Matthaisioi Phrinzangpo 15

1Dekana Yerusalemiangna chhos zbrikhan kaṯo nang Pharisyapa kaṯo Yeshui shitia dyu zerba yonged. 2Yeri lzadrulbakhanunis mezpouni khrimspo chia chaqed ? Chiazerbana khongis laqpa makrua zacha zed. 3Amma, khos khongunla tamlaniang mols : khyentesang khyenti khrimsi phya Ashipi molchaun chia chaqed ? 4Chiazerbana Ashipas dyu kale mols : khyeri ata nang ami rin joq; yang rangi ata nang amâ rshmunmo tabskhanpoe stroqa tangma rgosed. 5Amma, gasus ata nang amâ zesna: Ngi shitia yeranga thobchi zathungpo Ashipi skalpo in [yang] doa rangi ata nang ama rin jaqcha rgospa med zere khyentes ltsabed. 6Yang khyentes khyenti khrimsi phya Ashipi molcha songkhanpo changang menchiang tanged. 7Wa ngarchhos bakhanun Esaiasis snani gochukchika shese zeskhan speraun rgyala yod, dyu khyenti rshmangeang zeren : 8Di mithsirpos rangi kheka ngâ yasharin bed, amma khonguni snyinpo ngana thaqring yod. 9Amma, khongunis miunis phingskhan chhoskhrimsun ltsaben dukse nga tonmedla rchored. 10Yang mibongspo rangi shitia yong zere khyongse khongunla mols : Rshna base rshtaḵẖspo bashik! 11Khas chhachaunis miyus tsetu ba med, dobasang khaos bingse songkhanpos miyu tseṯu bed.

12Dekana, lzadrulbakhanunis khoe shitia yongse khoa jus : Kasa Pharisiapaunla di tampo goana phoqchao yeranga shesa ? 13Amma, khos tamlaniang mols : Rshnami ngi Ataos mathsukskhan laqthsuksun jung paṯaq na phude phangcha chhok. 14Khongun dyatsuga jaqshik. Khongun jarbaula lamstankhan jarbaun in, ni taqdir jarbas jarba lam stansna nyiska qom chigiang khyere phpqtuk. 15Ni, Petrosis khoa tamlaniang jus : Ngachâ de speo shodang ju! 16Amma, Yeshus mols : khyentangang darang migokhan ina ? 17Khas chhachao ltoeang hlebse chhed yang do sangan gyure binged zerchi rshtaḵẖspao khyentanga meda ? 18Amma khas bingkhanpo snyingiangna binged, dyaos miyu tseṯu bed. 19Chiazerbana snyingiangna rtsoqpo sambaun, mi sadchao, lolium, miḏodcha yodkhan lasun, rshkuchaun, rdzoni chhebjiun, rshmunmoun, binged. 20Miyu tsetu bachao dyûn in; amma, makhruskhan laqpa na zan zachaos miyu tseṯu ba med.

21Ni, Yeshu de yuliangna bingse Turos nang Sidonosi thayuluniang skyods. 22Ni, ltos Kanaanpa anek de rgyastridpesngna bingse yongse kustaben khoa jus : Kasa Ashipa, Dawidi Rshras, nga zdikpa thsorba zadang ju! Ngi bumoa rshanṯe drek juksen yod. 23Amma, khos doa chang tamlan chik maldzoqs, yang khoe lzadrulbakhanunis shitia yongse khoa zeren jus : Di aneo ldzoqse chhachuksang (ju), chiazerbana khos nganti jukna kustaben yonged. 24Amma khos tamlaniang mols : Israeli khangmi storskhan lugûn tse phya mene nga tangcha songma med. 25Dekana, de aneo yongse khoe dunla zguse jus : Kasa Ashipa, ngâ laqa skyodpa zadang! 26Amma khos tamlaniang mols : Phruni zachao lene khyiphrunla tangchao rsha men. 27Amma, de aneos jus : Kasa ju, Ashipa, khyiphrûnisang rangi ashipauni solchoqsikana budskhan zanbrulun zed. 28Dekana Yeshus deanewa tamlaniang mols : La ane, khyeri chheslukspo chhô yod, khyeres tsalskhanpo khyeranga thobshik! Molbi dyana bangseka de bumô noro song.

29Yang Yeshu dekana langse skyode Galilaye thsoe shitia lebs, yang rlka bingse seka juksen yodpin, 30Yang rshmaqdusun mangmo khoe shitia yong; dounis thyangmaun, jarbaun, lchemedun, toqtoq songkhanun, yang nadpa mangmo khontang nanyambo yongspin; khongun khoe kangmeka jaqs. Yang khos khongun noro chhachuks. 31lchemedun skad zorkhan, ṯoqṯoq songkhanun gangrgya, thyangmoun (rgyaka base) drulkhan yang jarbaun thongkhan chhachukspao mithsounla thongmana rgyale Israeli Ashipaola stodkha bas. 32Dekana Yeshus rangi lzadrul bakhanunla rangi shitia yong zere khyongso mols : mibongsun jaqma sum nga nanyambo dukse khongunla rgosha yodkhan zachek medpana ngâ khong zdikpa thsored, yang khongun lamiang chade lusuk samse ngâ khongun khastonga chhacukchao phodpamed. 33Yang khoa [rangi] lzadrulbakhanunis khoa juid : Ditsek rshmaqchik drangshukchi ṯakiun di changmedkhan malseka ngantanga gar na thobtuk? 34Yang Yeshus khonga mols : khyenti shitia ṯaki tsam yod ? Ni, khongis juid : Ṯaki rdun nang chaqtse nya kaṯo yod. 35Yang, khos mirshmaqunla seka duk zere skals.

36Yang, de ṯaki rdunpo nang nyaun laqpeang lene Ashipa-a ju base chaqsena [khoe] lzadrulbakhanuni laqa tangs, yang lzadrulbakhanunis rshmaqdusla tangs. 37Yang khongun jungis zose drangs; yang luse yodkhan chhaqpoun tsepo rdun gangse lens. 38Yang, zakhanun, aneun nang phrûn menma, khyoqa stong jbji tsek yodpin. 39Yang, mirshmaqun chhachukse kho nayoeang bings yang Magdale thayuluniang skyods.

Currently Selected:

Matthaisioi Phrinzangpo 15: SOMA

Highlight

Copy