THUṬHENTU 18

Mikah Le Dan Miphun

1Culai ahcun Israel ramah siangpahrang an um lo. Dan miphun pawl cu ram luah ding an hawl rero, ziangahtile culaiah Israel mi lakah ram luah ding an rak co ve lo. 2Curuangah an hrin sungih innsang hmuahhmuah lak ihsin pacang ṭha bik an timi panga an hril ih Zorah khua le Eshtaol khua karlak ih ram zoh dingah le thlingthla dingah an thlah. An feh ih Efraim tlangpar ram an thleng ih Mikah inn ahcun an riak. 3Cutawkih an um sungah cuih inn ih a ummi tlangval pa cu a aw-thluk in Levi mi a si ti kha an thei thiam. Cutikah amah cu an pan ih, “Hinah zoso a lo hruai? Hinah ziangso na tuah? Ziangah so hinah na um?” tiah an sut.

4Anih in, “Mikah thawn thukamnak kan nei a si. A puithiam ka ṭuan ih ka hlawhman amah in i pek,” tiah a ti.

5Cule annih in, “Kan khualtlawnnak ahhin kan hlawhtling pei maw hlawhtling lo so, Pathian in hun ron sak hnik aw,” tiah an dil.

6Cuih Puithiam pa cun, “Hnangamtein va feh uh. Nan fehnak ah Bawipa in a lo kilkhawi a si,” tiah a ti.

7Curuangah an panga cun an feh ih Laish#Laish ticu Hebru ṭong in kiosa tican a si. khua an thleng. Cutawkih a ummi minung pawl kha an zoh tikah lungphannak zianghman nei lo, Sidon mi pawl bangtuk in hnangamzet in an um kha an hmu. Pakhat le pakhat tlunah thunei cuang um loin rualrem zet le tluangtlam zetin an um ih, hlawhsam mi zianghman nei lo ih a nungmi an si. An umnak cu Sidon mi pawl umnak ihsin a hlatzet ih miphun dang thawn pawl awknak le pehzomnak zianghman an nei lo. 8Mi panga pawl cu an kir ih Zorah le Eshtaol an thlen tikah an phunpi pawl in an hmuh mi le an tonmi thu cu an rak sut. 9Cutikah annih in, “Thok uh, Laish cu kan do ding. Ram cu kan va zoh ih ramṭha ngaingai a si. Ziangah so nan um thuaithi men! Zamrang tein pok uh! Feh lohli uhla an ram cu luah zaang uhsi. 10A hmun nan thlen tikah helhkam nei lo, ralmuang zetih ummi an si ti kha nan hmu ding. An ram cu a kauzet ih Pathian ih a lo pek zomi ram a si. Milai ih poihai mi thil hmuahhmuah kim ṭhehnak ram a si,” tiah an ti.

11Zorah le Eshtaol khua ihsin Dan hrin pawl minung zaruk cu ralthuam kimtein an keng ih an feh. 12A so lamah an hung feh ih Judah ram sung Kiriath Jearim ihsin nitlaknak lam ah an riak. Curuangah tuihsan tiangin cutawk hmun cu Dan Riahnak tiah an tita. 13Cutawk cun an feh sal ih Efraim tlangpar ramih ummi Mikah inn ah an thleng.

14Cutikah Laish kiangkap hrawngih ram a rak zohtu le a rak thlingthlatu minung panga pawl in an rualpi pawl hnenah, “Hi nan hmuhmi inn pakhat sungah hin puithiam korfual ṭaangthlaih, thing ih tuahmi milem le burmi milem an um, ti hi nan thei maw? Ziangtin so kan ti ding ruat hnik uh?” tiah an sut. 15Curuangah Levi tlangvalpa umnak Mikah ih inn pan in an pial ih, “Na dam lai maw,” tiah cibai an buk. 16Culai ahcun raldo dingih a tiar-awmi Dan ralkap zaruk pawl cu kotka kiangah an rak ding. 17Cutikah thlingthlatu mi panga pawl cu hmakhatte-ah Mikah ih innsung ahcun an lut ih puithiam korfual ṭaangthlaih, thingih tuahmi milem le burmi milem dang pawl cu an lak. Culai ah puithiam pa cu ralkap zaruk pawl thawn kotka ahcun a rak um.

18Mi panga pawl in Mikah ih innsung ihsin milem pawl an lak a hmuh tikah puithiam pa in, “Ziang so nan tuah rero?” tiah a sut.

19Cutikah annih in, “Daite in um sawn aw! Kam khat hman ṭong hlah! Kan hnenah ra awla kan puithiam le kan remruattu ah ra cang aw. Minung pakhat innsang hrangih puithiam si hnak cun Israel miphun phunkhat pumpi ih puithiam si cu na duh sawn lo maw?” tiah an ti. 20Cumi a theih tikah puithiam pa cu a lung a awizet ih milem pawl cu a lak ih an hnenah a thlun ve.

21Cuticun an khua lamah an kir ih an fanau, an ṭilva le an thilri pawl cu an hmaiah an khor vivo. 22Mikah ih inn ihsin hla nawn an thlen tikah Mikah cun a innhnen pawl cu raldo dingah a ko. Dan ralkap pawl cu an dawi ih, 23an auh phah vivo. Dan ralkap pawl cu dunglet an hoi ih Mikah an hmuh tikah, “Ziangah so in dawi? Minung kha zatzat ziangah so na run hruai?” tiah an sut.

24Cutikah Mikah in, “Ka puithiam le ka tuahmi milem ka pathian pawl nan lak ih nan rak tlanpi ziar a si. Ziangtiih tuah so in tum? ‘Ziangah so in dawi?’ nan ti ngam lai sapbai!” tiah a ti.

25Dan ralkap pawl cun, “In auh hlah! Um men sawn aw! Hi ralkap pawl an thin na hengter a si ahcun nangmah le na innsang zatein nan thi men ding,” tiah an ti. 26Cuih hnuah Dan mi pawl cu an feh. An cak tuk ih do ding rual an si lo, ti kha Mikah in a hmuh tikah a inn ah a kir sal.

27Dan mi pawl in Mikah ih tuahmi thil pawl le a puithiam cu an tlanhlo pi. Cule an feh ih mi daizet le mi ralmuang pawl ih khua Laish cu an do. Khawsung mi pawl an that ih an khua cu meisa in an ur. 28An khua cu Sidon khua ihsin a hlazet ih pawlkommi le pehzommi zokhal an neih lo ruangah runtu zohman an nei lo. Laish khua cu Beth Rehoh khua kiang horkuam ih a ummi a si. Dan mi pawl in cuih khua cu an din sal ih cutawkah an um. 29Jakob ih fapa an pu Dan ih hmin suangin cuih khua cu Dan tiah hmin an sak sal. Cuih hlan ahcun Laish tiih an rak kawh ringring mi a si. 30An milem cu biak dingah a umnak an tuah sak. Cule Moses ih fapa Gershom ih fapa Jonathan cu Dan mi pawl ih puithiam ah a cang. A tefa pawl khal Dan mi pawl ral ih an kaih thluh hlan tiang puithiam ṭuantu an si ringring. 31Pathian ih biakinn Shiloh ih a um sung hmuahhmuah Mikah ih milem khal cutawk ah a um ringring.

Currently Selected:

THUṬHENTU 18: FCL

Highlight

Copy