang. Cutikah a puzon cun, “Tuihzan cu riak hrih awla nuamzetin um hrih ko aw,” tiah a ti.

7Levi pa cu a pok tum thotho; asinain a pu in a kaih ruangah cun a ṭul sal ih zankhat cu a riak sal. 8A ni nganak zingah a tho ih feh dingin a tim a tuah. Asinain a puzon cun, “Rawnhru tal eita awla nuam huahho in um hrih aw. Simneem na feh leh pei cu,” a ti ih an pahnih cun rawl an ei tlang lala.

9Cun Levi mipa le a nupisun le a hnen-um pa cu an pok. Sikhalsehla a nupisun ih pa cun, “Zohhnik, zanlam a si thlang hi; tuihzan cu riak lawlaw hrih aw. A rei hlanah khua a thim cing ding a si. Curuangah tuihzan cu riak hrih awla um huahho hrih aw. Thaizing ah zingpit tein na tho pei ih na tlung leh pei,” tiah a kaih lala.

10-11Asinain Levi mipa cun zankhat riah hrih cu a duh nawn lo ih a nupisun thawn an laak pahnih cu a todan an dan ih an feh suak. Jebus khua (Jerusalem timi) kiang an thlen tikah khua a thim zik thlang ih hnen-umpa in a bawipa ih hnen ahcun, “Ziangah so tuihzan cu hi Jebus khawpi ahhin kan riah mai lo?” tiah a sut.

12Cutikah a bawipa in, “Israel miphun an um lonak khua ahcun kan riak lo ding. Kan lan pei ih Gibeah ah kan feh ding. 13Ra uh, kan feh hrih pei ih Gibeah ah a si lole Ramah ah kan riak pei,” tiah a ti. 14Curuangah Jebus khua cu an lan ih an feh. Nitlak zawng ah Benjamin phun ih ram sung Gibeah khua ah an thleng. 15Cuih khua ih riak dingin zinpi ihsin an vung pial. Levi mipa cu khawsungah a feh ih an mual ah a to. Asinain zan riahnak tlun-inn an tong lo.

16Culaitak fangah cun patarpa pakhat a lo ih hnaṭuannak ihsin a rung tlung. Cupa ih suahsemnak cu Efraim tlangpar ram asinain Gibeah khua ih a rung ummi a si. Gibeah khuami pawl cu Benjamin miphun an si. 17Mikhualpa mual ih a to mi cu patarpa in a hmuh tikah, “Khuitawk inso na rat? Khuitawk ah so na feh zik?” tiah a sut.

18Cutikah Levi mipa cun, “Judah ram Bethlehem khua ihsin kan ra ih kan umnak Efraim tlangpar ram dengah kan feh ding. Bethlehem ka vung tlawng ih atu cu ka innah ka tlunglam a si. Riahnak dingah khuihman ah tlun-inn kan tong lo. 19Kan laak hrangah rawl le hrampi kan nei; ka nupisun le keimah le ka hnen-umpa hrang khalah sang le sabitti lamcaw kan nei a si. Kan ṭul mi hmuahhmuah kan nei thluh,” tiah a sawn.

20Cutikah patarpa cun, “Hnangam in um awla, ka inn ah rung riak uh. Nan sam mi hmuahhmuah keimah in ka lo pe ding. Hi mual ahcun riak hlah uh,” tiah a ti. 21Cuih hnuah a inn ahcun a fehpi hai ih an laak pawl cu rawl a pek. Mikhual pawl cu an ke an kholh ih zanriah an ei.

22Cutiih nuamzet ih an um laifang ahcun khawsungih mi sualral pawl in an inn cu an kulh ih sangka an run den ih inn neitu patarpa cu, “Na inn ih a tlung mipa cu rak suah aw; a sualpi kan duh a si,” tiah an auh ciamco.

23Asinain patarpa cu lengah a va suak ih, “Unaule uh, a si lo. Cubangtuk a sualmi le thil ṭha lo ningsinza cu tuah hlah uh. Hi pa cu ka mikhual a si. 24I ngai hnik uh; hinah ka fanu fala le hi pa ih nupisun an um. Atu ka rak suahpi pei ih nan minung an si. Nan duh vek in rak tuah in rak sualpi hai uh. Asinain hi patarpa ih par ahcun a ṭha lomi zianghman tuah hram hlah uh,” tiah a leem ciamco. 25Sikhalsehla a thu cu an ngai duh hrimhrim lo. Curuangah Levi mipa cun a nupisun cu innleng ah an hnen ahcun a hei suah. Cutikah a nupisun cu an kaihrem ih an sualpi ih zanvar in an hmuhsuam.

26Zinglam khawfingcat ah nunau nu cu a ra ih patarpa ih inn, a pasal riahnak inn ih sangka kiang a thlen tikah a sawn. Nisuah hnu tiang cutawk ahcun a um lai hrih. 27A pasal cu zingah a tho ih a innih tlung dingin sangka a hei on tikah a nupisun cu sangka kiangah a kut sangka tlang pawk in a bok kha a hmu. 28Cutikah a pasal in, “Tho aw, kan feh pei,” tiah a ti naón anih cun a sawn nawn lo. Cutikah a pasal cun a ruak cu a lak ih laak parah a suan ih a inn ah a tlung. 29A inn a thlen tikah innsung ah a vung lut ih namte a lak. Cule a nupisun ih ruak cu ṭhen hleihnih ah a can thluh hnuah Israel ram khuazakip ah a kuat ṭheh. 30Cumi a hmutu hmuahhmuah in, “Hi vek thil kan hmu dah keel lo. Israel mi Izipt ram ihsin kan suah ni ih thokin hivek thil hi a um dah lo a si. Ruat hnik uh! Ziangtal kan tuah lo ding maw?” tiah an ti cio.

Currently Selected:

THUṬHENTU 19: FCL

Highlight

Copy